Энэ долоо хоногт Цагдаа, дотоодын цэргийн байгууллагад болж өнгөрсөн ОНЦЛОХ үйл явдлыг тоймлон хүргэж байна.

ЦАГДААГИЙН АЛБА ХААГЧИД УСАНД ОСОЛДОЖ БАЙСАН ИРГЭНИЙ АМИЙГ АВАРЧЭЭ

Ажил үүргээ гүйцэтгэж явсан цагдаагийн хоёр алба хаагч Хэрлэн голд живж байсан иргэний амь насыг аварчээ.

Тодруулбал энэ оны 07-р сарын 25-ны өдрийн 12 цагийн орчимд Хэнтий аймаг дахь цагдаагийн газрын Бор-Өндөр сумын сум дундын цагдаагийн хэлтсийн Нийтийн хэв журам хамгаалах хэсгийн хамгаалалтын цагдаа, цагдаагийн дэд ахлагч Н.Анхбаяр, жижүүрийн цагдаа, цагдаагийн дэд ахлагч Д.Энхбат нар "Их хурд-9" наадмын хамгаалалтад үүрэг гүйцэтгэн буцах үедээ Сүхбаатар аймгийн Мөнххаан сумын иргэн Т - г "Хэрлэн" голд хөл алдан живж байсныг нь харж шуурхай ажиллан уснаас гаргаж анхны тусламж үзүүлжээ. 

Тэд гол орчмоор явж байх үеэр хүний орилох дуу сонсогдсоноор ийнхүү очиж гол руу орж тухайн иргэнийг татаж гаргасан байна.

Өргөсөн тангарагтаа үнэнч байж өөрийн амь насаа үл хайрлан эрдэнэт хүний амь насыг аварсан цагдаагийн алба хаагч Н.Анхбаяр, Д.Энхбат нартаа цаашдынх нь ажилд амжилт хүсье.

ЦАГДААГИЙН ДЭЛХИЙН АВАРГА ШАЛГАРУУЛАХ ТЭМЦЭЭНД АЛБА ХААГЧИД АМЖИЛТТАЙ ОРОЛЦОЖ БАЙНА

Цагдаагийн дэлхийн аварга шалгаруулах “Роттердам-2022” тэмцээн Голландын Роттердам хотноо энэ оны 07 дугаар сарын 22-30-ны хооронд зохион байгуулагдаж байна.

Тус тэмцээнд 5 тивийн 70 гаруй орны 10 мянга гаруй тамирчин цагдаа нар спортын 63 төрлөөр хурд хүч, авхаалж самбаагаа сорин өрсөлдөж байгаа юм.

“World police & Fire games” тэмцээнээс Монгол Улсын баг 5 алт, 3 мөнгө, 2 хүрэл медаль хүртээд байна. Тодруулбал, уг тэмцээнд оролцож буй нийслэлийн Сонгинохайрхан дүүргийн Цагдаагийн газрын дарга, цагдаагийн хурандаа Х.Ууганбаяр чөлөөт бөхийн барилдаанд алт, цагдаагийн дэслэгч У.Далайцэрэн жюү жицүд мөн алт, чөлөөт бөхөд мөнгө, цагдаагийн ахлах дэслэгч Н.Баярмөнх жюү жицү болон чөлөөт бөхөд алт, цагдаагийн дэд хурандаа Түмэнжарал хүрэл медаль, цагдаагийн ахлах ахлагч Э.Мөнхдөл хэвтээ шахалтын төрөлд хүрэл медаль тус тус хүртжээ.

МОНГОЛ УЛС ФАТФ-ЫН "ЗӨВЛӨМЖ 15"-ЫН ҮНЭЛГЭЭГ АХИУЛСАН ХУРАЛД ЦАГДААГИЙН БАЙГУУЛЛАГЫН ТӨЛӨӨЛӨЛ ОРОЛЦЛОО

Ази, Номхон далайн мөнгө угаахтай тэмцэх бүлгийн 25 дахь удаагийн уулзалт 2022 оны долдугаар сарын 24-28-ны өдрүүдэд Малайз улсын Куала Лумпур хотноо болж өндөрлөсөн.

Тус хуралд Хууль зүй, дотоод хэргийн дэд сайд Б.Солонгоогоор ахлуулсан ажлын хэсгийн баг Монгол Улсыг төлөөлөн оролцлоо.

Хурлын  4 дэх өдөр буюу долдугаар сарын 27-нд Ази, Номхон далайн мөнгө угаахтай тэмцэх бүлгээс Монгол Улсын Явцын тайланг хэлэлцүүлж, “хагас хэрэгжүүлсэн” үнэлгээтэй байсан “Шинэ технологи”-той холбоотой ФАТФ-ын Зөвлөмж 15-ыг “дийлэнхийг хэрэгжүүлсэн” болгож үнэлгээг амжилттай ахиулсан байна.

"Зөвлөмж 15"-ын үнэлгээ баталгаажсанаар Монгол Улс ФАТФ-ын нийт 40 Зөвлөмжөөс 39 Зөвлөмжийг техник зөвлөмжийн хувьд бүрэн болон дийлэнхийг хэрэгжүүлсэн үнэлгээтэй болгож, Виртуал хөрөнгийн үйлчилгээ үзүүлэгчдэд зохистой зохицуулалт, мөнгө угаах болон терроризмыг санхүүжүүлэхтэй тэмцэх, санхүүгийн гэмт хэргээс урьдчилан сэргийлэх чиглэлээр ФАТФ-ын шаардлага, олон улсын стандартыг нэвтрүүлэн ахиц гаргасныг Ази, Номхон далайн мөнгө угаахтай тэмцэх бүлгээс онцоллоо.

“ОЮУТАН ЦАГДАА-2022” ХӨТӨЛБӨРИЙГ ЗОХИОН БАЙГУУЛАГДАЖ БАЙНА

Цагдаагийн байгууллагаас төрийн болон төрийн бус байгууллагуудтай хамтран “Жуулчдыг гэмт хэрэг, зөрчлөөс урьдчилан сэргийлэх, тэдэнтэй холбоотой үйлдэгдсэн гэмт хэрэг, зөрчлийг шуурхай шийдвэрлэх” зорилтыг хэрэгжүүлэх ажлын хүрээнд “Оюутан цагдаа-2022” хөтөлбөрийг энэ оны 06 дугаар сарын 20-ны өдрөөс 08 дугаар сарын 10-ны өдрийг хүртэл хэрэгжүүлэн ажиллаж байна.

Нийслэл хотын хэмжээнд гудамж талбай, олон нийтийн газруудад нийт 150 оюутан “Оюутан цагдаа” нар энэ сард үүрэг гүйцэтгэх хугацаандаа гэмт хэргийн 91, зөрчлийн шинжтэй 412 дуудлага, мэдээлэл, 14 гэмт хэрэг, 164 зөрчлийг илрүүлэн нутаг дэвсгэрийн цагдаагийн байгууллагад өгч, дотоодын 16989, гадаадын 2171 иргэдэд хэлмэрчлэн, туслалцаа үзүүлж, 36296 ширхэг гэмт хэрэг, зөрчлөөс урьдчилан сэргийлэх зурагт хуудас, сэрэмжлүүлэг тарааж, эцэг, эх асран хамгаалагчаасаа төөрсөн бага насны 83 хүүхдийг ар гэр, асран хамгаалагчид нь хүлээлгэн өгсөн байна. 

“НЭГДСЭН ЭРГҮҮЛ-ХЯНАЛТ ШАЛГАЛТ” ХЭСЭГЧИЛСЭН АРГА ХЭМЖЭЭ ЗОХИОН БАЙГУУЛЛАА

Баянхонгор аймаг дахь цагдаагийн газраас Баянхонгор сумын нутаг дэвсгэрт нийтийн хэв журам хамгаалах, замын хөдөлгөөний аюулгүй байдлыг хангах чиглэлээр нэгдсэн эргүүл, хяналт шалгалтыг зохион байгуулж ажиллалаа. Арга хэмжээний хүрээнд 56 алба хаагч ажиллаж, холбогдох хуулийн хэрэгжилтийг хангах чиглэлээр архи согтууруулах ундаа худалдан борлуулдаг, түүгээр үйлчилдэг 75 аж ахуй нэгжийг шалгаж, согтуугаар тээврийн хэрэгсэл жолоодсон 16, эрхийн үнэмлэхгүй тээврийн хэрэгсэл жолоодсон 7, зориулалтын бус газарт архидан согтуурсан 3 зөрчлийг илрүүлэн, архи, согтууруулах ундаа хэтрүүлэн хэрэглэж, биеэ авч явах чадваргүй болсон 15 иргэнийг ар гэрт нь хүлээлгэн өгч, эрэн сурвалжлагдаж байсан 2 этгээдийг олж тогтоон 196 зөрчилд хуулийн хариуцлага хүлээлгэж ажиллалаа.

Иргэд та бүхэн баяр наадмын өдрүүдэд өөрийн болон бусдын аюулгүй байдлыг хангаж, хууль зөрчсөн аливаа үйлдэл гаргахгүй байж болзошгүй эрсдэлээс урьдчилан сэргийлнэ үү.