Цагдаагийн байгууллагаас өнгөрсөн долоо хоногт (2024.08.26-аас 09 дүгээр сарын 01-ний өдрүүдэд) 38.561 хэрэгт мөрдөн шалгах ажиллагаа явуулж, шүүхэд шилжүүлэх саналтай прокурорын байгууллагад 376 хэргийг хүргүүлсэн байна. Үүнээс:

Хүний амьд явах эрхийн эсрэг 4, Хүний эрүүл мэндийн халдашгүй байдлын эсрэг 142, Хүний бэлгийн эрх чөлөө, халдашгүй байдлын эсрэг 14, Өмчлөх эрхийн эсрэг 117, Олон нийтийн аюулгүй байдал, ашиг сонирхлын эсрэг 7, Хүрээлэн байгаа орчны эсрэг 7, Хөдөлгөөний аюулгүй байдал, тээврийн хэрэгслийн ашиглалтын журмын эсрэг 77, бусад 8 хэрэг байна.

Зөрчлийн шинжтэй 80.064 үйлдэлд зөрчил шалган шийдвэрлэх ажиллагаа явуулж, 79.702 зөрчлийг шийдвэрлэсэн байна.

Нийт шийдвэрлэсэн зөрчлийн 78.614 зөрчлийг эрх бүхий албан тушаалтнаас буюу цагдаагийн алба хаагч шийдвэр гаргаж, 1.088 зөрчлийг шүүхээр шийдвэрлүүлсэн байна. Үүнээс:

Олон нийтийн газарт зүй бусаар биеэ авч явах 2.637, Танхайрах 120, Хүний биед халдах 337, Гэр бүлийн хүчирхийлэлтэй тэмцэх тухай хууль зөрчих 205, Замын хөдөлгөөний аюулгүй байдлын тухай хууль зөрчих 74.788, бусад 1.615 зөрчил байна.

Эдгээрээс хүүхдийн эрхийг зөрчсөн 43 иргэнд 12.900.000 төгрөгийн торгуулийн шийтгэл оногдуулж, удаа дараа гэр бүлийн хүчирхийлэл үйлдсэн 205 иргэнийг шүүхээр 7-30 хоног баривчлуулах саналыг хүргүүлж, шийдвэрлүүлжээ.

Цагдаагийн байгууллагаас өнгөрөгч 7 хоногт эрэн сурвалжлалтын чиглэлээр оргодол 29, гэмт хэрэгт сэрдэгдсэн этгээд 59, сураггүй алга болсон хүн 86, шүүхээс даалгасан хүн 77, зөрчил үйлдсэн этгээд 27 хүнийг дэвшилтэт технологи ашиглан олж тогтоосон байна.

Шалгаж шийдвэрлэсэн онцлог хэргийн талаарх:

Өнгөрсөн 2023 оны 03 дугаар сарын 01-нд нэр бүхий иргэд бүлэглэн Хан-Уул дүүргийн 11 дүгээр хорооны нутаг дэвсгэрт байх нэр бүхий хотхонд иргэн Г-г хүч хэрэглэн  авчирч, тодорхой үйлдэл хийлгэх зорилгоор эрүүл мэнд, амь насанд хохирол учруулахаар заналхийлж, эрхшээлдээ байлгасан гэх хэрэгт иргэн “Н” нарын 6 этгээдийн үйлдэлд  Эрүүгийн хуулийн тусгай ангийн 13.3 дугаар зүйлийн 1, 17.6 дугаар зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татан, мөрдөн шалгах ажиллагааг явуулж энэ оны 08 дугаар сарын 28-ны өдөр тус хэргийг эрүүгийн 23100****** дугаартай хэрэгт нэгтгэх саналтай прокурорын байгууллагад шилжүүлсэн.

Нэр бүхий иргэд нь насанд хүрээгүй С-ийг хууран мэхэлж, эмзэг байдлыг нь далимдуулан насанд хүрээгүй болохыг мэдсээр байж Баянгол, Чингэлтэй дүүргийн нутаг дэвсгэрт 2023 оны 10 дугаар сараас 2024 оны 02 дугаар сар хүртэлх хугацаанд цахим орчинд зар байршуулан биеийг нь үнэлүүлэх хэлбэрээр хүн худалдаалах гэмт хэрэг үйлдсэн гэх хэрэгт иргэн М, Н нарын үйлдэлд Монгол улсын Эрүүгийн хуулийн 13.1 дүгээр зүйлийн 2 дахь хэсгийн 2.1, 12.5 дугаар зүйлийн 1 дэх хэсэг, 13.5 дугаар зүйлийн 1 дэх хэсэгт тус тус зааснаар энэ оны 08 дугаар сарын 28-ны өдөр Нийслэлийн прокурорын газраас эрүүгийн хэрэг үүсгэж яллагдагчаар татан мөрдөн шалгах ажиллагааг үргэлжлүүлэн явуулж байна.

Иргэн С нь Кибер орчинд 2021-2024 онуудад улс төрд сөрөг “PR” хийх чиглэлээр нэр бүхий фэйсбүүк хуудас болон бусад сошиал хаягуудыг ашиглан бусдын нэр, алдар хүндэд халдаж, илтэд худал мэдээлэл тараах, заналхийлэх, Монгол Улсын дотоод аюулгүй байдалд сөргөөр нөлөөлж болзошгүй хортой мэдээллийг түгээсэн гэх хэрэгт иргэн С-ийн үйлдэлд Монгол улсын Эрүүгийн хуулийн 13.14 дүгээр зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татан мөрдөн шалгах ажиллагаа явуулж, хэргийг шүүхэд шилжүүлэх саналтай энэ оны 08 дугаар сарын 26-ны өдөр прокурорын байгууллагад шилжүүлсэн.

Шалгаж шийдвэрлэсэн онцлог зөрчлийн талаарх:

Цахим орчинд нэр бүхий хаягаас энэ оны 08 дугаар сарын 26-ны өдөр "Хий ингэж хаазалж, чанга дугаргаад байгаа галзуунууддаа арга хэмжээг нь чанга аваад өгөөч" гэх гарчигтай мэдээллийг олон нийтийн сүлжээнд нийтэлсэн. Уг гэмт хэрэг, зөрчлийн шинжтэй үйлдэлд Баянзүрх дүүргийн замын цагдаагийн хэлтсээс зөрчил шалган шийдвэрлэх ажиллагаа явуулж иргэн “Б”-ын тээврийн хэрэгсэл жолоодох эрхгүй тээврийн хэрэгсэл жолоодсон үйлдэлд энэ оны 08 дугаар сарын 27-ны өдөр Зөрчлийн тухай хуулийн 14.7 дугаар зүйлийн 1 дэх хэсэгт зааснаар 400 нэгжээр торгох шийтгэл оногдуулж шийдвэрлэсэн. 

Энэ оны 08 дугаар сарын 26-ны өдөр цахим орчинд “Дөнгөж сая Нисэхийн тойрог дээр болсон BMW машины жолооч согтуугаар тээврийн хэрэгсэл жолоодож яваад зам тээврийн осол гаргасан” гэх мэдээллийг олон нийтийн сүлжээнд нийтэлсэн. Цахим орчинд нийтлэгдсэн гэмт хэрэг, зөрчлийн шинжтэй үйлдэлд Хан-Уул дүүргийн Замын цагдаагийн хэлтсээс зөрчил шалган шийдвэрлэх ажиллагаа явуулж иргэн “Б”-ийн согтуурсан үедээ тээврийн хэрэгсэл жолоодсон үйлдэлд 2024 оны 08 дугаар сарын 29-ний өдөр Хан-Уул дүүргийн Эрүүгийн хэргийн анхан шатны шүүхийн шүүгчийн шийтгэврээр жолоодох эрхийг 1 жилээр хасаж, 400 нэгжээр торгох шийтгэл оногдуулж, шийдвэрлэсэн.    

Нийтийн мэдээллийн ил тод байдлын тухай хуульд заасан мэдээлэл нээлттэй, ил тод, үнэн зөв байх, бодитой мэдээллээр хангах үндсэн зарчмын дагуу гэмт хэргийн мөрдөн шалгах ажиллагааны талаарх мэдээллийг Монгол Улсын Үндсэн хуулийн 16 дугаар зүйлийн 14 дэх заалт, Эрүүгийн хэрэг хянан шийдвэрлэх тухай хуулийн 29.3 дугаар зүйлийн 5 дахь хэсэгт заасныг чанд баримтлан товч байдлаар олон нийтэд мэдээлж байгаа болно.