Цагдаагийн байгууллагаас өнгөрсөн долоо хоногт (2024.06.17-оос 06 дугаар сарын 21-ний өдрүүдэд) 38.357 хэрэгт мөрдөн шалгах ажиллагаа явуулж, шүүхэд шилжүүлэх саналтай прокурорын байгууллагад 588 хэргийг хүргүүлсэн байна. Үүнээс:

Хүний амьд явах эрхийн эсрэг 8, Хүний эрүүл мэндийн халдашгүй байдлын эсрэг 238, Хүний бэлгийн эрх чөлөө, халдашгүй байдлын эсрэг 24, Өмчлөх эрхийн эсрэг 207, Олон нийтийн аюулгүй байдал, ашиг сонирхлын эсрэг 6, Хүрээлэн байгаа орчны эсрэг 6, Хөдөлгөөний аюулгүй байдал, тээврийн хэрэгслийн ашиглалтын журмын эсрэг 85, бусад 14 хэрэг байна.

Зөрчлийн шинжтэй 58.513 үйлдэлд зөрчил шалган шийдвэрлэх ажиллагаа явуулж, 58.171 зөрчлийг шийдвэрлэсэн байна.

Нийт шийдвэрлэсэн зөрчлийн 57.500 зөрчлийг эрх бүхий албан тушаалтнаас буюу цагдаагийн алба хаагч шийдвэр гаргаж, 671 зөрчлийг шүүхээр шийдвэрлүүлсэн байна. Үүнээс:

Олон нийтийн газарт зүй бусаар биеэ авч явах 2572, Танхайрах 157, Хүний биед халдах 410, Гэр бүлийн хүчирхийлэлтэй тэмцэх тухай хууль зөрчих 190, Замын хөдөлгөөний аюулгүй байдлын тухай хууль зөрчих 51.922, бусад 2920 зөрчил байна.

Эдгээрээс хүүхдийн эрхийг зөрчсөн 82 иргэнд 24.600.000 төгрөгийн торгуулийн шийтгэл оногдуулж, удаа дараа гэр бүлийн хүчирхийлэл үйлдсэн 190 иргэнийг шүүхээр 7-30 хоног баривчлуулах саналыг хүргүүлж, шийдвэрлүүлжээ.

Цагдаагийн байгууллагаас өнгөрөгч 7 хоногт эрэн сурвалжлалтын чиглэлээр оргодол 25, гэмт хэрэгт сэрдэгдсэн этгээд 83, сураггүй алга болсон хүн 68, шүүхээс даалгасан хүн 101, зөрчил үйлдсэн этгээд 23 хүнийг дэвшилтэт технологи ашиглан олж тогтоосон байна. 

Шийдвэрлэсэн хэргээс дурдвал:

Нэр бүхий иргэд бүлэглэн гэмт хэрэг үйлдэхээр урьдчилан үгсэн тохиролцож энэ оны 02 дугаар сарын 25-аас 26-нд шилжих Хан-Уул дүүргийн 23 дугаар хорооны нутаг дэвсгэрт байх нэр бүхий хотхонд иргэн Б, С нарыг зэвсгийн чанартай зүйл ашиглан айлган сүрдүүлж, бие мах бодид нь хүч хэрэглэн, онц харгис хэрцгий аргаар тохуурхан доромжилсон, эд зүйлийг авсан гэх хэрэгт А, Б зэрэг нэр бүхий 7 иргэний хууль бус үйлдэлд энэ оны 02 сарын 27-ны өдөр Эрүүгийн хуулийн тусгай ангийн 11.6 дугаар зүйлийн 2 дахь хэсэг, 13.4 дүгээр зүйлийн 3 дахь хэсэг, 13.5 дугаар зүйлийн 2 дахь хэсэг, 17.2 дугаар зүйлийн 2.1 дэх хэсэгт тус тус зааснаар эрүүгийн хэрэг үүсгэн яллагдагчаар татан мөрдөн шалгах ажиллагаа явуулж энэ сарын 18-ны өдөр хэргийг шүүхэд шилжүүлэх саналтай прокурорын байгууллагад хүргүүлсэн.

Төв аймгийн Заамар сумын нутаг дэвсгэрт 2019 оны 07 дугаар сард иргэн П нь  тусгай зөвшөөрөлгүйгээр, техник ашиглан ашигт малтмал олборлож, 1.256.000 төгрөгийн экологи-эдийн засгийн хохирол учруулсан үйлдэлд Эрүүгийн хуулийн 24.2 дугаар зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татан, мөрдөн шалгах ажиллагааны явцад хохирлыг нөхөн төлүүлж, эрүүгийн хэргийг шүүхэд шилжүүлэх саналтай прокурорын байгууллагад шилжүүлсэн. 

Баян-Өлгий аймгийн Цэнгэл сумын нутаг дэвсгэрт байх Улсын тусгай хамгаалалттай газар нутгаас иргэн Ө нь энэ оны 05 дугаар сарын 24-ний өдөр зөвшөөрөлгүйгээр “Монгол хадран” загасыг агнаж, 240.000 төгрөгийн экологи-эдийн засгийн хохирол учруулсан үйлдэлд Эрүүгийн хуулийн 24.5 дугаар зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татан, мөрдөн шалгах ажиллагааны явцад хохирлыг нөхөн төлүүлж, эрүүгийн хэргийг шүүхэд шилжүүлэх саналтай прокурорын байгууллагад шилжүүлсэн. 

Архангай аймгийн Булган сумын нутаг дэвсгэрээс энэ оны 05 дугаар сарын 13-ны өдөр иргэн Э нь зөвшөөрөлгүйгээр “Шинэс” төрлийн мод бэлтгэн тээврийн хэрэгслээр тээвэрлэж, 547,000 төгрөгийн экологи-эдийн засгийн хохирол учруулсан үйлдэлд Эрүүгийн хуулийн 24.6 дугаар зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татан, мөрдөн шалгах ажиллагааны явцад хохирлыг нөхөн төлүүлж, эрүүгийн хэргийг шүүхэд шилжүүлэх саналтай прокурорын байгууллагад шилжүүлсэн. 

Завхан аймгийн Тосонцэнгэл сумын нутаг дэвсгэрт байх Улсын тусгай хамгаалалттай газар нутгийн ойгоос энэ оны 01 дүгээр сарын 07-15-ны өдрийн хооронд иргэн З нь бусадтай бүлэглэн, зохих зөвшөөрөлгүйгээр “Шинэс” төрлийн  мод бэлтгэн байгаль орчинд 4.643.392 төгрөгийн экологи-эдийн засгийн хохирол учруулсан үйлдэлд Эрүүгийн хуулийн 24.6 дугаар зүйлийн 2 дахь хэсгийн 2.3-д зааснаар эрүүгийн хэрэг үүсгэж, яллагдагчаар татан, хэргийг шүүхэд шилжүүлэх саналтай прокурорын байгууллагад шилжүүлсэн. 

Шалгаж шийдвэрлэсэн онцлог зөрчлийн талаарх:

Цахим орчинд энэ сарын 13-ны өдөр нэр бүхий цахим хэрэглэгчийн хаягаас “Завханд хүн дагуулж заналхийлэв... биед халдав” гэх гарчигтай видео мэдээлэл нийтлэгдсэн. Цахим орчинд нийтлэгдсэн гэмт хэрэг, зөрчлийн шинжтэй үйлдэлд Завхан аймгийн цагдаагийн газраас энэ оны 06 дугаар сарын 17-ны өдөр Зөрчлийн хэрэг нээн зөрчил шалган шийдвэрлэх ажиллагаа явуулж иргэн Ц-ийн Зөрчлийн тухай хуулийн 5.2 дугаар зүйл (Танхайрах)-үйлдэлд энэ оны 06 дугаар сарын 20-ны өдөр тус аймгийн сум дундын Эрүүгийн хэргийн анхан шатны шүүхийн шүүгчийн шийтгэврээр 100 нэгжээр торгох шийтгэл оногдуулж шийдвэрлэсэн.

Мөн цахим орчинд энэ сарын 13-ны өдөр нэр бүхий цахим хаягаас “Сэлэнгэ аймагт сурталчилгаагаа хийж яваад авто тээврийн цагдаад торгууллаа. ... ижил тэгш гараанаас сонгуульд өрсөлдөх боломж байхгүй байна” гэсэн гарчигтай видео мэдээлэл нийтлэгдсэн. Цахим орчинд нийтлэгдсэн гэмт хэрэг, зөрчлийн шинжтэй үйлдэлд Сэлэнгэ аймгийн Замын цагдаагийн хэлтсээс энэ сарын 19-ний өдөр зөрчил шалган шийдвэрлэх ажиллагаа явуулж Замын хөдөлгөөний аюулгүй байдлын тухай хуульд зааснаар хүн тээвэрлэх журам зөрчсөн иргэн “Б”-ийн үйлдэлд Зөрчлийн тухай хуулийн 14.7 дугаар зүйлийн 45 дахь хэсэгт зааснаар 50 нэгжээр торгох шийтгэл оногдуулж шийдвэрлэсэн.

Нийтийн мэдээллийн ил тод байдлын тухай хуульд заасан мэдээлэл нээлттэй, ил тод, үнэн зөв байх, бодитой мэдээллээр хангах үндсэн зарчмын дагуу гэмт хэргийн мөрдөн шалгах ажиллагааны талаарх мэдээллийг Монгол Улсын Үндсэн хуулийн 16 дугаар зүйлийн 14 дэх заалт, Эрүүгийн хэрэг хянан шийдвэрлэх тухай хуулийн 29.3 дугаар зүйлийн 5 дахь хэсэгт заасныг чанд баримтлан товч байдлаар олон нийтэд мэдээлж байгаа болно.