Энэ долоо хоногт Цагдаагийн байгууллагаас олон нийт рүү чиглэсэн ОНЦЛОХ үйл явдлыг тоймлон хүргэж байна.

“Жендерт суурилсан хүчирхийлэл, хүн худалдаалах гэмт хэрэг” сэдэвт сургалтыг зохион байгууллаа

Эрүүгийн цагдаагийн албанаас төрийн болон төрийн бус байгууллагуудтай хамтран энэ сарын 20-ны өдөр “Жендерт суурилсан хүчирхийлэл, хүн худалдаалах гэмт хэрэг” сэдэвт сургалтыг зохион байгууллаа. Энэхүү сургалтаар хууль сахиулах алба хаагчдын мэдлэг, мэдээлэл, ойлголтыг нэмэгдүүлэх зорилготой ... Жендерийн тухай үндсэн ойлголт, жендерт суурилсан ялгаварлан гадуурхал, хүчирхийлэл, хүн худалдаалах гэмт хэргийн эрх зүйн зохицуулалт, хохирогчийг тогтоох, илрүүлэх ажиллагаа, хүндрэл бэрхшээл, цаашид анхаарах асуудал сэдвийн хүрээнд Эрүүгийн цагдаагийн алба, Нийслэл, Дүүргийн прокурорын газар, Хүйсийн тэгш эрхийн төвийн ажилтан, алба хаагчид сургалт орж, нээлттэй хэлэлцүүлэг хийж, санал бодлоо солилцлоо.

Хилээр гарч байгаа иргэд ажлын гэрээ заавал байгуулах, өөрийн паспорт бичиг баримтаа хэнд ч өгөхгүй өөртөө хадгалах, Монгол Улсаас тухайн оронд суугаа Элчин сайдын яам, Консулын газарт бүртгүүлэх, Монголд байгаа гэр бүл, хамаатан садан, найз нөхдөдөө очсоноо мэдэгдэж, холбоотой байх нь учирч болзошгүй гэмт хэргээс урьдчилан сэргийлэх юм.

“Алдвал галдана” нөлөөллийн аяныг эхэллээ

Экологийн цагдаагийн алба, Нийслэлийн Гэмт хэргээс урьдчилсан сэргийлэх ажлыг зохицуулах салбар зөвлөл, Нийслэлийн Байгаль орчны газар, Нийслэлийн Онцгой байдлын газартай хамтран  “АЛДВАЛ ГАЛДАНА” нэртэй аяныг энэ оны 09 дүгээр сарын 15-ны өдрөөс 1 сарын хугацаатай зохион байгуулж байна. Гал алдах л юм бол түймэр болно гэдэг ойлголтыг иргэдэд зөвөөр таниулах, гал түймэр, ой, хээрийн түймрээс урьдчилан сэргийлэх мэдлэг, мэдээлэл олгох зорилготой юм.  Энэ төрлийн томоохон хэмжээний аян нийслэлд анх удаа зохион байгуулагдаж байгаа гэдгээрээ их онцлогтой.

Сүүлийн хоёр жилийн хугацаанд гарсан ой, хээрийн түймрүүдийг бид нүдээр харсан. Австрали, Сибирьд гарсан олон улсыг дамнаж байгаа түймрүүд бидэнд өнөөдөр ч нүүрлэх боломж нөхцөлийг байгаль бүрдүүлчихсэн байгаа. Тиймээс санамсар болгоомжгүйгээс түймэр гаргачих вий гэдэг талаас нь анхааруулах, мэдлэг мэдээлэл олгох зорилгоор энэхүү аяныг эхлүүлээд байгаа юм.

Алба хаагчид ажлын туршлага солилцлоо

Дотоодын цэргийн штабын даргын баталсан удирдамжийн хүрээнд Нийслэлийн Багануур, Багахангай дүүрэг дэх Дотоодын цэргийн тусгай салбар, салааны захирагч нарын ажлын арга барилыг сайжруулах, улсын онц чухал объектын хамгаалалтын үйл ажиллагааны чиглэлээр туршлага судлуулах зорилгоор энэ оны 09 дүгээр сарын 16, 17-ны өдрүүдэд Дотоодын цэргийн штаб, 05, 805 дугаар ангийн үйл ажиллагаа, хамгаалж байгаа улсын онц чухал объектуудын хамгаалалтын нөхцөл байдалтай танилцуулах ажлыг зохион байгуулав.

Орхон аймаг дахь Цагдаагийн газрын алба хаагчид 550 ширхэг "Шинэс мод"-ны суулгац тарьлаа

Орхон аймаг дахь Цагдаагийн газар, Дотоодын цэргийн 816 дугаар тусгай салбарын хамт олон, Гэрээт цагдаагийн хэлтсээс Монгол Улсад орчин цагийн Цагдаагийн байгууллага үүсэж хөгжсөний түүхт 100 жилийн ой, тус Цагдаагийн газрын 45 жилийн ойн бүтээн байгуулалтын ажлын хүрээнд Цэцэрлэгт хүрээлэнгийн урд хэсэг буюу Тарлан толгойн энгэрт 2га газарт нийт 550 ширхэг "Шинэс мод"-ны суулгац тарьж Аймаг орон нутгийн ногоон байгууламжид хувь нэмрээ орууллаа. 

“Цэргийн эмнэлгийн тусгай бэлтгэл-2021” буухиа тэмцээн зохион байгуулагдаж байна

Зэвсэгт хүчний жанжин штабаас цэргийн эмч, эмнэлгийн мэргэжилтний багаар ажиллах ур чадварыг нэмэгдүүлэх эмнэлгийн шаталсан тусламжийг мэргэжлийн өндөр түвшинд үзүүлэх, цаашид олон улсын тэмцээн, уралдаанд оролцох бэлтгэлийг хангах зорилгоор үндэсний аюулгүй байдлыг хангах тусгайлсан чиг үүрэгтэй байгууллагуудын дунд “Цэргийн эмнэлгийн тусгай бэлтгэл-2021” буухиа тэмцээнийг зохион байгуулж байна. Энэхүү тэмцээнд Зэвсэгт хүчин, Цагдаагийн ерөнхий газар, Хил хамгаалах ерөнхий газар, Шүүхийн шийдвэр гүйцэтгэх ерөнхий газар, Агаарын цэргийн командлал, Тусгай хүчний цэргийн командлал, Барилга-инженерийн удирдах газар, Цэргийн төв эмнэлэг зэрэг найман байгууллагын 16 баг, тамирчид оролцож байгаа юм.