Зөрчлийн хэрэг бүртгэх албанаас энэ оны эхний хагас жилийн тайлангийн хурлаа өнөөдөр /2024.07.04/ зохион байгууллаа. Тайлангийн хугацаанд цагдаагийн байгууллагад иргэн, хуулийн этгээдээс 129.966 гомдол, мэдээлэл ирүүлсний 85.550 буюу 65 хувь нь зөрчлийн шинжтэй гомдол байгаагаас 83.312 буюу 97.4 хувийг хуулийн хугацаанд шалгаж шийдвэрлэсэн байна.

Монгол Улсын Үндсэн хуулиар олгогдсон ард түмнийхээ сонгох, сонгогдох эрхийг бүрэн хангах, төр, иргэдийн эсрэг чиглэсэн олон нийтийн сүлжээн дэх хууль бус үйлдлүүдийг таслан зогсоох, урьдчилан сэргийлэх, хууль тогтоомж, эрх зүйн орчныг сайжруулах, зөрчил шалган шийдвэрлэх ажиллагаанд дэвшилтэт техник, технологийг нэвтрүүлж, үр дүнг дээшлүүлэх, иргэд, олон нийтийн оролцоог нэмэгдүүлэх, хүний нөөцийг бэлтгэх, мэдлэг, ур чадвар, чадавхыг сайжруулах чиглэлээр зохион байгуулалтын шинжтэй олон талт ажил, арга хэмжээг бодлогын түвшинд авч, хэрэгжүүлж байгааг тус албаны дарга, цагдаагийн хурандаа Э.Товуудорж тэмдэглэн хэлсэн юм.

Энэхүү тайлангийн хуралд Цагдаагийн ерөнхий газрын Дэд бөгөөд Нийслэлийн цагдаагийн газрын дарга, цагдаагийн хурандаа О.Ганбат оролцож, Зөрчил шалган шийдвэрлэх ажиллагаа явуулсан шийдвэрийг “Нийтийн мэдээллийн ил тод байдлын тухай хууль”-д заасны дагуу цахим хэлбэрээр хүн, хуулийн этгээдэд хүргэж, иргэдээс цагдаагийн байгууллага, алба хаагчийн үйл ажиллагаа, харилцаа, хандлагын талаар санал, асуулга авч, олон нийтийн санаа бодлыг үйл ажиллагаандаа тусган хэрэгжүүлсэн нь иргэдийн эрхийг хангах чиглэлээр авч буй оновчтой шинэлэг ажил, арга хэмжээ болсныг онцлон, бие бүрэлдэхүүнд ажлын амжилт хүслээ.