Орчин цагийн цагдаагийн байгууллага үүсэж хөгжсөний 100 жилийн ойн хүрээнд энэ сарын 10-ны өдөр нийслэл Улаанбаатар хотноо зохион байгуулагдсан “Монгол Улсын цагдаа, дотоодын цэргийн байгууллагын гадаад хамтын ажиллагаа, цаашдын чиг хандлага“ сэдэвт олон улсын зөвлөгөөн коронавируст цар тахлын улмаас цахимаар зохион байгуулагдсан хэдий ч тавьсан зорилгоо биелүүлж, санал зөвлөмжөө солилцсон зөвлөгөөн болж өндөрлөлөө.

Энэхүү зөвлөгөөнөөр “Монгол Улсын цагдаа, дотоодын цэргийн байгууллагын гадаад хамтын ажиллагаа, цаашдын чиг хандлага”, “Ковид-19 цар тахлын үеийн хууль сахиулах хамтын ажиллагаа”, “Шинэ төрлийн гэмт хэрэгтэй тэмцэхэд олон улсын цагдаагийн байгууллагын хамтын ажиллагаа”, “Ковид-19 цар тахал Олон улсын цагдаагийн байгууллагын хамтын ажиллагаа”, “НҮБ-ын Энхийг дэмжих ажиллагаа дахь Монгол Улсын цагдаагийн байгууллагын оролцоо”, “Жендерт суурилсан хүчирхийлэл, Гэр бүлийн хүчирхийллээс урьдчилан сэргийлэх, таслан зогсоох чиглэлээр, Цагдаагийн байгууллага, НҮБ-ын Хүн амын сан хоорондын хамтын ажиллагаа” зэрэг 20 гаруй сэдвийн хүрээнд илтгэл, санал, зөвлөмжийг цаашдын үйл ажиллагаандаа хэрэгжүүлж ажиллахаар хэлэлцсэн юм.

Цагдаа, дотоодын цэргийн байгууллагын гадаад харилцаа, хамтын ажиллагааг өргөжүүлж, хөгжүүлэх, Олон улсын эрүүгийн цагдаагийн байгууллага-Интерполтой хамтын ажиллагааг эрчимжүүлэх чиглэлээр:

Дэлхий нийтэд тархаад буй коронавируст халдвар цар тахал урт хугацаанд үргэлжлэх төлөвтэй байх тул бүхий л чиглэлд хамтран ажиллах шинэ арга замыг эрэлхийлж, хүний эрүүл мэндэд суурилсан харилцан ажиллагааг өргөжүүлж, хөгжүүлэх, Монгол Улсад суугаа болон Монгол Улстай хамтран ажиллах асуудлыг гадаад улсаас хавсран хариуцдаг Элчин сайдын яамдын цагдаагийн атташе нарын зөвлөлдөх уулзалтыг жил бүр зохион байгуулж, хамтын ажиллагааны тулгамдсан асуудлуудаа хэлэлцэж, иргэдийг гэмт халдлагад өртөж хохирохоос урьдчилан сэргийлэх, тэдний эрх ашгийг хамгаалах чиглэлээр харилцан мэдээлэл солилцож ажиллах;

Үндэстэн дамнасан гэмт хэрэг, хүн малын гоц халдварт өвчин, цар тахлын үеийн нөхцөл байдал, авч хэрэгжүүлж буй арга хэмжээний талаарх мэдээ, мэдээллийг шуурхай солилцох зорилгоор мэдээлэл солилцооны баг /холбогч офицерууд/-ийг томилон ажиллуулах. НҮБ-ын Мансууруулах бодис, гэмт хэрэгтэй тэмцэх алба, Олон улсын мансууруулах бодисын хяналтын зөвлөлөөс ирүүлсэн зөвлөмжийн хэрэгжилтэд дэмжлэг үзүүлэн хамтран ажиллах. Цагдаа, дотоодын цэргийн байгууллагын хүний нөөцийг сургаж бэлтгэх, мэргэшүүлэх, хамтарсан сургалт дадлага зохион байгуулах;

Монгол Улс дахь Интерполын Үндэсний төв товчооноос Тагнуулын ерөнхий газар, Хил хамгаалах ерөнхий газар, Гадаадын иргэн харьяатын газар, Гаалийн ерөнхий газар зэрэг үндэсний эрх бүхий байгууллагуудыг Интерполын мэдээллийн санд холбож, Интерполын харилцаа холбооны “I-24/7” системийг хязгаарлагдмал эрхтэйгээр хандах эрхийг олгосон бөгөөд цаашид Авлигатай тэмцэх газар, Монгол Банкны Санхүүгийн мэдээллийн алба зэрэг байгууллагуудыг Интерполын мэдээллийн санд холбож,  хязгаарлагдмал эрхтэйгээр хандах эрх олгож, ашиглуулах. Интерполын хилийн хяналтын “FIND” системийг Монгол Улсад нутагшуулж, Терроризмтой тэмцэх үндэсний зөвлөл, тусгайлсан чиг үүрэгтэй байгууллагуудын үйл ажиллагааг уялдуулан ажиллах. НҮБ-ын “GoTravel” зорчигчийн нэгдсэн мэдээллийн системийг Монгол Улсад суурилуулан ашиглах, Интерполын Үндэсний төв товчооны Ажлын албанаас боловсруулан гаргасан мэдээлэл солилцох чиглэлээр цагдаагийн байгууллагын нэгжүүдээс гаргаж буй алдаа дутагдал, ололттой тал, шилдэг туршлага, зааварчилгаа дээр үндэслэн Дотоод хэргийн их сургуулийн сонсогч, оюутнуудад зориулсан сургалтын модуль, гарын авлага зэргийг боловсруулж, тэдгээрт Интерполын үйл ажиллагааны талаар системтэй мэдлэг олгох;

Энэхүү олон улсын зөвлөгөөнөөс гарсан дараах зөвлөмжийг тус хэлэлцүүлэгт оролцсон бүх зочид, төлөөлөгчид 100 хувийн саналаар дэмжив. Зөвлөгөөнөөс гарсан эдгээр, зөвлөмж, шийдвэрүүд нь цагдаа, дотоодын цэргийн байгууллагын гадаад хамтын ажиллагааг улам гүнзгийрүүлж, шинэ түвшинд хүргэхэд чухал ач холбогдолтой юм.