Энэ долоо хоногт цагдаа, дотоодын цэргийн байгууллагад болж өрнөсөн “ОНЦЛОХ” үйл явдлыг тоймлон хүргэж байна.

ХУУЛЬ ЗҮЙ, ДОТООД ХЭРГИЙН САЙД Х.НЯМБААТАР ТӨВ АЙМАГ ДАХЬ ЦАГДААГИЙН ГАЗРЫН ҮЙЛ АЖИЛЛАГААТАЙ ТАНИЛЦЛАА

Төв аймгийн ЗДТГ-ын Хууль, эрх зүйн хэлтэс, Гэмт хэргээс урьдчилан сэргийлэх ажлыг зохицуулах салбар зөвлөл хамтран “Нутгийн удирдлагын байгууллага болон хууль сахиулах байгууллагуудын хамтын ажиллагаа” сэдэвт зөвлөлдөх уулзалт өнөөдөр /2022.05.06/ зохион байгуулагдлаа.

Уулзалтын үеэр Хууль зүй, дотоод хэргийн сайд Х.Нямбаатар Төв аймаг дахь цагдаагийн газрын үйл ажиллагаатай танилцаж, Цагдаагийн ерөнхий газрын дарга, дотоодын цэргийн командлагч, хошууч генерал Ж.Болд алба хаагчидтай уулзалт зохион байгуулж, тулгамдаж буй асуудлын талаар алба хаагчдын санал, хүсэлтийг сонссон юм.

БАЙГАЛИА БҮТЭЭЕ” НЭГДСЭН АРГА ХЭМЖЭЭ ЗОХИОН БАЙГУУЛЖ БАЙНА

Цагдаагийн байгууллагаас иргэд, олон нийтэд хүрээлэн байгаа орчны эсрэг гэмт хэргээс урьдчилан сэргийлэх мэдээ, мэдээллийг хүргэх, хууль эрх зүйн мэдлэг олгох, энэ төрлийн гэмт хэрэгтэй тэмцэх ажилд иргэд, олон нийт, төрийн болон төрийн бус байгууллагуудыг татан оролцуулах зорилгоор “Байгалиа бүтээе” нэгдсэн арга хэмжээг энэ оны 05 дугаар сарын 01-ний өдрөөс эхлэн зохион байгуулж байна.

“ЗАМЫН ХӨДӨЛГӨӨНИЙ ЦАГААН ТОЛГОЙ-2022” ТЭМЦЭЭН ЗОХИОН БАЙГУУЛЖ БАЙНА

Сургуулийн өмнөх насны хүүхэд багачуудыг осол гэмтлээс урьдчилан сэргийлэх, замын хөдөлгөөний мэдлэг дадлага олгох, замын хөдөлгөөний аюулгүй байдлын тухай хууль тогтоомжийг сурталчлах, эцэг эх, асран хамгаалагчдын үүрэг, оролцоог нэмэгдүүлэх, “Бага насны хүүхдэд замын хөдөлгөөнд аюулгүй оролцуулах дадлыг зөв хэвшүүлэх, зорилгоор улсын хэмжээнд “Замын хөдөлгөөний цагаан толгой-2022” тэмцээнийг зохион байгуулж байна. Тус тэмцээн нь хүүхдийг зам тээврийн ослоос урьдчилан сэргийлэх олон талт ажлын нэг юм.

ПРАКТИК СУРГАЛТ ЗОХИОН БАЙГУУЛЛАА

Увс аймаг дахь цагдаагийн газраас аймгийн Прокурорын газар, Шүүхийн шинжилгээний алба, Хилийн цэргийн 0245-р ангитай хамтран мөрдөгч, эрх бүхий албан тушаалтан, прокурорын хууль хэрэглээний чадварыг сайжруулах, мөрдөн шалгах ажиллагааны чанар, үр дүнг ахиулах, алба хаагчдын багаар ажиллах чадвар, мэдлэг, мэргэшлийг дээшлүүлэх зорилгоор “Хил дамнан үйлдэгдсэн мал хулгайлах гэмт хэрэгт хойшлуулшгүй ажиллагаа явуулах нь” сэдэвт практик сургалтыг 2 үе шаттай зохион байгууллаа.

1 дүгээр шатанд Увс аймгийн Сагил сумын нутаг дэвсгэрт байрлах Хилийн цэргийн 0228-р салбарын байршилд хамтран зохион байгуулагч байгууллагуудын алба хаагчдаас бүрдсэн 2 багийг оролцуулан бодит кейс, өгөгдөл өгч практик сургалт,

2 дугаар шатанд хэргийн газарт хойшлуулшгүй ажиллагаа явуулах үед гарсан алдаа дутагдал, хүндрэл бэрхшээл, түүнийг шийдвэрлэх арга замын талаар тодорхойлох танхимын хэлэлцүүлэг зохион байгуулсан юм.

"АЛТАЙ ХОТЫН УС ХАНГАМЖИЙН ЭХ ҮҮСВЭРИЙН БАРИЛГА БАЙГУУЛАМЖ"-ИЙГ ДОТООДЫН ЦЭРГИЙН ХАМГААЛАЛТАД ХҮЛЭЭН АВЛАА

Монгол Улсын Засгийн газрын 2022 оны 129 дүгээр тогтоолын дагуу "Алтай хотын ус хангамжийн эх үүсвэрийн барилга байгууламж"-ийг дотоодын цэргийн хамгаалалтад хүлээн авах ёслолын үйл ажиллагаа "Ундарга-Алтай" ААТҮГ-ын ус цэвэршүүлэх үйлдвэрийн газрын байршилд зохион байгуулагдлаа.

АЛБА ХААГЧДАД СЭТГЭЛ ЗҮЙН ЭРҮҮЛ МЭНД, ХҮҮХЭД ХҮМҮҮЖЛИЙН ЭЕРЭГ АРГА БАРИЛ, ГЭР БҮЛИЙН ҮНЭ ЦЭНЭ СЭДЭВТ СУРГАЛТ ЗОХИОН БАЙГУУЛЛАА

Орхон аймаг дахь цагдаагийн газар нь 2011 оноос эхлэн сэтгэл зүйн чиглэлээр үйл ажиллагаа явуулж буй “Optimal n Max”-ийн сэтгэл судлаач Г.Мандухайгаар ахлуулсан сэтгэл зүйн багийг урьж, тус аймаг дахь цагдаагийн газрын алба хаагчдад сэтгэл зүйн эрүүл мэнд, хүүхэд хүмүүжлийн эерэг арга барил, гэр бүлийн үнэ цэнэ, сэтгэл хөдлөлийн ур чадвар түүнийг ойлгож удирдах, бусадтай үр дүнтэй, урт хугацааны хамтын ажиллагаа бий болгох зэрэг сэдвүүдээр харилцан ярилцаж сургалтыг амжилттай зохион байгууллаа.