ЦАГДААГИЙН ДЭЭД ХЭМЖЭЭНИЙ ОЛОН УЛСЫН ЧУУЛГА

 УУЛЗАЛТАД ОРОЛЦОЖ БАЙНА

Цагдаагийн ерөнхий газрын дарга, дотоодын цэргийн командлагч, хошууч генерал Ж.Болд тэргүүтэй төлөөлөгчид Бүгд Найрамдах Солонгос Улсад зохион байгуулагдаж буй Цагдаагийн дээд хэмжээний олон улсын чуулга уулзалтад оролцож байна.

Уулзалтын үеэр НҮБ-ын Цагдаагийн Албаны дарга Монгол Улсын Цагдаагийн байгууллагаас Энхийг сахиулах ажиллагаанд хувь нэмрээ оруулж алба хаагчдаа илгээж байгаад талархал илэрхийлсэн юм. Монгол Улсын Цагдаагийн байгууллагын зүгээс цаашид цагдаа хандивлагч орны хувиар НҮБ-ын Энхийг сахиулах ажиллагаа дахь оролцоогоо нэмэгдүүлж Цагдаагийн баг илгээхээр бэлтгэл ажлаа хангаж байгаа тухайгаа мэдэгдсэн.

Мөн Бүгд Найрамдах Турк, Арабын Нэгдсэн Эмират Улсын цагдаагийн байгууллагын удирдлагатай хийсэн уулзалтаар хоёр орны цагдаа, хууль сахиулах байгууллагуудын хамтын ажиллагааг өргөжүүлэх зорилгоор тэргүүн туршлага солилцох, чиглэл хариуцсан нэгж хооронд харилцаа тогтоох, алба хаагчдын мэдлэг, ур чадварыг дээшлүүлэх хамтарсан дадлага, сургалт зохион байгуулах чиглэлээр хамтран ажиллах талаар санал солилцлоо.

“110 ХҮНД АМЬДРАЛ БЭЛЭГЛЭЕ” АЯНЫ ХҮРЭЭНД АЛБАН ХААГЧИД

ЦУСАА ХАНДИВЛАЛАА

Монгол Улсад Хууль зүйн салбар байгуулагдсаны 110, орчин цагийн цагдаагийн байгууллага үүсэж хөгжсөний 100 жилийн ой тохиож байгаатай холбогдуулан сайн дурын цусаа хандивлах үйлсийг олон нийтэд сурталчилж, донорын эгнээг өргөжүүлэх, аюулгүй цусны хангамжийг нэмэгдүүлэх, идэвхжүүлэх, тогтмол хугацаанд цусаа бэлэглэгч доноруудыг алдаршуулах зорилготой цус хандивлах аяныг Хууль, зүй дотоод хэргийн яам, Цагдаа, дотоодын цэргийн байгууллага, Цус сэлбэлт судлалын үндэсний төвтэй хамтран зохион байгуулж байна.

“Дэлхий нийтэд тархаад буй ковид-19 цар тахлын улмаас улс орон даяар цусны нөөц багассан байна. Монгол Улсад ч мөн адил цусны нөөц багассан ч төрийн болон төрийн бус байгууллага, оюутан залуусын дунд цус хандивлах нэгдсэн арга хэмжээг үе шаттай зохион байгуулж, шуурхай арга хэмжээ авч хэрэгжүүлсний үр дүнд өнөөдрийн байдлаар цусны нөөц хэвийн хэмжээнд хүрсэн байна.

ТАЙЛАНГИЙН ЦАХИМ СУРГАЛТ ЗОХИОН БАЙГУУЛЛАА

“Харилцаа, Хандлага” аяны хүрээнд Санхүү, аж ахуйн албанаас цагдаа, дотоодын цэргийн байгууллагын санхүүгийн сахилга батыг сахиж сайжруулах зорилгоор санхүүгийн алба хаагчдын сургалтыг цахим хэлбэрээр зохион байгууллаа.

Тайлангийн цахим сургалтад цагдаа, дотоодын цэргийн байгууллагын 53 нэгжийн ахлах нягтлан бодогч, нярав, аж ахуйн ажилтан нийт 201 алба хаагч хамрагдсан юм.

МАЛ ХУЛГАЙЛАХ ГЭМТ ХЭРГЭЭС УРЬДЧИЛАН СЭРГИЙЛЭХЭЭР ИРГЭДЭД СЭРЭМЖЛҮҮЛЭГ ХҮРГЭЖ БАЙНА

Увс аймаг дахь Цагдаагийн газраас мал хулгайлах гэмт хэргээс урьдчилан сэргийлэх чиглэлээр сумдад байгаа малчин өрхүүдээр орж иргэдтэй хамтран эргүүл хяналт, шалгалтыг тогтмол зохион байгуулж байна. Шалгалтын үеэр энэ төрлийн гэмт хэргээс урьдчилан сэргийлэх чиглэлээр бэлтгэсэн календарь, зурагт хуудас, санамж, сэрэмжлүүлгийг  иргэдэд өгч мэдээ, мэдээллээр ханган хамтран ажиллалаа. Мал хулгайлах гэмт хэргээс урьдчилан сэргийлэх ажилд иргэн таны оролцоо чухал тул эрдэнэт мал сүргээ хариулгатай байлгаж, цагдаагийн байгууллагатай хамтран ажиллахыг тус цагдаагийн газраас уриалж байна.

БАГА НАСНЫ ХҮҮХДИЙГ ГЭМТ ХЭРЭГ, ЗӨРЧИЛД ӨРТӨЖ ХОХИРОХООС УРЬДЧИЛАН СЭРГИЙЛЭХ СУРГАЛТ ЗОХИОН БАЙГУУЛЛАА

Бага насны хүүхдийг гэмт хэрэг, зөрчилд өртөж хохирох, гэмт хэрэгт холбогдохоос урьдчилан сэргийлэх, эцэг эх, асран хамгаалагчид болон сургуулийн анги удирдсан багш удирдлагуудын анхаарал халамжийг эрчимжүүлэх чиглэлээр сургалт зохион байгуулагдлаа. Тус сургалтад ЦЕГ-ын урьдчилан сэргийлэх хэлтэс, Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтэс, дүүргүүд дэх цагдаагийн газар, хэлтсийн хүүхдийн асуудал хариуцсан мэргэжилтнүүд хамрагдсан юм.

II ЭЭЛЖИЙН ЦЭРЭГ ТАТЛАГА ЭХЭЛЛЭЭ

2021 оны II ээлжийн цэрэг татлага орон даяар явагдаж байгаатай холбогдуулан энэ сарын 21-ний өдрөөс эхлэн Нийслэлийн дүүргүүдээс Дотоодын цэрэгт хугацаат цэргийн алба хаагчдыг татан авах ажлыг зохион байгуулж байна.

Цар тахалтай холбоотойгоор цэрэг татлагын байрыг тусгайлан бэлтгэсэн бөгөөд УОК-оос гаргасан халдвар хамгааллын дэглэмийг чанд мөрдөн ажиллаж байна.

Хугацаат цэргийн албанд татагдсан иргэн иргэний үнэмлэх, цэргийн үүрэгтний үнэмлэх, мэргэжил эзэмшсэн бол мэргэжлийн үнэмлэх, сургууль төгссөн бол диплом зэрэг баримт бичгээ биедээ авч, цэрэг татлагын байранд тогтоосон хугацаанд ирэх үүрэгтэй юм.