Цагдаа, дотоодын цэргийн байгууллагаас алба хаагчийг гүйцэтгэлийн үр дүн, мэргэшлийн түвшний үнэлгээ, хувь хүний мэдлэг, боловсрол, мэргэжил, мэргэшил, ур чадвар, туршлага, чадахуйн зарчим (мерит)-д тулгуурлан, нээлттэй сонгон шалгаруулалт зарлаж алба хаагчдыг албан тушаал шат дараалан шударгаар ахих бололцоог олгох, төрийн албаны мэргэшсэн, тогтвортой байдлыг хангах, хүний нөөцийн томилгоо ил тод нээлттэй, шилэн болгох бодлого баримтлан ажилладаг.

Удирдах албан тушаалын сул орон тоонд энэ оны эхний 6 сарын байдлаар 4 удаа тусгай шалгалт, сонгон шалгаруулалт зарлаж, Цагдаагийн алба, нэгж, нутаг дэвсгэр хариуцсан цагдаагийн байгууллагын газар, хэлтэс, тасаг, хэсгийн даргын 67 албан тушаал, Дотоодын цэргийн байгууллагын ангийн захирагчийн орлогч, анги, тусгай салбарын захирагч, ротын захирагч, тасаг, хэсгийн даргын 32 албан тушаал, нийт 99 сул орон тоонд тусгай шалгалт зарлаж, бүртгэл, шалгалтыг зохион байгуулсан.

Тусгай шалгалт, сонгон шалгаруулалтад хамрагдсан алба хаагчдыг онооны дарааллаар байр эзлүүлж, нэгдүгээр байранд орсон 55, хоёр, гуравдугаар байранд орсон 34, нийт 89 алба хаагчдыг албан тушаалд томилсон байна.

Хууль, эрх зүй, бодлогын баримт бичгийн талаарх мэдлэг, дүн шинжилгээ хийх чадвар, асуудал шийдвэрлэх чадвар, монгол хэлний бичгийн чадвар зэрэг 4 шалгалтыг энэ оноос эхлэн Төрийн албаны зөвлөлтэй хамтран зохион байгуулдаг болсон.

Ярилцлагын шалгалтыг Төрийн албаны зөвлөлийн шалгалтын цахим системийг ашиглаж зохион байгуулж, ил тод, шалгалтын дүнг тухай бүр танилцуулан системд байршуулж байна.

Цагдаагийн байгууллагын үйл ажиллагааны журам “Алба хаагчийг мэргэжлийн зэргийн сургалтад хамруулах, шалгалт авах” (код-929)-ын дагуу Хүч, Хурд, Авхаалж самбаа, Уян хатан зэрэг бие бялдрын шалгуур үзүүлэлтийг хангаж буй эсэхийг шалгасан.

Сонгон шалгаруулалтад оролцож байгаа алба хаагчийг хамт олны дунд нэр хүндтэй, хүлээн зөвшөөрөгдсөн, хувь хүний ёс зүй, харилцааны соёл, манлайлал зэргийг тухайн байгууллагын алба хаагчдаас авсан санал асуулгаар тодорхойлж, судалгааны дүнг нэг шалгуур үзүүлэлтээ болгож байна.

Дэлгэрэнгүй мэдээлэл авах: Цагдаагийн ерөнхий газрын Захиргааны удирдлагын газрын Хүний нөөцийн хэлтсийн ахлах мэргэжилтэн, цагдаагийн хошууч Э.Төвшинжаргал
Хаяг, утасны дугаар: Монгол Улс, Улаанбаатар хот, Чингэлтэй дүүрэг, 4 дүгээр хороо, Самбуугийн гудамж-18, Утас: 7019-1095