Монгол Улсын Их Хурал, Засгийн газраас төрийн үйлчилгээг хүн төвтэй болгох, бүтээмжийг нэмэгдүүлэх, бодлого чиглэлийн хүрээнд төрийн байгууллагууд процессын дахин инженерчлэл хийхийг зөвлөсөн.

Үүнтэй холбогдуулан цагдаа, дотоодын цэргийн байгууллага чиг үүргийн давхардлыг арилгах, алба хаагчдын ажлын ачааллыг тэнцвэржүүлэх, иргэдэд үзүүлэх үйлчилгээний чанар хүртээмжийг дээшлүүлж, ажлын бүтээмжийг нэмэгдүүлэх зорилгоор энэ оны 04 дүгээр сарын 02-ны өдөр Засгийн газрын хяналт хэрэгжүүлэх газартай хамтран процессын дахин инженерчлэл хэрэгжүүлэх үүрэг бүхий ажлын хэсгийг байгуулсан юм.

Ажлын хэсгээс процессын дахин инженерчлэлийн хамрах хүрээ, чиглэлийг тодорхойлж, багуудын зохион байгуулалт, тэдгээрийн үйл ажиллагаандаа ашиглах  аргачлал, арга зүйг боловсруулан, бэлтгэл ажлыг хангаж энэ оны 05 дугаар сарын 05-ны өдөр хамтарсан багийн уулзалтыг Цагдаагийн ерөнхий газрын хурлын танхимд зохион байгуулав.

Уулзалтад Засгийн газрын Хяналт хэрэгжүүлэх газрын Тандалт судалгаа, бодлого төлөвлөлтийн газрын дарга Н.Баярмаа, ЦЕГ-ын Дэд дарга бөгөөд Стратеги, бодлого, инновац, хөгжлийн албаны дарга, цагдаагийн хурандаа О.Ганбат, хамтарсан ажлын хэсгийн гишүүд, зөвлөхүүд болон гүйцэтгэх багийн бүрэлдэхүүн оролцлоо.

Ажлын хэсгээс 8 чиглэлээр батлагдсан график төлөвлөгөөний дагуу процессын дахин инженерчлэлийг хэрэгжүүлж, тайлан санал, дүгнэлтийн хамт боловсруулан энэ оны 3 дугаар улиралд багтаан Засгийн газрын хуралдаанд танилцуулахаар төлөвлөн ажиллаж байна.