Монгол Улсад “Генерал цол” бий болсны 80 жилийн ойг тохиолдуулан цагдаа, дотоодын цэргийн байгууллагаас олон талт ажил, арга хэмжээг төлөвлөсөн.

Үүний нэг нь Төрийн цаазын жинхэнэ зөвлөх, цагдаагийн анхны генерал “Содномбалжирын Бүдрагчаа-90 жил” сэдэвт эрдэм шинжилгээний хурал юм.

Ийнхүү өнөөдөр /2024.03.05/ С.Бүдрагчаа агсны 90 жилийн ойн эрдэм шинжилгээний хурал ёслол төгөлдөр болов.

Хуралд Цагдаагийн ерөнхий газрын дарга, Дотоодын цэргийн командлагч, цагдаагийн хурандаа Т.Сүхболд “Төрийн хууль цаазын жинхэнэ зөвлөх, хошууч генерал Содномбалжирын Бүдрагчаа Улсын цагдан сэргийлэх ерөнхий газрыг удирдсан нь”, Улсын ерөнхий прокурорын орлогч, төрийн хууль цаазын шадар зөвлөх М.Чинбат “Монгол Улсын прокурорын байгууллагын хөгжилд БНМАУ-ын прокурор Содномбалжирын Бүдрагчаагийн гүйцэтгэсэн түүхэн үүрэг” илтгэлийг хэлэлцүүлэв.

Мөн энэ үеэр Монгол Улсын анхны Ерөнхийлөгч П.Очирбат, Монгол Улсын Гавьяат хуульч Ц.Нямдорж, Улсын цагдан сэргийлэх ерөнхий газрын Боловсон хүчний хэлтсийн дарга, цагдаагийн хурандаа Ц.Доржготов, Ардын багш, Шинжлэх ухааны гавьяат зүтгэлтэн, доктор, профессор Б.Даш-Ёндон, “Монгол цэргийн нэгдсэн холбоо”-ны ерөнхий нарийн бичгийн дарга, Шинжлэх ухааны гавьяат зүтгэлтэн, доктор, профессор, дэслэгч генерал Ц.Тогоо нар хошууч генерал С.Бүдрагчаа агсныг дурсан үг хэлж, хүрэлцэн ирсэн хүндэт зочид, ар гэрийнхэнд хүндэтгэл үзүүллээ.