Энэ долоо хоногт Цагдаа, дотоодын цэргийн байгууллагаас иргэд, олон нийт рүү чиглэсэн ОНЦЛОХ үйл явдлыг тоймлон хүргэж байна.

ЦАГДААГИЙН БАЙГУУЛЛАГААС ЗОХИОН ЯВУУЛЖ БУЙ ОНЦЛОХ АЯН, АРГА ХЭМЖЭЭНҮҮД

Don’t drink and drive буюу Уусан бол бүү жолоод согтуугаар үйлдэгдэх гэмт хэрэг, зөрчлийн гаралтыг бууруулах, урьдчилан сэргийлэх зорилгоор Тээврийн цагдаагийн албанаас “DON’T DRINK AND DRIVE” буюу “Уусан үедээ бүү жолоод” хэсэгчилсэн арга хэмжээг энэ оны 12 дугаар сарын 13-ны өдрөөс 2022 оны 01 дүгээр сарын 20-ны өдөр хүртэлх хугацаанд улсын хэмжээнд эхлүүллээ. Та амьдралаа сонгох уу? Түлхүүрээ сонгох уу?

"Хариуцлагаар үлгэрлэе" Цагдаагийн байгууллагаас төрийн болон төрийн бус байгууллагатай хамтран согтуугаар үйлдэгдэх гэмт хэрэг, зөрчлөөс урьдчилан сэргийлэх, архины зохисгүй хэрэглээг багасгах "Хариуцлагаар үлгэрлэе" нөлөөллийн арга хэмжээг эхлүүллээ. Энэхүү арга хэмжээг иргэд, олон нийтэд архи, согтууруулах ундаа хэтрүүлэн хэрэглэснээс ямар хор хохирол учирч байгааг танин мэдүүлэх ойлгуулах, хүүхдийн дэргэд архидан согтуурч, хүчирхийлэл үйлддэг, хүчирхийллийн өндөр эрсдэлтэй, архины хамааралтай айл өрхөөр яриа таниулга, биечлэн хяналт шалгалт хийж иргэдийг архидан согтуурах, улмаар гэмт хэрэг, зөрчил үйлдэгдэх, гэр бүлийн хэрүүл маргаан өдөөх нөхцөлийг бүрдүүлэх нь ямар хор хохиролтой болох талаар байгууллага, аж ахуйн нэгжүүдэд ухуулах, нөлөөлөх зэрэг чиглэлээр зохион байгуулж байна.

БӨРТЭ ЧОНО-2021”-ИЙН ЭЗНЭЭР ХӨДӨЛМӨРИЙН БААТАР М.УРАНЦЭЦЭГ ТОДОРЛОО

2021 оны монголын шилдэг тамирчин “Бөртэ чоно” наадмын шилдгийн шилдэг тамирчнаар Монгол Улсын хөдөлмөрийн баатар, ЦЕГ-ын Хүч спорт хорооны дасгалжуулагч, цагдаагийн хошууч М.Уранцэцэг тодорлоо. Шилжин явах цомыг Монгол Улсын хөдөлмөрийн баатар, гавьяат тамирчин, олимпын аварга Э.Бадар-Ууган гардуулсан юм.   

2002 оноос эхлэлтэй тус наадам 19 дэх жилдээ болсон бөгөөд шилдгүүдийг спортын сэдвээр дагнан бичдэг сэтгүүлчид санал өгч шалгаруулдаг уламжлалтай.

ЦАГДААГИЙН БАЙГУУЛЛАГААС ЭНЭ 7 ХОНОГТ ЗОХИОН БАЙГУУЛСАН ОНЦЛОГ СУРГАЛТУУД

Нийслэлийн цагдаагийн удирдах газар ахлах ангийн сурагчдын дунд тулгамдаж буй асуудлыг шийдвэрлэхэд арга зүйн дэмжлэг үзүүлэх, үе тэнгийн гадуурхал, тодорхой төрлийн гэмт хэрэг, зөрчлөөс урьдчилан сэргийлэх цахим сургалтыг ерөнхий боловсролын сургуулийн сурагчдын дунд зохион байгууллаа.

Хар тамхитай тэмцэх газар энэ оны эхний 11 сарын байдлаар 5 их дээд сургуулийн 1340, ерөнхий боловсролын 51 сургуулийн 4390, нийт 5730 багш, ерөнхий боловсролын сургуулийн ахлах ангийн 1550 сурагчийн 1380 эцэг, эх, асран хамгаалагчид сургалт, мэдээлэл оржээ.

Нийслэлийн цагдаагийн удирдах газрын харьяа гэр бүлийн хүчирхийллийн хохирогч, түүний гэр бүл, хүүхдийг хамтад нь хүлээн авч байршуулдаг Түр хамгаалах байрны "107" тусгай дугаарт 24 цагаар ажилладаг сэтгэл зүйч нарт Хууль зүй, дотоод хэргийн яам, "Монгол Өрх" ТББ, Хэвлэлийн хүрээлэн зэрэг байгууллагын дэмжлэгтэй чадавхжуулах сургалт зохион байгуулагдаж байна.

Энэхүү сургалтаар Түр хамгаалах байрны сэтгэл зүйч, дүүрэг дэх цагдаагийн газар, хэлтсийн сэтгэл зүйч нарт гэр бүлийн хүчирхийллийн хохирогчдод зөвлөгөө, мэдээлэл өгөх арга зүй, зөвлөгч сэтгэл зүйчийн заавал эзэмших шаардлагатай ур чадвар олгож, чадавхжуулах чиглэлээр зохион байгуулж байгаа нь онцлогтой юм.

ЦАГДААГИЙН ЕРӨНХИЙ ГАЗРЫН САНХҮҮ, АЖ АХУЙН АЛБА “ҮЛГЭР ЖИШЭЭ” ДҮГНЭГДЛЭЭ

Засгийн газрын хэрэгжүүлэгч агентлаг Төрийн өмчийн бодлого, зохицуулалтын газраас хууль, тогтоомжийн дагуу Төрийн өмчит хуулийн этгээдийн эзэмшиж байгаа хөрөнгийн ашиглалтыг сайжруулах, үр ашгийг дээшлүүлэх, төрийн өмчийн эд хөрөнгийн эзэмшилт, хадгалалт хамгаалалтыг сайжруулах, төсвийн болон өөрийн хөрөнгийг зориулалтын дагуу зарцуулах, өмчийн мэдээллийн сан бүрдүүлэх зэрэг зорилтын хүрээнд төрийн өмчит хуулийн этгээдтэй байгуулсан гэрээний биелэлтийг улсын хэмжээнд дүгнэж, дүнгээ гаргасан юм.

ЦАГДААГИЙН ГАЗРЫН 2021 ОНЫ "ХҮЧНИЙ 3 ТӨРӨЛТИЙН АВАРГА" ШАЛГАРУУЛАХ ТЭМЦЭЭН ЗОХИОН БАЙГУУЛЛАА.

Сэлэнгэ аймаг дахь цагдаагийн газраас соён гэгээрүүлэх ажил, арга хэмжээний хүрээнд алба хаагчдын бие бялдрыг хөгжүүлэх, хөдөлгөөний дутагдлаас урьдчилан сэргийлэх, "Цагдаагийн байгууллагын аварга шалгаруулах хүчний 3 төрөлтийн тэмцээн"-д оролцох баг тамирчдыг сонгон шалгаруулах зорилгоор Цагдаагийн газрын 2021 оны "Хүчний 3 төрөлт” аварга шалгаруулах тэмцээнийг энэ оны 12 дугаар сарын 11-ний өдөр харьяа, хэлтэс, тасаг, хэсгүүдийг оролцуулан зохион байгууллаа.

Тэмцээнд нийт 7 багийн 45 алба хаагч хүчний 3 төрөлтийн 5 жинд оролцож хүч, тэнхээ, авхаалж самбаа, тэсвэр хатуужлаа сорин өрсөлдөж нийлбэр дүнгээр Гутгаар байрт Сайхан сум дахь сум дундын Цагдаагийн хэлтсийн баг тамирчид, Дэд байранд Эрүүгийн цагдаагийн тасгийн баг тамирчид, Тэргүүн байранд Нийтийн хэв журам хамгаалах тасгийн баг тамирчид шалгарч шилжин явах цом, өргөмжлөл, мөнгөн шагналаар шагнагдлаа.

ЗЭВСЭГ-2021 НЭГДСЭН АРГА ХЭМЖЭЭ АМЖИЛТТАЙ ЗОХИОН БАЙГУУЛАГДЛАА

Зэвсэг-2021 нэгдсэн арга хэмжээний бүртгэл улсын хэмжээнд 93 хувьтай бүртгэгдэж амжилттай зохион байгуулагдлаа. Галт зэвсгийн тооллого, бүртгэлийн арга хэмжээ дууссан хэдий ч галт зэвсгээ бүртгүүлж амжаагүй иргэн, аж ахуйн нэгжүүд харьяа дүүргийнхээ цагдаагийн газарт бүртгүүлэх боломжтой юм.