Монгол цэргийн нэгдсэн холбооноос төрийн цэргийн болон хууль сахиулах байгууллагын алба хаагч, ахмадуудын эрх зүй, нийгмийн хамгааллын баталгааг сайжруулах, тэдгээрийн хууль ёсны ашиг сонирхлыг хамгаалах үндсэн чиглэл, олон улсын “Ахмадын баярын өдөр”-ийг тохиолдуулан өнөөдөр /2024.10.03/ ахмад ажилтан, цагдаагийн ахлах ахлагч Г.Ариунжаргалд өргөө цагаан гэр гардууллаа.

Энэхүү арга хэмжээнд Монгол цэргийн нэгдсэн холбооны Ерөнхий нарийн бичгийн дарга Ц.Тогоо, Цагдаа, дотоодын цэргийн Ахмадын хорооны дарга, хошууч генерал Ч.Амарболд, төрийн цэргийн болон хууль сахиулах байгууллагуудын ахмадын хороодын дарга нар, ахмад ажилтнуудын төлөөлөл оролцсон юм.

Ахмад ажилтан, цагдаагийн ахлах ахлагч Г.Ариунжаргал нь цагдаагийн байгууллагад 19 жил ажиллаж, албан үүргээ гүйцэтгэж байхдаа зам тээврийн осолд орж, эмчийн хяналтад оржээ.

Цаашид Монгол цэргийн нэгдсэн холбооноос ахмадуудынхаа эрх зүйн, нийгмийн хамгааллын баталгааг сайжруулах, тэдний хууль ёсны ашиг сонирхлыг хамгаалах чиглэлээр тууштай ажиллаж, олон талд арга хэмжээг тасралтгүй зохион байгуулахаар төлөвлөн ажиллаж байгаа аж.