Цагдаагийн ерөнхий газрын Дэд бөгөөд Нийслэлийн цагдаагийн Удирдах газрын даргын урилгаар Бүгд Найрамдах Солонгос улсын Тэгү хотын цагдаагийн газрын дарга, дэд комиссар Ким Нам Хён албаны зочид, төлөөлөгчдийн хамт энэ оны 09 дүгээр сарын 19-нөөс 22-ны өдрүүдэд албан ёсны айлчлал хийж байна.

Энэхүү айлчлалын хүрээнд Нийслэлийн цагдаагийн Удирдах газар, Бүгд Найрамдах Солонгос улсын Тэгү хотын цагдаагийн газар хоёр улсад оршин суугаа иргэд, аж ахуйн нэгж, байгууллагууд үндэстэн дамнасан гэмт хэрэг, зөрчилд холбогдохоос урьдчилан сэргийлэх, мэдээлэл солилцох чиглэлээр хамтран ажиллах, харилцан ойлголцлын санамж бичгийг байгуулав.

“Бүгд Найрамдах Солонгос Улсын Тэгү хотын цагдаагийн газартай хамтран ажиллах санамж бичиг” байгуулах үйл ажиллагаа өнөөдөр /2022.09.20/ Нийслэлийн цагдаагийн удирдах газарт болж, Цагдаагийн ерөнхий газрын Дэд бөгөөд Нийслэлийн цагдаагийн удирдах газрын дарга, бригадын генерал Р.Отгонжаргал болон албан хаагчид оролцлоо.

Дээрх санамж бичгийн хүрээнд хоёр талын цагдаагийн алба хаагчдыг кибер болон мөнгө угаах төрлийн үндэстэн дамнасан гэмт хэрэг, зөрчлийг илрүүлэх чиглэлээр мэргэшүүлэх сургалтанд хамруулах, харилцан туршлага судлах, мэдээ, мэдээлэл солилцох, шинэ техник, технологийг ашиглах, үйл ажиллагаандаа нэвтрүүлэх зэргээр харилцан хамтран ажиллахаар төлөвлөж байгаа юм.