100 жил
ДОЛОО ХОНОГИЙН ОНЦЛОХ ТОЙМ
Энэ долоо хоногт Цагдаа, дотоодын цэргийн байгууллагаас иргэд, олон нийт рүү чиглэсэн ОНЦЛОХ үйл явдлыг тоймлон хүргэж байна.
АХМАД АЖИЛТАН, АЛБА ХААГЧДАДАА БАЯРЫН
МЭНДЧИЛГЭЭ ДЭВШҮҮЛЛЭЭ
"Олон Улсын Ахмадын өдөр"-ийг тохиолдуулан Цагдаагийн ерөнхий газрын дарга, Дотоодын цэргийн командлагч, хошууч генерал Ж.Болд ард иргэдийнхээ амар амгалан, аюулгүй байдал, ирээдүй хойч үеийнхээ сайн сайхны төлөө залуу нас, халуун сэтгэлээ зориулан уйгагүй хөдөлмөрлөж ирсэн үе, үеийн ахмад буурлууддаа баярын мэндчилгээ дэвшүүлж хэлсэн үгэндээ:
Монгол төрийн цагдаа, дотоодын цэргийн байгууллагын түүхэн замналд ажил үйлсээрээ хойч үедээ мөнхөд дурсагдаж, залуу үеэ сурган хүмүүжүүлэх үйлсэд мэдлэг, оюунаа зориулж ирсэн үе үеийн удирдлага, ахмадууддаа баярын мэнд хүргэе. Ажил амьдралын арвин их мэдлэг, туршлагаа залуу үедээ өвлүүлэн, үнэт сургаалаа хайрлаж, энх тунх, аз жаргалтай, урт удаан наслахыг хүсэн ерөөе хэмээв.
Мөн энэхүү баярыг тохиолдуулж Дотоодын цэргийн штабаас 805 дугаар ангийн захирагч асан, Монгол Улсын Гавьяат хуульч, хурандаа Дамбын Чулууны "Хөдөлмөрийн алдар"-ыг тэмдэглэж, хүндэтгэл үзүүллээ. Уг арга хэмжээнд анги, байгууллагын дарга, захирагч нар оролцсон юм.
УТААГҮЙ, УГААРГҮЙ, УХААЛАГ ХЭРЭГЛЭЕ УРИАТАЙГААР “САЙЖРУУЛСАН ТҮЛШНИЙ ЦОГЦ ХЭРЭГЛЭЭ” АЯН ҮРГЭЛЖИЛЖ БАЙНА
Цагдаагийн ерөнхий газар, Байгаль орчин, аялал жуулчлалын яам, Онцгой байдлын ерөнхий газар болон бусад холбогдох байгууллагуудтай хамтран “Сайжруулсан түлшний цогц шийдэл” аяныг энэ оны 9 дүгээр сарын 15-ны өдөр эхлүүлсэн. Аяны хүрээнд гэр хорооллын айл бүрийг яндангаа хөөлөх, зөв галлах, угаарын хийн мэдрэгчийн ажиллагааг шалгахтай холбоотой зөвлөгөө, мэдээллээр хангаж, зорилтот бүлгийн айл өрхүүдийн янданг хөөлөх, засвар үйлчилгээ үзүүлэх угаарын хийн хордлогоос урьдчилан сэргийлэх, сайжруулсан түлшний зөв хэрэглээний талаар мэдээлэл өгч хэвшүүлэх ажлыг зохион байгуулан, угаарын эрсдэлгүй байх зорилтыг тавин ажиллаж байна.
СҮХБААТАР ДҮҮРЭГ ДЭХ ЦАГДААГИЙН ГАЗРЫН ХОЁРДУГААР ХЭЛТСИЙН “БЭЛХ”, “100 АЙЛ” ДАХЬ ЦАГДААГИЙН ХЭСГИЙН ШИНЭ БАЙРНЫ НЭЭЛТИЙН ҮЙЛ АЖИЛЛАГАА БОЛЛОО
Сүхбаатар дүүрэг дэх Цагдаагийн газрын Хоёрдугаар хэлтсийн “Бэлх” болон “100 айл” дахь цагдаагийн хэсгийн шинэ байрны нээлтийн үйл ажиллагаа энэ сарын 27-ны өдөр боллоо. Тус цагдаагийн хэсгүүдийн байр нь 1996, 1999 онуудад ашиглалтад орж байсан бөгөөд ашиглалтын хугацаа нь хэтэрсэн байсан юм. Сүхбаатар дүүрэг дэх Цагдаагийн газрын Хоёрдугаар хэлтсийн Бэлх дэх хэсгийн байрыг төсвөөс хөрөнгө, санхүүжилтийг шийдвэрлэж өгснөөр орчин үеийн стандарт шаардлагад нийцсэн 3 өрөө, 1 автомашины гараж бүхий 98 метр квадрат барилга, "100 айл" дахь цагдаагийн хэсгийн байрыг төр, хувийн хэвшлийн түншлэлийн хүрээнд орчин үеийн стандарт шаардлагад нийцсэн 3 өрөө бүхий 117 метр квадрат бүхий барилгыг ашиглалтад хүлээлгэн өглөө.
“ЦАГДАА”, “ХАРУУЛЧИН” МЭРГЭЖИЛ ОЛГОХ СУРГАЛТАД ХАМРАГДСАН ХУГАЦААТ ЦЭРГИЙН АЛБА ХААГЧ, ИРГЭДЭД “МЭРГЭЖЛИЙН ҮНЭМЛЭХ” ГАРДУУЛАХ ЁСЛОЛЫН АЖИЛЛАГАА БОЛЛОО
Цагдаагийн ерөнхий газрын дарга, Дотоодын цэргийн командлагчийн тушаалаар “Цагдаа”, “Харуулчин” мэргэжил олгох сургалтад хамрагдсан Дотоодын цэргийн 05 дугаар ангийн хугацаат цэргийн алба хаагчид болон Дотоод хэргийн их сургуулийг эрхзүйч мэргэжлээр төгссөн иргэдэд “Мэргэжлийн үнэмлэх” гардуулах ёслолын арга хэмжээ энэ сарын 27-ны өдөр Цагдаа, дотоодын цэргийн Сургалтын нэгдсэн төвд боллоо. Дээрх сургалт нь энэ оны 08 дугаар сарын 16-ны өдрөөс 09 дүгээр сарын 24-ний өдрийг хүртэл үргэлжилсэн бөгөөд нийт 224 цагийн багц сургалтыг цагдаа, дотоодын цэргийн сургагч багш нар удирдан явууллаа.
Дотоодын цэрэгт хугацаат цэргийн алба хааж буй алба хаагчид энэхүү сургалтад хамрагдсанаар цаашид цагдаа, дотоодын цэргийн байгууллагад ажиллах боломжтойгоороо онцлог билээ.
"ДЭЛГЭЦЭЭС ХОЛДУУЛАХ ДАДЛУУД"
НОМЫГ ЭРХЛЭН ГАРГАЛАА
Баян-Өлгий аймаг дахь Цагдаагийн газар “Эерэг өөрчлөлтийн түүчээ” ТББ-тай хамтран хүүхэд багачуудыг цахим гэмт хэргээс урьдчилан сэргийлэх, оюуны хөрөнгө оруулалт хийх зорилгоор “Дэлгэцээс холдуулах дадлууд” номыг Казак, Монгол хэлээр эрхлэн гаргалаа. Уг номыг орчуулан хэвлүүлэх ажлыг Баян-Өлгий аймаг дахь Цагдаагийн газрын дарга асан, цагдаагийн хурандаа Б.Наранбаатар, "Дэлхийн зөн" олон улсын байгууллагын орон нутгийн хөтөлбөрийн менежер Д.Болатбек, тус цагдаагийн газрын Хүүхдийн асуудал хариуцсан мэргэжилтэн, цагдаагийн ахмад К.Ёлка нарын хүмүүс хамтран хэрэгжүүлжээ. "Дэлгэцээс холдуулах дадлууд" номыг сургууль, цэцэрлэгүүдэд тараах бөгөөд энэхүү ном нь хүүхдүүдийн сурлага, хүмүүжлийг сайжруулах, эрүүл мэндийг хамгаалах, гэмт хэргийн хохирогч болохоос урьдчилан сэргийлэхэд чухал ач холбогдолтой юм.
