Цагдаагийн байгууллагаас санаачилсан “Соёл танаас эхэлнэ” аяны хүрээнд GS25 дэлгүүрийн үйл ажиллагааны бүсийн менежер Т.Цэрэннямтай ярилцлаа.

Танд энэ өдрийн мэнд хүргэе. Цагдаагийн байгууллагаас “Соёл танаас эхэлнэ” аяныг санаачилж, GS25, CU байгууллага дэмжин хамтран эхлүүлээд байна. Танай байгууллагын хувьд энэхүү аяныг яагаад дэмжих болсон бэ?

Баярлалаа, танд ч мөн энэ өдрийн мэндийг хүргэе. Цагдаагийн байгууллагаас санаачилсан “Соёл танаас эхэлнэ” аяныг дэмжих болсон шалтгаан бол үйлчилгээний салбар дахь эерэг соёлыг түгээх, үйлчилгээний соёл стандартыг сайжруулахад өөрсдийн хувь нэмрийг оруулах шаардлагатай гэж үзсэн.

Түүнчлэн худалдаа, үйлчилгээний салбарт насны хязгаарлалттай бүтээгдэхүүн болох электрон тамхи, утаат тамхи, согтууруулах ундаа зэргийг худалдан борлуулахдаа иргэний бичиг баримтыг шалгаж, үйлчлүүлэгч талаас ч мөн адил шалгуулдаг хэвшилд оруулах талаас нь бид CU-тэй хамтарсан уриалга гаргасан байгаа.

Энэхүү аяныг санаачилсан цагдаагийн байгууллага болон аяны хүрээнд хамтран ажиллаж байгаа CU брэнддээ баярлалаа гэж хэлье.

GS25 дэлгүүр хэзээ үүсгэн байгуулагдсан бэ, хэдэн алба хаагчтай вэ? Танай байгууллагын цаашдын зорилго?

“Дижитал Концепт” ХХК нь 2021 оны 05 дугаар сарын 18-нд Монгол Улсад албан ёсны мастер франчайз эрхтэйгээр GS25 дэлгүүрээ нээснээс хойш одоогоор 280 салбарт 3000 гаруй ажилчид үйл ажиллагаагаа хэвийн тасралтгүй явуулж байна.

Бид дэлгүүрүүдээ франчайз эзэмших сонирхсон хувь хүмүүст шилжүүлэн олгох, үйлчилгээний салбарыг шинэ түвшинд хүргэх, хэрэглэгчдэдээ цаг ямагт чанартай бүтээгдэхүүнийг санал болгох гэсэн зорилготойгоор ажиллаж байгаа юм.

Танай байгууллага хувьд үйл ажиллагаагаа хэрэгжүүлэхэд тулгамдаж байгаа асуудал байна уу?

Үйлчлүүлэгч талаас бидний тавьсан шаардлагыг хүлээж авахгүй байх, иргэний үнэмлэхээ шалгуулахаас татгалздаг болон ариун цэврийн өрөөг зохисгүй ашиглах, салбарын ажилчидтай зүй бусаар харьцах, зарим тохиолдолд ажилчдын биед ч халдах тохиолдлууд гардаг даа. 

Аян эхлээд багагүй хугацаа өнгөрлөө. Иргэдийн хандлага өөрчлөгдөж байна уу?

Энэхүү нөлөөлийн аяны хүрээнд хийж буй мэдээллүүд эхний долоо хоногт цахим орчинд давхардсан тоогоор 13 сая гаруй хандалтыг авсан үзүүлэлттэй байгаа. “Соёл танаас эхэлнэ” аяныг үйлчлүүлэгчид талархалтай хүлээн авахаас гадна иргэд дэмжиж байгаа нь анзаарагдсан.

Аянаас хүлээж буй үр дүнгийн тухай?

Энэхүү аяныг зөвхөн уриа үг, бодол төдий өнгөрөөхгүйгээр харин яг бодит үйлдэл дээр үр дүн гараасай гэж хүсэж байна. Энэ нь үйлчилгээний байгууллагууд болон иргэд, үйлчлүүлэгч нар хоёр талдаа соёлтой харьцаж, худалдаа үйлчилгээний салбарт 21 нас хүрээгүй хүнд архи, утаат тамхи, 18 нас хүрээгүй хүүхдэд электрон тамхи болон түүний дагалдах хэрэгсэл, 16 нас хүрээгүй хүнд бэлэн гоймон, ахуйн хэрэглээний газ худалдаалахгүй гэсэн амлалт, түүний биелүүлэлттэй үр дүнг хүлээж байна.

Ярилцсанд баярлалаа.

Баярлалаа. Эцэст нь иргэн та ямар нийгэмд амьдрахаа өөрөө шийднэ. Өөрийн хүсдэг нийгмээ өөрөө бүтээж, соёлыг өөрөөсөө эхлүүлээрэй гэж хэлье.