Цагдаагийн байгууллагаас өнгөрсөн долоо хоногт (2024.05.27-оос 06 дугаар сарын 02-ны өдрүүдэд) 39.102 хэрэгт мөрдөн шалгах ажиллагаа явуулж, шүүхэд шилжүүлэх саналтай прокурорын байгууллагад 781 хэргийг хүргүүлсэн байна. Үүнээс:

Хүний амьд явах эрхийн эсрэг 11, Хүний эрүүл мэндийн халдашгүй байдлын эсрэг 274, Хүний бэлгийн эрх чөлөө, халдашгүй байдлын эсрэг 21, Өмчлөх эрхийн эсрэг 345, Олон нийтийн аюулгүй байдал, ашиг сонирхлын эсрэг 9, Хүрээлэн байгаа орчны эсрэг 18, Хөдөлгөөний аюулгүй байдал, тээврийн хэрэгслийн ашиглалтын журмын эсрэг 79, бусад 24 хэрэг байна.

Зөрчлийн шинжтэй 62.350 үйлдэлд зөрчил шалган шийдвэрлэх ажиллагаа явуулж, 62.836 зөрчлийг шийдвэрлэсэн байна.

Нийт шийдвэрлэсэн зөрчлийн 61.096 зөрчлийг эрх бүхий албан тушаалтнаас буюу цагдаагийн алба хаагч шийдвэр гаргаж, 1740 зөрчлийг шүүхээр шийдвэрлүүлсэн байна. Үүнээс:

Олон нийтийн газарт зүй бусаар биеэ авч явах 3537, Танхайрах 245, Хүний биед халдах 434, Гэр бүлийн хүчирхийлэлтэй тэмцэх тухай хууль зөрчих 288, Замын хөдөлгөөний аюулгүй байдлын тухай хууль зөрчих 54.910, бусад 3422 зөрчил байна.

Эдгээрээс хүүхдийн эрхийг зөрчсөн 93 иргэнд 27.900.000 төгрөгийн торгуулийн шийтгэл оногдуулж, удаа дараа гэр бүлийн хүчирхийлэл үйлдсэн 288 иргэнийг шүүхээр 7-30 хоног баривчлуулах саналыг хүргүүлж, шийдвэрлүүлжээ.

Цагдаагийн байгууллагад өнгөрөгч 7 хоногт эрэн сурвалжлалтын чиглэлээр оргодол 71, гэмт хэрэгт сэрдэгдсэн этгээд 232, оршин суугаа газраасаа сураггүй алга болсон хүн 122, шүүхээс даалгасан хүн 134, зөрчил үйлдсэн этгээд 91 олж тогтоон ажилласан.

Шийдвэрлэсэн хэргээс дурдвал:

Нэр бүхий иргэд хамтран 2023 оны 05 дугаар сараас 08 дугаар сарыг хүртэл хугацаанд үргэлжилсэн үйлдлээр Сүхбаатар дүүргийн 3 дугаар хороо, Баянгол дүүргийн 3 дугаар хорооны нутаг дэвсгэрт “Х” нэртэй покерын клуб ажиллуулсан мөн 2023 оны 11 дүгээр сард Сонгинохайрхан дүүргийн 6 дугаар хорооны нутаг дэвсгэрт “М” нэртэй покерын клубт тус тус админаар ажиллаж, цахим орчинд мэдээллийн технологи ашиглан мөрийтэй тоглоом зохион байгуулсан гэх хэрэгт нэр бүхий 8 иргэний хууль бус үйлдэлд Эрүүгийн хуулийн 20.17 дугаар зүйлийн 1 дэх хэсэг, 18.6 дугаар зүйлийн 1 дэх хэсэгт тус тус зааснаар эрүүгийн хэрэг үүсгэн яллагдагчаар татан энэ оны 05 сарын 29-ний өдөр шүүхэд шилжүүлэх саналтай прокурорын байгууллагад хүргүүлсэн.

Булган аймгийн нутаг дэвсгэрт энэ оны нэгдүгээр улиралд зөвшөөрөлгүйгээр мод бэлтгэн 1.000.000-6.500.000 төгрөгийн экологи-эдийн засгийн хохирол учруулсан Л нарын нэр бүхий 3 иргэний хууль бус үйлдэлд Эрүүгийн хуулийн 24.6 дугаар зүйлийн 1 дэх хэсэгт зааснаар эрүүгийн хэрэг үүсгэн яллагдагчаар татан, мөрдөн шалгах ажиллагааны явцад хохирлыг нөхөн төлүүлж, шүүхэд шилжүүлсэн.

Шалгаж шийдвэрлэсэн онцлог зөрчлийн талаарх:

Энэ оны 05 дугаар сарын 23-ны өдөр цахим орчинд нэр бүхий хаягаас “Чиглэлийн тээврийн хэрэгслийн жолооч чадварлаг, соёлтой манлайлагч байх ёстой” гэсэн гарчигтай бичлэг нийтлэгдсэн. Цахим орчинд нийтлэгдсэн гэмт хэрэг, зөрчлийн шинжтэй мэдээллийг цагдаагийн байгууллагаас шалгаж 2024 оны 05 дугаар сарын 23-ны өдөр Баянзүрх дүүргийн 22 дугаар хорооны нутаг дэвсгэрт офицеруудын ордны автобусны буудал дээр нийтийн тээврийн нэр бүхий компанийн жолооч замын хөдөлгөөний дүрэмд зааснаар тээврийн хэрэгслийг замын зорчих хэсэг дээр түр, удаан зогсоох журам зөрчиж бусад тээврийн хэрэгслийн хөдөлгөөнд саад учруулсан болохыг тогтоон зөрчилд холбогдогч Д-д Зөрчлийн тухай хуулийн 14.7 дугаар зүйлийн 35.1 дэх хэсэгт зааснаар торгох шийтгэл оногдуулж шийдвэрлэсэн.

Нийтийн мэдээллийн ил тод байдлын тухай хуульд заасан мэдээлэл нээлттэй, ил тод, үнэн зөв байх, бодитой мэдээллээр хангах үндсэн зарчмын дагуу гэмт хэргийн мөрдөн шалгах ажиллагааны талаарх мэдээллийг Монгол Улсын Үндсэн хуулийн 16 дугаар зүйлийн 14 дэх заалт, Эрүүгийн хэрэг хянан шийдвэрлэх тухай хуулийн 29.3 дугаар зүйлийн 5 дахь хэсэгт заасныг чанд баримтлан товч байдлаар олон нийтэд мэдээлж байгаа болно.