Хууль зүй, дотоод хэргийн сайд О.Алтангэрэлийн санаачлагаар дээд боловсролтой иргэдэд зориулсан хоёр жилийн хөтөлбөрүүдийг сурталчлах өдөрлөгийг 2024 оны 11 дүгээр сарын 18-27-ны өдрүүдэд Монгол Улсын төрийн өмчит их, дээд сургуулиуд дээр зохион байгуулахаар төлөвлөсөн юм.

Энэхүү төлөвлөгөөний хүрээнд өнөөдөр (2024.11.21) Монгол Улсын  их сургуульд уулзалт, өдөрлөгийг зохион байгууллаа.

Өдөрлөгт Хууль зүй, дотоод хэргийн сайд О.Алтангэрэл, Дотоод хэргийн их сургуулийн ректор, доктор, профессор, бригадын генерал П.Батбаатар, Захирлын зөвлөлийн гишүүд, МУИС-ийн ректор, доктор, профессор Б.Очирхуяг болон багш, албан хаагч, оюутан залуус оролцов.

Энэ үеэр “Дотоод хэргийн их сургуулийн хоёр жилийн мэргэшүүлэх хөтөлбөр”, “Тодорхой төрлийн гэмт хэргийн илрүүлэлт, холбогдох мэдээлэл”, “Цахим гэмт хэргээс урьдчилан сэргийлэх талаар”, “Хил хамгаалах байгууллага, хилийн шалган нэвтрүүлэх үйл ажиллагаанд ашиглагдаж буй техник, технологи”, “Шинжилгээний лабораториудын үйл ажиллагаа”, “Гал түймрийн аюулаас урьдчилан сэргийлэх арга хэмжээ”, “Шүүхийн шийдвэр гүйцэтгэх байгууллагын үйл ажиллагаа” зэрэг сэдвүүдээр сонирхолтой мэдээлэл хүргэж, оюутнуудын сонирхсон асуултад хариулт өгсөн юм.