Америкийн Нэгдсэн Улсын Төрийн департментын Мансууруулах бодис, хууль сахиулах асуудал эрхэлсэн олон улсын товчооны санхүүжилтээр Нэгдсэн Үндэстний байгууллагын Хөгжлийн хөтөлбөрөөс Хууль зүй, дотоод хэргийн яам, Хүний эрхийн үндэсний комисс, Цагдаагийн ерөнхий газар хамтран “Монгол Улсад хууль сахиулах ажиллагаанд хүний эрх, жендерийн тэгш байдлыг дээшлүүлэх нь” төслийг хэрэгжүүлж байна.

Энэхүү төслийн хүрээнд хууль сахиулах байгууллагын алба хаагчдын тэтгэврийн дараах карьер төлөвлөлт, тэтгэврийн өмнөх дасан зохицох хөтөлбөрийг боловсруулсан.

Уг хөтөлбөрийг нэвтрүүлснээр тэдний эрүүл мэнд сэтгэл зүйд эерэг нөлөө үзүүлж, нийгэмд өөрийгөө бэлтгэх, ажил эрхэлж байх үеийн нөхцөлөөс бууруулахгүйгээр амьдралын чанараа ижил түвшинд хадгалах, улам дээшлүүлэхэд чухал ажил болох юм.

Ийнхүү өнөөдөр /2024.10.28/ “Тэтгэвэрт бэлтгэх хөтөлбөр”-ийн төслийг хэлэлцүүлэх сургалт, семинарын нээлт болж, нээлтэд Цагдаа, дотоодын цэргийн Ахмадын хорооны дарга, хошууч генерал Ч.Амарболд, Цагдаагийн ерөнхий газрын Хүний нөөцийн хэлтсийн дарга, цагдаагийн хурандаа А.Мөнхцэцэг болон төв, орон нутгийн цагдаагийн газар, хэлтсийн 30 алба хаагч, ахмадын хорооны төлөөлөл, төслийн зөвлөхүүд оролцлоо.