Энэ долоо хоногт Цагдаагийн байгууллагаас олон нийт рүү чиглэсэн ОНЦЛОХ үйл явдлыг тоймлон хүргэж байна.

Баянзүрх дүүрэг дэх Цагдаагийн газрын Хоёрдугаар хэлтсийн “Эмэгтэйчүүдийн зөвлөл” санаачлан нэгэн алба хаагчдаа өргөө цагаан гэр бэлэглэлээ.

Баянзүрх дүүрэг дэх Цагдаагийн газраас цагдаагийн байгууллагын 100 жилийн ойг угтан хоёрдугаар хэлтсийн “Эмэгтэйчүүдийн зөвлөл”-өөс санаачлан нэгэн эмэгтэй алба хаагчаа баярлуулах, сэтгэлийн бэлэг барих томоохон ажлыг дарга, удирдлагуудынхаа дэмжлэгээр амжилттай зохион байгуулж таван ханатай өргөө цагаан гэрийг бэлэглэлээ.

Алба хаагчийнхаа гэр бүлд аз, жаргал, эрүүл, энх сайн сайхан бүхнийг хүсэн ерөөе.

Хөвсгөл аймаг дахь Цагдаагийн газар Голын үерт орсон иргэдийн амь насыг аварлаа

Бүрэнтогтох сумын Их-Уул багт голын ойролцоо нутаглаж байсан айл үерийн усанд автсан дуудлага мэдээллээр тус сумын хэсгийн төлөөлөгч, цагдаа нар түргэн шуурхай ажиллаж 0-11насны 4 хүүхэд, 2 эмэгтэйг үерийн уснаас гарган авч ажиллалаа.

Мөн тус аймгийн цагдаагийн газар Мөрөн сумын Засаг даргын тамгын газар болон Мөрөн сумын ИТХ, ГХУСАЗСЗөвлөл хамтран мөрөн Голын ойр орчимд нутаглаж байгаа айл өрхүүдээр явж санамж сэрэмжлүүлэг тараан үер усны аюулаас урьдчилан сэргийлэх чиглэлээр мэдээлэл хийн ажиллалаа.

Дархан-Уул аймаг дахь Цагдаагийн газар "Сэрэмжилье-Болгоомжилъё" аяны хүрээнд иргэдэд санамж, сэрэмжлүүлэг хүргэн, зурагт хуудас тараан ажиллаж байна

Тус аймаг дахь Цагдаагийн газраас "Сэрэмжилье-Болгоомжилъё" аяны хүрээнд гол, усны аюулын тоо, хохирлыг бууруулах, урьдчилан сэргийлэх чиглэлээр Хараа голын эрэг орчмоор морьт болон явган эргүүлийг ажиллуулж, үер, усны аюулаас урьдчилан сэргийлэх чиглэлээр иргэдэд санамж, сэрэмжлүүлэг хүргэн, зурагт хуудас тараан ажиллаж байна.

Иргэд үер усны аюулаас урьдчилан сэргийлж, гол, мөрөн нуурын ойролцоо амарч зугаалахдаа сонор, сэрэмжтэй байж,

Хүүхдийг гол усны эрэг дагуу явуулж, тоглуулахгүй байх, хүүхдэд тавих хараа, хяналтаа сайжруулж,

Согтууруулах ундааны зүйл хэрэглэсэн үедээ гол усанд орохгүй байх,

Баталгаатай гүүр, гарам, гарцтай газраар автомашинтай зорчиж гол, усны ослоос урьдчилан сэргийлэхийг анхааруулж байна.

Багануур дүүрэг дэх Цагдаагийн хэлтэс “Ирээдүйгээ хамгаалъя”

аяныг зохион байгуулж байна

Ирээдүйгээ хамгаалъя аяны хүрээнд тус дүүрэг дэх Цагдаагийн хэлтсээс орон нутгийн болон дүүргийн замын хөдөлгөөнд оролцож буй жолооч, зорчигч нарт замын хөдөлгөөнд оролцохдоо зорчигчдын тэр дундаа бага насны хүүхдийг тээвэрлэхдээ зориулалтын суудал, хамгаалах бүс тогтмол зүүлгэж, тээврийн хэрэгслийн хурд хэтрүүлэхгүй аюулгүй байдлаа хангаж хөдөлгөөнд оролцохыг анхааруулан ажиллаж байна

Эрсдэлгүй, осолгүй замын хөдөлгөөн зөвхөн жолооч танаас шалтгаална.

Өмнөговь аймаг дахь цагдаагийн газар “Уураар биш ухаанаар шийдье” нөлөөллийн аяныг эхлүүллээ

Тус аймаг дахь Цагдаагийн газраас хүний эрүүл мэндийн халдашгүй байдлын эсрэг гэмт хэрэг зөрчлийн шалтгаан нөхцөлийг арилгах, бууруулах, хор уршгийг таниулах, урьдчилан сэргийлэх ажилд төрийн болон төрийн бус байгууллага иргэдийн оролцоог нэмэгдүүлэх зорилгоор “Уураар биш ухаанаар шийдье” нөлөөллийн аяныг эхлүүллээ.

Тус аяны хүрээнд “Сэтгэлийн гүн дэх үгс” видео контентын уралдааныг зарласан байна.

Ухаан дутаж уур дийлэх цагт та алдсан байдаг.

Дорноговь аймаг дахь Цагдаагийн газар “Гудамж” хэсэгчилсэн арга хэмжээг зохион байгууллаа

Дорноговь аймаг дахь Цагдаагийн газраас “Архидан согтуурахтай тэмцэх", “Гэр бүлийн хүчирхийлэлтэй тэмцэх” урьдчилан сэргийлэх, нийгэм, эдийн засагт үзүүлэх сөрөг нөлөөллийг бууруулах тухай” хуулийн хэрэгжилтийг хангах чиглэлээр хариуцсан нутаг дэвсгэрийн хэмжээнд “ГУДАМЖ” хэсэгчилсэн арга хэмжээг зохион байгууллаа.  Энэхүү арга хэмжээний хүрээнд аймгийн Эрүүл мэндийн газартай хамтран тус аймгийн Сайншанд суманд оршин суух хаягтай архинд донтох өвчтэй, архины хамаарал бүхий 51 иргэнд архины хор хөнөөл болон соён гэгээрүүлэх яриа таниулга хийж коронавируст халдварт цар тахлаас урьдчилан сэргийлэх тандалт шинжилгээ, эрүүл мэндийн анхан шатны үзлэгт зэрэгт хамруулсан юм.