Дархан-Уул аймгийн гэмт хэрэг, зөрчлийн нөхцөл байдал, Цагдаагийн газрын албаны үйл ажиллагаатай холбоотой Дархан-Уул аймаг дахь цагдаагийн газрын Захиргааны удирдлагын тасгийн дарга, цагдаагийн дэд хурандаа Э.Мөнхзолбоотой ярилцлаа.

Юуны өмнө Дархан-Уул аймагт Цагдаагийн газар үүсэж хөгжсөний 60 жилийн ойн мэндийг хүргье. Байгууллагынхаа түүхээс бидэнд товч танилцуулаач?

Баярлалаа. Та бүхэнд энэ өдрийн мэнд хүргэе! Тус аймаг дахь цагдаагийн газар нь анх Бүгд Найрамдах Монгол Ард Улсын сайд нарын зөвлөлийн 1962 оны 05 дугаар сарын 22-ны өдрийн “Дарханд Цагдан сэргийлэх анги байгуулах тухай” 278 дугаар тогтоолыг үндэслэн, Нийгмийг Аюулаас Хамгаалах Яамны сайдын 1962 оны 05 дугаар сарын 31-ний өдрийн 297 дугаар тушаал батлагдаж, мөн оныхоо 06 дугаар сарын 01-ний өдөр байгуулагдсан түүхтэй.

Түүхийн явцад цагдаагийн байгууллагын бүтэц, зохион байгуулалттай холбоотой тус цагдаагийн газрын бүтэц, орон тоо шинэчлэгдэн батлагдсаар өнөөдрийн байдлаар Цагдаагийн газар, Дотоодын цэргийн тусгай салбарын бие бүрэлдэхүүн үүрэг гүйцэтгэж байна.

Тус Цагдаагийн газарт Дотоодын цэргийн тусгай салбар харьяалагддаг юм байна шүү дээ. Энэ онд Дотоодын цэргийн байгууллагын түүхт 100 жилийн ой тохиож байгаа. Мөн тус газрын 60 жилийн ой тохиож байна. Ойн хүрээнд хийж буй ажлуудаасаа дурьдвал?

Тиймээ. Энэ онд Монгол Улсад орчин цагийн Дотоодын цэрэг үүсэж хөгжсөний түүхт 100 жил, Дархан-Уул аймаг дахь цагдаагийн газрын 60 жилийн ой тохиож байна.

Дотоодын цэргийн 822 дугаар тусгай салбар нь Улсын онц чухал объект болох Дархан-Уул аймгийн Цэвэр усны эх үүсвэрийн хамгаалалт болон “Монголын үндэсний дата төвийн нөөц төв”-ийн аюулгүй байдлыг хангах үндсэн чиг үүргийг харуулчны хүч хэрэгслээр зохион байгуулж ажиллаж байна. Анх 1965 оны 3 дугаар сард 2 дугаар өргөгч станц, Хараа голын худгууд Монгол Улсад шилжин ирснээр Цагдан сэргийлэх ангийн ус сувгийг хамгаалах салаа байгуулагдсан.

Ойн хүрээнд алба хаагчдын чөлөөт цагийг зөв боловсон өнгөрүүлэх, хөдөлгөөний дутагдал, ажлын ачаалал, стресс ядаргаанаас урьдчилан сэргийлэх, бие бялдрыг хөгжүүлэх зорилгоор Цагдаагийн газрын спорт заалны засварын ажлыг хийж гүйцэтгэн ашиглалтад орууллаа.

Алба хаагчдын ажиллах нөхцөлийг сайжруулж тохилог орчныг бүрдүүлж өвлийн улиралд дулаан алдагдахаас урьдчилан сэргийлж байрны дотор талыг бүхэлд нь акустик хавтангаар дулаалж янзалсан. Мөн эрүүлжүүлэх, саатуулах байрны орчин нөхцөлийг сайжруулах стандартад нийцүүлэх зорилгоор Винтлятор суурилуулах ажлыг хийж гүйцэтгээд байна.

 Байгууллагын хамгийн чухал хүчин зүйл бол алба хаагчид байдаг. Алба хаагчдаа хөгжүүлэх, нийгмийн баталгааг хангах чиглэлээр ямар бодлого барьж ажиллаж байна вэ?

Цагдаагийн газрын 60 жилийн ойг угтан алба хаагчдын ажлын алжаал ядаргааг тайлах, стрессийн түвшинг бууруулах, сэтгэл түгшилтийг намжаах, нойрны хямралаас урьдчилан сэргийлэх, амраах, тайвшруулах, сэтгэл зүйн тусламж үйлчилгээний чанар үр нөлөө, хүртээмжийг дээшлүүлэх мөн гэр бүлийн хүчирхийлэл, бэлгийн хүчирхийлэлд өртсөн хохирогчдод сэтгэл зүйн тусламж үйлчилгээг үзүүлэх зорилгоор тус Цагдаагийн газарт “Хөгжмийн сэтгэл заслын өрөө” тохижуулсан юм.

Зуслангийн газартай болох хүсэлт гаргасан 80 алба хаагчид Дархан-Уул аймгийн Хонгор сумын нутагт зуслангийн зориулалтаар газар олгуулахаар аймгийн удирдлагуудад хүсэлт гаргаж, энэ оны газар төлөвлөлтөд тусгуулан алба хаагчдад газрын гэрчилгээ олгуулах асуудлыг шийдвэрлүүллээ.

Он гараад хамт олноо манлайлан ажилласан 10 алба хаагчийг гэр бүлийн хамт “Сүүж-Уул” сэргээн засах сувилалд 7 хоног сувилуулав.  

Хүний нөөцийн тогтвортой байдлыг бүрдүүлэх чиглэлээр ямар бодлого барьж ажиллаж байна вэ?

Цагдаагийн газар, Дотоодын цэргийн тусгай салбарын хүний нөөцийн нөхөн хангалтыг бүрдүүлэх зорилгоор цагдаагийн байгууллагад орж ажиллах хүсэлт гаргасан иргэдийг “Цагдаа”, “Харуулчин” мэргэжил олгох сургалтад бүртгэхээс гадна олон нийтийн цагдаагийн сургалт зохион байгуулдаг.

Мөн олон нийтийн цагдаагаар ажиллаж байгаа иргэдийг ахлагч бүрэлдэхүүнд орж ажиллахад давуу тал болгон журмын дагуу судлаж,  шалгалтад тэнцсэн иргэдийг Дотоод хэргийн их сургуулийн Ахлагчийн сургуульд суралцуулан, сургалтаа амжилттай төгссөн иргэдийг сул орон тоонд онооны дарааллаар томилон ажиллуулж байна.

Алба хаагчдын эрх, хууль ёсны ашиг сонирхлыг хамгаалах чиглэлээр ямар ажил арга хэмжээ зохион байгуулж байна вэ?

Байгууллагын орон сууцанд 27 айлыг /алба хаагч/ зөвхөн цахилгааны хэрэглээгээ төлөх нөхцлөөр гэрээ байгуулан оршин суулгаж байна. Мөн өнгөрсөн онд албан үүргээ гүйцэтгэж яваад гэмтсэн давхардсан тоогоор 3 алба хаагчдад ослын акт тогтоон нөхөн төлбөрийг олгуулахаар материалыг “Практикал” даатгалын Дархан салбарт хүргүүлж нөхөн олговор олгуулсан.

Алба   хаагчдаас гаргасан эрх, хууль ёсны ашиг сонирхлыг хамгаалуулах, эрх зүйн баталгаагаар хангагдах тухай хүсэлтийг тухай бүр хүлээн авч холбогдох хууль тогтоомжийн хүрээнд шийдвэрлэж байна. Тухайлбал захиргааны чөлөө, орон байр хүсэх, сургуульд суралцах, тэтгэвэр тэтгэмж, тусламж хүсэх болон бусад байдлаар гаргасан 205 өргөдөл хүсэлтийг шийдвэрлэсэн байна.

Дархан-Уул аймаг нь өөрөө онцлогтой аймаг шүү дээ. Аймгийнхаа гэмт хэрэг, зөрчлийг бууруулах чиглэлээр хийсэн бодит үр дүнтэй ажил юу байна вэ?

Алслагдсан гэр хорооллын гудамж талбайд гэмт хэрэг, зөрчилтэй тэмцэх, урьдчилан сэргийлэх, иргэдийн дуудлага мэдээлэлд цаг хугацаа алдалгүй түргэн шуурхай хүрч ажиллах, урин дулааны улиралд “Хараа” гол”-ын эрэг орчмоор амарч зугаалж байгаа иргэдэд анхааруулга, санамж зөвлөгөө өгөх, учирч болох эрсдэлээс урьдчилан сэргийлэх зорилгоор “Морьт эргүүл”-ийг ажиллуулах хэрэгцээ шаардлага бий болсон. Иймд Дархан-Уул аймгийн Гэмт хэргээс урьдчилан сэргийлэх ажлыг зохицуулах салбар зөвлөл болон аймгийн Иргэдийн Төлөөлөгчдийн Хуралд санал уламжлан шийдвэрлүүлснээр тус Цагдаагийн газар нь “Морьт эргүүл”-ийн үүрэг гүйцэтгэх боломжтой болж, зуны улиралд “Хараа” голын эрэг, алдагдсан гэр хорооллын гудамж талбайд эргүүл шалгалтыг тогтмол зохион байгуулан ажилласан.

Дархан-Уул аймгийн хэмжээнд замын хөдөлгөөний аюулгүй байдлын тухай хууль тогтоомжийн хэрэгжилтийг хангах ажлын хүрээнд Дархан сумын замын хөдөлгөөнийг оновчтой зохион байгуулах, тэмдэг, тэмдэглэлийг шинэчлэх, шинэчлэн батлагдсан Замын хөдөлгөөний дүрэм, олон улсын стандарт шаардлагад нийцүүлж, шинэчлэх талаар холбогдох судалгаануудыг хийж, танилцуулга санал боловсруулж, аймгийн Засаг даргад танилцуулан, холбогдох шийдвэрийг гаргуулан ажиллаж байна.  Замын хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэргээс урьдчилан сэргийлэх зорилгоор Дархан-Уул аймгийн Хонгор сумын 2 дугаар баг хойд Дархан хаалганы орчим байрлах Замын цагдаагийн хяналтын пост дээр тээврийн хэрэгслийн дундаж хурд хэмжих камер байрлуулах “П” хэлбэрийн камерын суурь шинээр хийж байрлуулав.

Дархан-Уул аймгийн Засаг даргын захирамж, Цагдаагийн газрын даргын тушаалаар Дархан-Уул аймгийн Хонгор, Шарын гол сумын ойн сан, усан сан, автозамын гол зангилаа нутаг дэвсгэрт Хүрээлэн байгаа орчны эсрэг гэмт хэрэг, зөрчлөөс урьдчилан сэргийлэх зорилгоор Дархан-Уул аймгийн Шарын гол сум, Хонгор сумдад Цагдаагийн газар, Гал унтраах анги, байгаль хамгаалагч болон ойн нөхөрлөлийн гишүүд хамтран ээлжээр үүрэг гүйцэтгэж ажилласны үр дүнд өнгөрсөн онд Хүрээлэн байгаа орчны эсрэг гэмт хэрэг үйлдэгдээгүй эерэг үзүүлэлттэй байна.

Ярилцсанд баярлалаа, ажлын амжилт хүсье!