Нэгдсэн Үндэстний Байгууллагын энхийг дэмжих ажиллагаанд цагдаагийн баг оролцуулах бэлтгэл ажлын хүрээнд Америкийн Нэгдсэн Улсын Олон улсын цагдаагийн энхийг сахиулах ажиллагааг дэмжих хөтөлбөр (IPPOS)-ийн зөвлөх/эксперт Глен Краннэж, АНУ-ын Элчин сайдын яамны Бүс нутгийн аюулгүй байдлын хэлтсийн дарга, хууль сахиулах ба аюулгүй байдлын атташе Жоел Ортез, АНУ-ын Төрийн департаментын Мансууруулах бодис хууль сахиулах асуудал эрхэлсэн олон улсын хөтөлбөрийн зохицуулагч Ц.Эрдэнэхишиг нарыг өнөөдөр /2025.06.16/ хүлээн авч, албан уулзалт зохион байгууллаа.

Уулзалтад Цагдаагийн ерөнхий газрын Тэргүүн дэд дарга, бригадын генерал Ц.Ням-Очир, Цагдаа, дотоодын цэргийн сургалтын нэгдсэн төвийн Энхийг дэмжих ажиллагааны сургалт, бэлтгэлийн хэлтсийн дарга, цагдаагийн хурандаа П.Даваажав, Гадаад харилцаа, энхийг сахиулах ажиллагааны хэлтсийн ахлах мэргэжилтэн, цагдаагийн хошууч Б.Бат-Оргил нар оролцов. 

Энэхүү уулзалтаар НҮБ-ын энхийг дэмжих ажиллагаанд оролцуулах “Цагдаагийн баг”-ийн бэлтгэл ажлын явц байдалтай биечлэн танилцах, хөндлөнгийн үнэлгээ хийх, багийн эзэмших үндсэн болон өөрийгөө нөхөн хангах техник, тоног төхөөрөмж болон бие бүрэлдэхүүний бэлэн байдлыг хангах, НҮБ-ын Үнэлгээ, зөвлөгөөний багийн айлчлалд бэлтгэх асуудлаар зөвлөмж гаргаж, хамтран ажиллах талаар санал солилцсон юм.