Аан тэгээ юу...гээд орхиж боломгүй тоо баримтыг өнөөдрийн сэдвээрээ хөндөж байна. Улсын хэмжээнд энэ хугацаанд 19773 гэмт хэрэг бүртгэгдэн нутаг дэвсгэрийн хувьд хүн амын төвлөрөл ихтэйгээрээ нийслэл хотод гэмт хэргийн гаралт 62,1хувьтай. Өндөр байна. Өмнөх оны мөн үеийнхээс 957 хэргээр буюу 5.1 хувиар, нийслэлийн хэмжээнд 941 хэргээр буюу 8,3 хувиар тус тус өссөн гэсэн үг.
Гэмт хэрэгт 16,753 хүн шалгагдснаас өмнөх оны мөн үеийнхээс 7,6 хувиар өссөн байна. Гэмт хэрэгт холбогдогчдын нийгмийн байдлыг авч үзвэл ажилгүй иргэд хамгийн өндөр хувийг эзлэж, хувиараа хөдөлмөр эрхэлдэг иргэд удаалж, малчид , хувийн хэвшлийн, төрийн албан хаагч, оюутан, сурагч, төрийн бус байгууллага, тэнэмэл иргэд, хоригдол, сургууль завсардсан, хугацаат цэргийн алба хаагч нар гээд үргэлжлэх...Энэ юуг өгүүлж байна даа.
Гэмт хэргийн улмаас 19524 иргэн, 79 аж ахуй нэгж байгууллага хохирч 836 хүн нас барсан нь өмнөх үеийн мөн үеэс 81 буюу 10,7 хувиар өссөн тоон үзүүлэлт дурайж байна. Энэ тоо бидэнд их зүйл ярьж өгч байгааг та ойлгож байгаа. Аан тэгээ юу гээд орхиж болохгүй сэдэв, агуулга энд байна.

ТОО ЮУ ЯРЬЖ БАЙНА

Гурван сая дахь иргэнээ хүлээж авна гэж сэтгэл догдлон хүлээж байгаа энэ цаг мөчид зуурдаар 836 хүн бурхны оронд очжээ. Харамсалтай. Энэ тоо он солигдохоос өмнө хэд болохыг хэн ч мэдэхгүй байна. Нэг ч хүн цаг бусаар бүү үхээсэй билээ дээ. Өдөр бүр л залуус маань шил шилээ дараад хар тамхи татсан, зарсан, борлуулсан, тээвэрлэсэн гэх хэрэгт холбогдох боллоо.
Улс нийслэлийн хэмжээнд өнгөрсөн оны мөн үеийнхтэй харьцуулахад нэг мянга шахам хэргээр өссөн тоо баримт байна. Бас л эмгэнэл. Харамсаж байна. Улс орон хөгжиж байр, ажлын байр нэмэгдэж байна, барилга байшин баригдаж байна гэдэг сайн сайхан үйл явдлууд зөндөө болж байгаа ч үүнийгээ дагаад гэмт хэрэг өсөж байгааг нийгмийн үзэгдэл гээд орхиж болохгүй. Хүн бүр хүүгээ охиноо сайхан өсгөөд, үлгэр дууриал болоод сайхан амьдрах хүсэл эрмэлзэлтэй амар амгалан байхад танд юу саад болж байна.
Дайн тулаангүй амар амгалан эх оронд минь хараа цуцаам тал нутаг, баян хангай, гол ус тунгалагшин урссаар байхад бид дэндүү цөөхүүлээ байж жил хүрэхгүй хугацаанд ийм их гэмт хэрэг, нас баралттай байна гэдэг асуудал бишүү.

ТОО ЯРЬЖ БАЙНА. ДУУЛГАВАРТАЙ СОНСООД ӨНГӨРӨЛГҮЙ НЭГ Ч ГЭСЭН ХҮНИЙ АМИЙГ АВАРЧ, НЭГ Ч ГЭСЭН ХҮНИЙГ ТОРНЫ ЦААНА ГАРГАХГҮЙН ТӨЛӨӨ ХҮН БҮР ХАРИУЦЛАГАТАЙ БАЙГААЧ ГЭЖ ЯРЬЖ БАЙНА.