Холбооны Бүгд Найрамдах Герман Улсын Бавари мужийн цагдаагийн байгууллагын төлөөлөл, Цагдаагийн ерөнхий газрын төлөөлөл оролцсон хамтарсан хэлэлцүүлгийг өнөөдөр /2023.10.27/ зохион байгууллаа.

Энэхүү хэлэлцүүлгээр тус улсын гэмт хэрэгтэй тэмцэх арга, ололттой тал, шинэ техник технологи, инновацын шийдэл, хоёр улсын цагдаагийн байгууллагын үйл ажиллагааны талаар харилцан туршлага солилцлоо.

Хэлэлцүүлэгт Цагдаагийн ерөнхий газрын Дэд дарга, цагдаагийн хурандаа П.Оростогоо, Бавари мужийн Төрийн албаны хэрэглээний шинжлэх ухааны сургуулийн Нийгмийн шинжлэх ухааны тэнхимийн дэд захирал, доктор, тэргүүн комиссар Себастиан Аллерцедер нарын зочид, төлөөлөгч, алба хаагчид болон Хансс-Зайделийн сангийн Монгол дахь Төлөөлөгчийн газрын төлөөлөл тус тус оролцлоо.

Тус улсын цагдаагийн байгууллагын төлөөлөгчид энэ оны 10 дугаар сарын 23-наас 27-ны өдрүүдэд Цагдаагийн ерөнхий газар, Нийслэлийн цагдаагийн удирдах газар, Хар тамхитай тэмцэх газар, Экологийн цагдаагийн алба, Цагдаа, дотоодын цэргийн сургалтын нэгдсэн төв зэрэг газруудын үйл ажиллагаатай танилцсан ба айлчлалын үр дүнд хоёр талын хамтын ажиллагааг үе шаттай нэмэгдүүлэхээр тохиролцжээ.