Хууль зүй, дотоод хэргийн сайдын нэрэмжит эрдэм шинжилгээний “Шилдэг бүтээл”, “Оюутны шилдэг илтгэл”, “Грант олгох төсөл”-ийн уралдааны шилдгүүдэд шагнал гардуулах ёслолын ажиллагаа Хууль зүй, дотоод хэргийн яамны хурлын танхимд болов.

Энэхүү ёслолын ажиллагаанд Монгол Улсын Их Хурал, Засгийн газрын гишүүн, Хууль зүй, дотоод хэргийн сайд О.Алтангэрэл, Дотоод хэргийн их сургуулийн ректор, доктор, профессор, бригадын генерал П.Батбаатар, Хууль зүйн үндэсний хүрээлэнгийн захирал Х.Эрдэм-Ундрах болон Хууль зүй, дотоод хэргийн яамны харьяа агентлаг, байгууллагуудын удирдлагын төлөөлөл, эрдэмтэн, судлаач, сонсогч, оюутнууд оролцсон юм.

Тус уралдааны инновацийн төсөлд Эрүүгийн цагдаагийн албаны Кибер гэмт хэрэгтэй тэмцэх газрын Тоон ул мөр илрүүлэх хэлтсийн дарга, докторант, цагдаагийн хошууч Б.Соронзонбаатараар ахлуулсан багийн “Vehicle forensic” буюу автомашины инфотайнмент системээс тоон ул мөр илрүүлэх төсөл “Тэргүүн байр”-т шалгарлаа.