Дотоодын цэргийн штабаас 2021 оны “Үйл ажиллагааны тайлангийн хурал”, “Хөдөлмөрийн тэргүүний болон ажил, мэргэжлийн шилдэг, оны онцлох алба хаагч, хамт олон”-д шагнал гардуулах ажиллагааг өнөөдөр /2021.12.23/ Цагдаагийн ерөнхий газрын “Сүлд” чуулгын концертын танхимд зохион байгуулсан юм.

Дээрх арга хэмжээнд Цагдаагийн ерөнхий газрын дарга, Дотоодын цэргийн командлагч, хошууч генерал Ж.Болд, Дотоодын цэргийн штабын дарга, цагдаагийн хурандаа Р.Чингис, Цагдаагийн ерөнхий газрын Захиргааны удирдлагын газрын дарга, цагдаагийн хурандаа П.Оростогоо болон анги, байгууллагын алба хаагчдын төлөөлөл оролцлоо.

Цагдаагийн ерөнхий газрын дарга, Дотоодын цэргийн командлагч, хошууч генерал Ж.Болд хэлсэн үгэндээ “Дотоодын цэргийн нийт бие бүрэлдэхүүн өнгөрсөн хугацаанд хуулиар хүлээсэн чиг үүргийг зохих түвшинд биелүүлж, ард иргэдийн аюулгүй, амар тайван амьдрах нөхцөлийг бүрдүүлэхэд хүчин чармайлт гарган ажилласныг онцлон тэмдэглээд удахгүй болон шинэ он, шинэ жилийн баярын мэндийг дэвшүүлж, ажлын амжилт хүсье” хэмээв.

Хурлын үеэр хийж гүйцэтгэсэн ажлын ололт амжилт, алдаа дутагдлаа дүгнэж, улсын онц чухал объектын хамгаалах, нийтийн хэв журам сахиулах, олон нийтийн аюулгүй байдлыг хангах, гэмт хэргийг таслан зогсооход дэмжлэг үзүүлэх зэрэг хуулиар хүлээсэн чиг үүргийг хэрэгжүүлэхэд идэвх зүтгэл, үр бүтээл гарган ажил хөдөлмөрөөрөө бусдыгаа хошуучлан ажилласан “Хөдөлмөрийн тэргүүний болон ажил, мэргэжлийн шилдэг, оны онцлох алба хаагч, хамт олон”-г шалгаруулан, шагнаж урамшуулсан юм.

-“Хөдөлмөрийн тэргүүний байгууллага, хамт олон”-оор хурандаа Ж.Мөнхсолонго захирагчтай 05 дугаар ангийн хамт олон;

-“Хөдөлмөрийн тэргүүний удирдах ажилтан”-аар 805 дугаар ангийн захирагчийн орлогч, ар тал хангалтын дарга, хурандаа Н.Бөхболд;

-“Хөдөлмөрийн тэргүүний алба хаагч”-аар Өмнөговь аймаг дахь Дотоодын цэргийн тусгай салааны харуулын дарга, ахмад М.Бадамсамбуу,

-“Ажил, мэргэжлийн шилдэг алба хаагч”-аар Дорнод аймаг дахь Дотоодын цэргийн тусгай салбарын харуулын дарга, ахлах дэслэгч Х.Баатартулга;

805 дугаар ангийн ар тал хангалтын жолооч, ахлах ахлагч П.Ганбаяр;

Орхон аймаг дахь Дотоодын цэргийн 816 дугаар /гэрээт/ тусгай салбарын харуулчин, ахлах ахлагч Э.Бат-Эрдэнэ;

Дотоодын цэргийн штабын Захиргааны удирдлагын хэлтсийн үйлчлэгч Х.Алтангүл;

-“Оны онцлох алба хаагч”-аар Багахангай дүүрэг дэх Дотоодын цэргийн тусгай салбарын харуулчин, ахлах ахлагч У.Ган-Эрдэнэ;

05 дугаар ангийн харуулчин, ахлах ахлагч Б.Болорцэцэг нар тус тус шалгарлаа.

Идэвх зүтгэл, үр бүтээл гарган ажилласан нийт алба хаагчдынхаа цаашдын ажил үйлсэд өндөр амжилт хүсье!