Цагдаагийн байгууллагад Эрүүгийн цагдаагийн алба үүсэн байгуулагдсаны түүхт 90 жилийн ой тохиож байна. Ойн хүндэтгэлийн арга хэмжээ өнөөдөр /2024.09.27/ “Корпрайт конвейшн центр”-т амжилттай зохион байгуулагдаж байна.

Энэхүү хүндэтгэлийн арга хэмжээнд Монгол Улсын Их Хурал, Засгийн газрын гишүүн, Хууль зүй дотоод хэргийн сайд О.Алтангэрэл, Монгол Улсын Ерөнхийлөгчийн Тамгын газрын дарга Г.Занданшатар, Үндэсний аюулгүй байдлын зөвлөлийн нарийн бичгийн дарга А.Бямбажаргал, Цагдаагийн ерөнхий газрын дарга, Дотоодын цэргийн командлагч, бригадын генерал Т.Сүхболд, Цагдаагийн ерөнхий газрын үе үеийн дарга, генерал, төр нийгмийн зүтгэлтэн, ахмад ажилтан, хамтран ажилладаг төрийн байгууллагуудын удирдлагууд, алба хаагчид танхим болон цахим хэлбэрээр оролцлоо.

Хүндэтгэлийн арга хэмжээг албан ёсоор нээж, Эрүүгийн цагдаагийн албаны дарга, цагдаагийн хурандаа Э.Сэргэлэнбаатар эрхэм хүндэт зочин төлөөлөгч, алба хаагчдад хандан үг хэлсэн юм.

Өдгөө 90 жилийн түүхтэй Эрүүгийн цагдаагийн алба Монгол Улсын Ерөнхийлөгчийн зарлигаар “Цэргийн гавьяаны улаан тугийн одон”-гоор шагнагдлаа.

Мөн энэ үеэр гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах ажилд идэвх зүтгэл гарган ажилласан алба хаагчдад Төрийн одон, медаль, Хууль зүй дотоод хэргийн яам, Цагдаагийн ерөнхий газрын шагнал болон цол гардуулав.

Нэгэн мянга есөн зуун гучин дөрвөн оноос

Нэр төр, алдар гавьяаных нь алтан цадиг шинээр эхэлсэн

Цахилан одсон ерэн жилийн уртад

Цагаан шонхор сүлдэндээ үнэнч явсан

Эрүүгийн цагдаагийн албаар овоглосон үе үеийн ахмад ажилтнууд, эрхэм хүндэт генерал, офицер, ахлагч нартаа баярын мэнд хүргэж, цаашдын ажилд нь амжилт хүсье.