Монгол Улсад орчин цагийн цагдаагийн байгууллага үүсэж хөгжсөний 100 жилийн ойн хүрээнд зохион байгуулагдаж буй “Цагдаа, дотоодын цэргийн байгууллагын гадаад хамтын ажиллагаа, цаашдын чиг хандлага” сэдэвт зөвлөгөөн дэлхий нийтэд тархаад буй коронавируст халдварын нөхцөл байдлын улмаас өнөөдөр /2021.09.10/ цахимаар зохион байгуулагдаж байна.

Энэхүү олон улсын зөвлөгөөнд Улсын их хурлын гишүүн, Хууль зүй, дотоод хэргийн сайд Х.Нямбаатар, Цагдаагийн ерөнхий газрын дарга, дотоодын цэргийн командлагч, хошууч генерал Ж.Болд болон даргын зөвлөлийн гишүүд, Хууль сахиулах байгууллагуудын төлөөлөл, Америкийн Нэгдсэн Улс, Австралийн Холбооны Улс, Бүгд Найрамдах Беларусь Улс, Бүгд Найрамдах Болгар Улс, Бүгд Найрамдах Социалист Вьетнам, Холбооны Бүгд Найрамдах Герман Улс, Европын Холбоо, Израйл Улс, Их Британи, Умард Ирландын Нэгдсэн Хаант Улс, Бүгд Найрамдах Итали Улс, Бүгд Найрамдах Казахстан Улс, Канад Улс, Олон улсын эрүүгийн цагдаагийн байгууллага-Интерпол, Фейсбүүк компаний Хууль сахиулах байгууллагын хамтын ажиллагаа хариуцсан нэгж, цагдаа, дотоодын цэргийн болон ижил чиг үүрэг бүхий байгууллагын удирдлага, ажилтан, алба хаагчид зэрэг 24 улс, олон улсын 5 байгууллагын 90 гаруй зочин, төлөөлөгчид цахимаар оролцож байна.

Зөвлөгөөнөөр Олон улсын хүний эрхийн хэм хэмжээ, хууль дээдлэх зарчим, туршлагыг судлан хэлэлцэж, хүний эрх, эрх чөлөөг хангах, гэмт хэрэгтэй тэмцэх, түүнээс урьдчилан сэргийлэхэд нэг итгэлцэл дор нэгдмэл байж, одоо болон ирээдүйн өмнө хүлээсэн үүрэг, хариуцлагаа ухамсарлан ойлгож, хүн төрөлхтний энх тайван, аюулгүй байдлыг хангах, Цагдаа, дотоодын цэргийн байгууллагын гадаад харилцаа, хамтын ажиллагааг өргөжүүлж, хөгжүүлэх, Олон Улсын Эрүүгийн цагдаагийн байгууллага-Интерполтой хамтран ажиллах хамтын ажиллагааг эрчимжүүлэх зэрэг сэдвээр 20 гаруй илтгэл хэлэлцүүлж, санал зөвлөмжөө дэвшүүлэн, амжилттай зохион байгуулж байна.