Цагдаагийн алба хаагчид 8 дугаар сарын 13-ны өдөр урьд өмнө эзэн холбогдогч нь тогтоогдоогүй 21 гэмт хэргийг нөхөн илрүүлсэн байна. Тухайлбал:

 -       2013 оны 6-р сарын 07-нд СБД-ийн 8-р хороо Монголын хүний нөөцийн удирдлагын шинэчлэлийн академийн 305 тоот өрөөнөөс иргэн Э нь 180.000 төгрөг, хар өнгийн “Dell” маркийн нөөт бүүк, цагаан өнгийн Скай маркийн гар утас, хар өнгийн Аnycall маркийн гар утсаа хулгайд алдсан хэрэг,

-       2014 оны 04-р сарын 15-нд СБД-ийн 1-р хороо Азмон төвийн 2 давхарт байрлах CHILAGU ХХК-ны 201 тоот өрөөнөөс иргэн Б нь “Sony” маркийн нөөт бүүк хулгайд алдсан хэрэг,

-       2014 оны 07-р сарын 26-нд СБД-ийн 1-р хороо “Blue sky tower”-ийн урд байрлах BИ ЛИ ТИ тээвэр зууч ХХК-ны 3 давхарын 303 тоот өрөөнөөс иргэн Ц-ийн  цагаан өнгийн iPhone-5, хар өнгийн Скай маркийн гар утас алдагдсан хэргийг Б.Э гэгч нь үйлдсэнийг илрүүлсэн байна.

Мөн 2014.06.14-ны өдөр СХД-ийн нутаг Толгойтын баруун салааны хуучин эцсийн замд “Тoyoto Алион” маркийн автомашины жолооч нь хувийн “Блюберд” маркийн автомашиныг мөргөөд 1.880.000 төгрөгний хохирол учируулаад осол хэргийн газраас зугтаасан хэргийг иргэн Э.Г үйлдсэнийг,

2014.06.21-ны өдөр БГД-ийн 11-р хороо Телевизийн зам, Эх нялхасын эмнэлэгийн зүүн хойд уулзварт марк дугаар тодорхойгүй автомашины жолооч нь “Нэткапитал Финанс” ББСБ-ын “Hyundai Accent” автомашиныг мөргөөд ослын газраас зугтаасан хэргийг иргэн Б.Б үйлдсэнийг,

2014.06.20-ноос 21-нд шилжих шөнө  СХД-2 Орбитын 59-р гудамжинд амины “Toyota Mark-2” автомашины жолооч нь 3-н айлын хашаа, 1 айлын гэр дайрч хашаан дотор зогсож байсан “Hyundai Avante”, “Hyundai Accent” автомашинуудыг мөргөөд осол хэргийн газраас зугтаасан хэргийг А.Т нар илрүүлснийг тус тус нөхөн илрүүлсэн байна.

Иргэн Та авто зам тээвэр осол гаргасан үедээ үүргээ гүйцэтгээгүйн улмаас хуулийн дагуу дараахь шийтгэлийг хүлээнэ. Монгол улсын Эрүүгийн хуулийн тусгай анги:

216 дугаар зүйл. Зам тээврийн ослын үед жолооч үүргээ биелүүлэхгүй байх, зугтаах

216.1.Зам тээврийн осол гаргасан жолооч хохирсон хүнд яаралтай тусламж үзүүлэх, осол гарсан талаар зохих байгууллага, албан тушаалтанд мэдэгдэх үүргээ биелүүлээгүй бол тээврийн хэрэгсэл жолоодох эрхийг хоёр жилийн хугацаагаар хасах буюу хасахгүйгээр хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ.

216.2.Жолооч зам тээврийн осол гарсан газрыг санаатай орхиж зугтаасан бол хөдөлмөрийн хөлсний доод хэмжээг тавин нэгээс далан тав дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл таван жил хүртэл хугацаагаар хорих ял шийтгэнэ.

Харин алдаагаа ухамсарлан осол гэмтэлд өртсөн иргэнд шуурхай тусламж үзүүлэн, хэргийн газрыг орхихгүй байх нь ял шийтгэлээс хөнгөрүүлэн үзэх давуу тал болдгийг санаж аваарай.