“Олон Улсын болон Монголын ахмадын өдөр”-ийг тохиолдуулан Цагдаагийн ерөнхий газрын ахмад ажилтнуудад хүндэтгэл үзүүлж, хүлээн авах үйл ажиллагааг өнөөдөр Цагдаагийн ерөнхий газарт /2024.09.30/ зохион байгууллаа.

Энэхүү хүндэтгэлийн арга хэмжээнд Цагдаагийн ерөнхий газрын Дэд дарга, цагдаагийн хурандаа Н.Мөнхзул, Цагдаа, дотоодын цэргийн Ахмадын хорооны дарга, хошууч генерал Ч.Амарболд болон албаны хүмүүс, ахмад ажилчид оролцлоо.

Арга хэмжээг нээж, Цагдаагийн ерөнхий газрын Дэд дарга, цагдаагийн хурандаа Н.Мөнхзул хэлсэн үгэндээ: “Ахмадын баярын өдрийг уламжлал болгон тэмдэглэснээр өдгөө 32 дахь жилтэйгээ золгож байна. Цагдаагийн төв байгууллагаас Ахмадын санг хуульд заасны дагуу нэмэгдүүлэн Цагдаа, дотоодын цэргийн байгууллагын Ахмадын хороо болон Ахмадын зөвлөлүүдийн ажиллах нөхцөл, ахуй хангамжийг шийдвэрлэн үйл ажиллагааг байнга дэмжин хамтран ажиллана” гэдгээ илэрхийлэв.

Энэ үеэр Цагдаагийн ерөнхий газрын “Сүлд” чуулгын уран бүтээлчид ая дуугаа өргөж, хүндэтгэл үзүүлсэн юм.

Ахмадууд та бүхэндээ “Олон Улсын болон Монголын ахмадын өдөр”-ийн мэндийг хүргэхийн зэрэгцээ эрүүл энх, сайн сайхан бүхнийг хүсэн ерөөе!