Энэ долоо хоногт Цагдаа, дотоодын цэргийн байгууллагаас зохион байгуулсан иргэд, олон нийтэд чиглэсэн ОНЦЛОХ үйл явдлыг тоймлон хүргэж байна.

“ЭРҮҮ ШҮҮЛТЭЭС УРЬДЧИЛАН СЭРГИЙЛЭХ НЬ” СЭДЭВТ УУЛЗАЛТ ХЭЛЭЛЦҮҮЛЭГ БОЛЛОО

Цагдаагийн байгууллагаас Чингэлтэй дүүргийн прокурорын газар, Хүний эрхийн үндэсний комисстой хамтран “Эрүү шүүлтээс урьдчилан сэргийлэх нь” сэдэвт хэлэлцүүлгийг /2023.03.14/ Мөрдөн байцаах албаны хурлын зааланд зохион байгууллаа. Тус хэлэлцүүлгийг зохион байгуулснаар эрүү шүүлт тулгах, хүнлэг бус харьцаа ялгаварлан гадуурхалтаас ангид байх, хүний эрхийг хамгаалах, Эрүүгийн хуулийн тусгай ангид заасан Эрүү шүүлт тулгах, Хууль бусаар баривчлах, саатуулах гэмт хэрэгтэй тэмцэх, урьдчилан сэргийлэх мэдлэг олгох, цагдаа, дотоодын цэргийн алба хаагчдыг гэмт хэрэг, эрх зүйн болон дотоод албаны дүрэм, журмаар зохицуулагдах зөрчлөөс урьдчилан сэргийлэх, үүрэг гүйцэтгэлийг чадавхжуулах ач холбогдолтой юм.

СОГТУУРУУЛАХ УНДАА ХЭТРҮҮЛЭН ХЭРЭГЛЭЖ БИЕЭ АВЧ ЯВАХ ЧАДВАРГҮЙ ИРГЭНД ҮЗҮҮЛЭХ ТУСЛАМЖ ҮЙЛЧИЛГЭЭГ САЙЖРУУЛАХ НЬ СЭДЭВТ ХЭЛЭЛЦҮҮЛЭГ ЗОХИОН БАЙГУУЛЛАА

Нийслэлийн цагдаагийн удирдах газраас “Согтууруулах ундаа хэтрүүлэн хэрэглэж биеэ авч явах чадваргүй иргэнд үзүүлэх тусламж үйлчилгээг сайжруулах нь” сэдэвт хэлэлцүүлгийг /2023.03.15/ зохион байгууллаа. Хэлэлцүүлэгт Хууль зүй, дотоод хэргийн яам, Эрүүл мэндийн яам, Хүний эрхийн үндэсний комиссын Эрүү шүүлтээс урьдчилан сэргийлэх хэлтэс, Гэмтэл согог судлалын үндэсний төв, Гэмтэл согог судлалын үндэсний төвийн харьяа Түлэгдлийн төв, Нийслэлийн эрүүл мэндийн газар болон Нийтийн хэв журам хамгаалах, олон нийтийн аюулгүй байдлыг хангах алба, нийслэлийн 6 дүүрэг 21 аймгийн цагдаагийн газар, хэлтсийн алба хаагчид танхимаар болон цахимаар оролцлоо. Хэлэлцүүлгээр согтууруулах ундаа хэтрүүлэн хэрэглэж биеэ авч явах чадваргүй болсон иргэний амь нас, эрүүл мэндийг хэрхэн хамгаалах, гэмт хэрэг, зөрчилд өртөж хохирохоос урьдчилан сэргийлэх, тэдэнд эрүүл мэндийн тусламж үйлчилгээг шуурхай үзүүлэх, цагдаагийн байгууллагаас эрүүл мэндийн байгууллагатай хамтарч ажиллахад анхаарах асуудал зэрэг асуудлыг хөндөж санал солилцлоо.  Цаашид хэлэлцүүлгээс гарсан санал, зөвлөмжийг үйл ажиллагаандаа хэрэгжүүлж ажиллах юм.

ХУРАНДАА ЦОЛ ОЛГОВ

Монгол Улсад орчин цагийн Зэвсэгт хүчин үүсэн байгуулагдсаны 102 жил, “Монгол цэргийн өдөр”-ийг тохиолдуулан Зэвсэгт хүчний Жанжин штабын даргын тушаалаар Дотоодын цэргийн штабын дэд бөгөөд, ажиллагааны удирдлагын газрын дарга, дэд хурандаа Н.Мөнх-Итгэл, Дотоодын цэргийн 809 дүгээр тусгай салбарын захирагч цагдаагийн хурандаа Ж.Батцагаан нарт хурандаа цол олголоо. Хурандаа цолоор шагнагдсан алба хаагчдадаа баяр хүргэж, цаашдынх нь ажилд амжилт хүсье.

“ЗАСГИЙН ГАЗРЫН ХҮНИЙ НӨӨЦИЙН БОДЛОГЫГ ДЭМЖИХ СИСТЕМ”-ИЙГ ХӨГЖҮҮЛЖ, ХОЛБОГДОХ БУСАД СИСТЕМТЭЙ УЯЛДУУЛАН НЭВТРҮҮЛЭХ АРГА ХЭМЖЭЭ АВАХ “АЖЛЫН ХЭСЭГ”-ИЙН ГИШҮҮД УУЛЗАЛТ ЗОХИОН БАЙГУУЛЛАА

Монгол Улсын Ерөнхий сайдын 2023 оны 35 дугаар захирамжаар байгуулагдсан “Засгийн газрын хүний нөөцийн бодлогыг дэмжих систем”-ийг хөгжүүлж, холбогдох бусад системтэй уялдуулан нэвтрүүлэх арга хэмжээ авах “Ажлын хэсэг”-ийн гишүүдийг Цагдаагийн ерөнхий газрын удирдлагуудаас хүлээн авч, уулзалт зохион байгууллаа.

Энэхүү уулзалтад Цагдаагийн ерөнхий газрыг төлөөлж Тэргүүн дэд дарга, бригадын генерал Ц.Ням-Очир, Дэд дарга, цагдаагийн хурандаа П.Оростогоо, Дэд бөгөөд Нийслэлийн цагдаагийн удирдах газрын дарга, цагдаагийн хурандаа О.Ганбат, Захиргааны удирдлагын газрын дарга, цагдаагийн хурандаа Л.Нямдаваа, Мэдээлэл, дүн шинжилгээ, шуурхай удирдлагын албаны Мэдээллийн технологи, холбооны төвийн дарга, цагдаагийн хурандаа Э.Идэрцог;

Ажлын хэсгийг төлөөлж Засгийн газрын Хэрэг эрхлэх газрын Засгийн газрын хүний нөөцийн газрын удирдлагын систем хөгжүүлэлтийн хэлтсийн даргын албан үүргийг түр орлон гүйцэтгэгч С.Алтангэрэл, мөн газрын Нөөцийн судалгаа, шинжилгээний газрын Засгийн газрын референт Д.Мөнх-Өнөр болон Мэдээллийн технологийн зөвлөх үйлчилгээ үзүүлэгч, гүйцэтгэх багийн гишүүд оролцсон юм.

Ажлын хэсгийн уулзалтаар “Засгийн газрын хүний нөөцийн бодлогыг дэмжих систем”-ын хөгжүүлэх, нэвтрүүлэх хэрэгцээ, шаардлага, үр дүнгийн талаар, Цагдаагийн байгууллагаас уг системд холбох боломжтой мэдээллийн сан, эрх зүйн орчны талаар тус тус мэдээлэл өгч, харилцан санал солилцлоо.

ҮНДЭСНИЙ АЮУЛГҮЙ БАЙДЛЫГ ХАНГАХ ТУСГАЙЛСАН ЧИГ ҮҮРЭГ БҮХИЙ БАЙГУУЛЛАГУУДЫН ДУНД ЗОХИОН БАЙГУУЛСАН СПОРТЫН БОЛОН МАРШ ТАКТИКИЙН ТЭМЦЭЭНД АМЖИЛТТАЙ ОРОЛЦЛОО

Завхан аймаг үүсэн байгуулагдсаны 100 жил, Зэвсэгт хүчний 102 жилийн ой, Монгол цэргийн өдөрт зориулан Үндэсний аюулгүй байдлыг хангах тусгайлсан чиг үүрэг бүхий байгууллагуудын дунд зохион байгуулсан спортын болон марш тактикийн тэмцээн амжилттай болж өндөрлөлөө.

Тус тэмцээний спортын төрөлд нийт 13 байгууллагын 500 гаруй тамирчид 68 багц медалийн төлөө хурд хүч, оюун ухаан, авхаалж самбаагаа дайчлан оролцож Завхан аймгийн цагдаагийн газрын баг тамирчид 7 төрөлд 12 багц медаль авч нийлбэр дүнгээр "ДЭД" байранд шалгарч, Марш тактикийн тэмцээнд ганцаарчилсан төрөлд цагдаагийн дэслэгч Б.Пүрэвдорж гутгаар байранд, багийн төрөлд "ЦАГААН ШОНХОР-1" баг гутгаар байрт тус тус шалгарлаа.