Япон улсын Үндэсний цагдаагийн газрын харьяа Цагдаа судлалын хүрээлэнгийн Гэмт явдал судлал, зан үйлийн шинжлэх ухааны газрын захирал, доктор Ватанабэ Казүми, мөн газрын Гэмт хэргээс урьдчилан сэргийлэх хэлтсийн дарга, доктор Сайто Томонори нар Монгол Улсад ажлын айлчлал хийж байна.

Айлчлалын хүрээнд өнөөдөр /2025.04.17/ Цагдаа, дотоодын цэргийн байгууллагын 110 алба хаагчдад Япон улсын цагдаагийн байгууллагын авч хэрэгжүүлж буй гэмт хэргээс урьдчилан сэргийлэх ажил, арга хэмжээ, үр дүн, туршлага, “Дүн шинжилгээнд суурилсан бодлого боловсруулалт”, “Асуудал шийдвэрлэх загвар”, “Зорилго тодорхойлж, үр дүнг тооцох арга” зэрэг сэдвээр алба хаагчдад мэдээлэл хийлээ.

Мөн Цагдаагийн ерөнхий газрын Дэд бөгөөд Стратеги, бодлого, инновац, хөгжлийн албаны дарга, цагдаагийн хурандаа О.Ганбат хүлээн авч уулзаж, туршлага судлах, хамтарсан судалгаа хийх, судлаач алба хаагч нарыг суралцуулах зэрэг байгууллага хоорондын цаашдын хамтын ажиллагааг өргөжүүлэн хөгжүүлэх асуудлаар санал солилцов.

Уулзалтад Гадаад харилцаа, энхийг сахиулах ажиллагааны хэлтсийн дарга, цагдаагийн хурандаа Б.Эрдэнэдалай, Стратеги, бодлого, инновац, хөгжлийн албаны дэд бөгөөд Стратеги, бодлогын хэлтсийн дарга, цагдаагийн хурандаа Г.Мөнгөншагай, Стратеги, бодлого, инновац, хөгжлийн албаны Захиргааны удирдлагын хэлтсийн дарга, цагдаагийн дэд хурандаа Н.Ганхүү, Япон улсаас Монгол улсад суугаа Элчин сайдын яамны консулын ажилтан Н.Энхболд нар оролцсон юм.