Сүхбаатар, Хан-Уул дүүргийн алба хаагчид нэмэлтээр машинт, мотоцикльтой, явган, завьт эргүүлийг нутаг дэвсгэрийн орчимд хуваарилан ажилуулж өгснөөр хүн амын төвлөрөлт ихтэй, түүнчлэн нийслэлийн иргэдийн зуслангийн нутаг дэвсгэрийн дийлэнхийг хамардаг, голын эрэг дагуу амралт зугаалгын байнгын цэг болж байдаг тус дүүргүүдэд гэмт хэргийн гаралт буурч, иргэдийн сэтгэл өндөр байна.
Мөн зуслангийн нутаг дэвсгэрт сайн дурын иргэдтэй гэрээ байгуулж дүүргийн Хөдөлмөрийн хэлтэстэй хамтран урамшуулал олгон нэмэлтээр морин эргүүл ажиллуулаад байгаа юм. Ингэснээр зуслангийн чиглэлд гардаг хулгай, архидан согтуурахаас үүдэлтэй гэмт хэргийн гаралт эрс багасаж байгааг хорооны иргэд талархан хэлж байлаа.
Цагдаа маш олон ажил үүрэг гүйцэтгэдэг, аливаа ажлыг цагдаагаар хийлгэх, цагдаатай хамтарч хийх оролдлого, хүсэлт их байдаг, болж бүтэхгүй зүйл бүхнийг цагдаагаар хийлгэх гэснээс улс орон цагдаажлаа гэх болсон. Цагдаагийн байгууллагын хувьд юм бүхэнд оролцох биш, хариуцсан салбар байгууллага нь өөрсдөө үйл ажиллагааны технологийг олж хөгжиж явах ёстой. Иймээс Цагдаагийн албаны тухай хуульд цагдаагийн байгууллага, алба хаагчаар хуульд зааснаас өөр ажил, үүрэг гүйцэтгүүлэхийг хориглохоор зааж өгсөн нь маш чухал зохицуулалт болсон.
Олон нийтийн цагдаагийн ажилтны эрх зүйн байдал, түүнд тавигдах шаардлагыг тодорхойлж, олон нийтийн цагдаагийн ажилтны гэмт хэрэг, зөрчлөөс урьдчилан сэргийлэх, нийтийн хэв журам хамгаалах ажилд оролцохтой холбогдон үүссэн харилцааг зохицуулах зорилгоор Цагдаагийн ерөнхий газрын даргын 2014 оны 05 дугаар сарын 30 -ны өдрийн 382 дугаар тушаалаар Олон нийтийн цагдаагийн ажилтны дүрмийг баталж өгсөн билээ.