Монгол Улсын Хүний эрхийн Үндэсний комиссоос Цагдаагийн ерөнхий газрын Хэрэг бүртгэх албаны харьяа нэгжийн алба хаагчдын хүний эрхийн мэдлэг, ойлголтыг нэмэгдүүлж, үйл ажиллагаанд нь хүний эрхэд суурилсан хандлага төлөвшүүлэх зорилгоор өнөөдөр буюу /2025.01.16/ өдөр “Хүний эрх ба хууль сахиулах ажиллагаа” сэдэвт сургалт зохион байгуулагдаж байна.

Уг сургалтаар үзэл бодлоо илэрхийлэх, тайван жагсаал, цуглаан хийх эрх чөлөөний асуудлыг хөндөж гэмт хэрэг, зөрчил шалган шийдвэрлэх эрх бүхий нийт 78 албан тушаалтан оролцож санал бодлоо солилцож байна.

Цагдаагийн ерөнхий газрын Хэрэг бүртгэх албаны дарга, цагдаагийн хурандаа Б.Оюутболд хэлсэн үгэндээ:

“Хэрэг шалган шийдвэрлэх ажиллагааны явцад бид Үндсэн хуулийн 16 дугаар зүйлд тусгагдсан хүний нэр төрийг хүндэтгэх, үзэл бодлоо илэрхийлэх эрхийг хангах, нотлох баримтад тулгуурлан хэргийг шийдвэрлэх, иргэний хувийн мэдээллийг хамгаалах, эрх мэдлийг зүй бусаар ашиглахаас сэргийлэх зэрэг эрхүүдийг хүндэтгэн, хамгаалах зарчмыг чанд мөрдөх шаардлагатай. Гэмт хэрэг, зөрчил шалган шийдвэрлэх ажиллагааг явуулахдаа бид зөвхөн хүний эрхийг хамгаалахаас гадна, иргэдийн хууль ёсны үүрэг, хариуцлагыг сануулах, мөрдүүлэх, ингэхдээ иргэн бүр эрх чөлөөгөө эдлэхдээ үндэсний аюулгүй байдлыг сахиж, бусдын эрхийг хүндэтгэн, нийгмийн хэв журмыг чанд баримтлах учиртай мөн “ТАНЫ ЭРХ, БУСДЫН ЭРХЭЭР ХЯЗГААРЛАГДДАГ” болохыг сануулж, ойлгуулах хэрэгтэй. Та бүхэн энэ эрхэм зорилгоо биелүүлж, хүний эрхийн мэдрэмжтэй, зөв дадлыг хэвшүүлж, тасралтгүй суралцан, чадварлаг, мэргэшсэн, хууль дээдлэх, ёс зүйг баримталж ажиллана гэдэгт итгэл төгс байна.Хүний эрх, эрх чөлөөг хангаж, хамгаалах зөв зүйтэй санал, санаачилгыг бүх талаар дэмжин ямагт хамтран ажиллах болно” гэлээ.