Хууль зүй, дотоод хэргийн яам болон Нэгдсэн Үндэстний Байгууллагын Хөгжлийн хөтөлбөр хамтран хэрэгжүүлж буй “Монгол Улсад хууль сахиулах ажиллагаанд хүний эрх, жендэрийн тэгш байдлыг дээшлүүлэх нь” төслийн хүрээнд эмэгтэйчүүдийн манлайллыг идэвхжүүлэх, хөгжүүлэх, ур чадварыг бэхжүүлэх зорилгоор “Эмэгтэйчүүдийн манлайлал” хөтөлбөрийг зохион байгууллаа.

Хууль сахиулах салбарын эмэгтэйчүүдийг манлайллыг сэдэлжүүлэх, хөгжүүлэх зорилготой энэхүү хөтөлбөр нь хоёр сарын хугацаанд амжилттай хэрэгжиж өнөөдөр /2024.12.03/ төгсөлтийн арга хэмжээгээ зохион байгуулж, төслийн хугацаанд хэрэгжүүлсэн ажлаа дүгнэсэн юм.

Хаалтын арга хэмжээнд Хууль зүй, дотоод хэргийн яамны Бодлогын хэрэгжилтийн зохицуулах газрын дарга Б.Батхуяг, Нэгдсэн Үндэстний Байгууллагын Хөгжлийн хөтөлбөрийн шадар суурин төлөөлөгч Лин Цао, АНУ-ын Элчин сайдын яамны Мансууруулах бодис, хууль сахиулах асуудал хариуцсан товчооны ажилтан Ц.Эрдэнэхишиг, Цагдаагийн ерөнхий газрын Дэд дарга, цагдаагийн хурандаа Н.Мөнхзул, Цагдаагийн ерөнхий газрын Дэд бөгөөд Нийслэлийн цагдаагийн удирдах газрын дарга, цагдаагийн хурандаа О.Ганбат, Дотоод хэргийн Их сургуулийн Сургалт, эрдэм шинжилгээ эрхэлсэн проректор, доктор, дэд профессор, цагдаагийн хурандаа Д.Эрдэнэбаатар болон хөтөлбөрт хамрагдсан алба хаагчид оролцов.

Хөтөлбөрт цагдаа, дотоодын цэргийн байгууллагын 80, Дотоод хэргийн их сургуулийн 20, нийт 100 алба хаагч оролцож, манлайллын талаарх ойлголт, мэдлэгийг бататгах, дээшлүүлэх, улмаар 20 багт хуваагдан, багаар ажиллах ур чадварыг хөгжүүлэн шинэ санал санаачилгуудыг өрнүүлж үр дүнтэй олон ажлуудыг хэрэгжүүлж үнэлүүллээ.

Шилдэг багийн санал санаачилгын төслийг үнэлэхдээ оновчтой, зорилгод хүрэх, хэрэгжих боломжтой, төслийн зардлыг шийдсэн, цаашид үргэлжлүүлэх боломжтой эсэх гэсэн 5 шалгуураар төслийн оролцогчдын хэрэгжүүлсэн ажлуудыг үнэлж, Э.Төвшинжаргал ахлагчтай “Титэм” баг, А.Гантуул ахлагчтай “Сэтгэлгээг сэрээ” баг, Ч.Чулуунтуяа ахлагчтай “Нэгдье, дэмжье, хамтрая” баг, Г.Дэлгэрсүрэн ахлагчтай “Төрөлхийн цоглог бүсгүйчүүд” багууд тус тус шилдгээр шалгарлаа.

Хөтөлбөрт амжилттай хамрагдсан алба хаагчдынхаа цаашдын ажилд нь амжилт хүсье.