ДОТООД ХЭРГИЙН ИХ СУРГУУЛИЙГ АМЖИЛТТАЙ ТӨГССӨН СОНСОГЧДОД ЦОЛ ОЛГОЖ, АЖЛЫН БАЙРАНД ТОМИЛЛОО

Цэргийн гавьяаны улаан туг, Байлдааны гавьяаны одонт Монгол Улсын Дотоод хэргийн их сургуулийн Цагдаагийн сургуулийн 2020-2021 оны хичээлийн жилд амжилттай суралцаж төгссөн 160 сонсогчдод бакалаврын диплом, энгэрийн тэмдэг, цагдаагийн цол олгож, ажлын байранд томилох арга хэмжээ өнөөдөр /2021.05.19/ Цагдаагийн ерөнхий газрын “Сүлд” чуулгын их танхимд зохион байгуулагдлаа.

Энэхүү арга хэмжээнд Цагдаагийн ерөнхий газрын Дэд дарга, цагдаагийн хурандаа О.Амарсанаа, Хүний нөөцийн хэлтсийн дарга, цагдаагийн хурандаа Ж.Баясгалан болон Дотоод хэргийн их сургуулийн удирдлага, алба хаагчид оролцсон юм.

Цагдаагийн ерөнхий газрын Дэд дарга, цагдаагийн хурандаа О.Амарсанаа төгсөгчдөд хандан хэлэхдээ:

“Эрхэм хүндэт эрдэмтэн доктор, багш, сурган хүмүүжүүлэгчид, төгсөгчид Та бүхний энэ өдрийн амрыг эрж мэндчилье.

Дотоод хэргийн их сургуулийн Цагдаагийн сургуулийг  “Цагдаагийн ажил-эрх зүйч” мэргэжлээр амжилттай төгсөн, цагдаагийн дэслэгч цолыг гардан авч, төрийн тусгай албанд томилогдсон нийт төгсөгчдөдөө баяр хүргэе.

Өнөөдөр бид Эрүүгийн хэрэг хянан шийдвэрлэх тухай хуульд заасны дагуу мэргэшсэн “шинжээч мөрдөгч”-ийг 2 дахь, “1+1+1” хөтөлбөрөөр “Цагдаагийн ажил-эрх зүй” мэргэжлээр 4 дэх, 4 жилийн сургалттай өдрийн хөтөлбөрөөр 87 дахь удаагийн төгсөгчдөө хүлээн авч, ажил, амьдралынх нь гарааг эхлүүлж байгаадаа туйлын баяртай байна.

Монгол төрийн цагдаагийн байгууллагын түүхт 100 жилийн ойн босгон дээр 160 алба хаагч цагдаагийн байгууллагын хүндтэй бөгөөд эрхэм цолыг хүртэн,  бидэнтэй мөр зэрэгцэн ажиллах гэж байна.

Миний бие Та бүхний нэгэн адил энэхүү сургуулийг одоогоос 20 жилийн өмнө Цагдаагийн академи гэсэн нэршилтэй байхад төгсөж, Төв аймгийн Засаг даргын дэргэдэх цагдаагийн газраас хөдөлмөрийн гараагаа эхэлж байсан үе маань саяхан мэт санагдаж, сэтгэл догдолж байна.

Та бүхэн өөрсдийн сонгосон ажил, мэргэжил, өргөсөн тангарагтаа үнэнч байж, албандаа хүндэтгэлтэй хандан, хуулиар хүлээсэн үндсэн чиг үүргээ нэр төртэй биелүүлж, иргэд, олон нийтийнхээ амар амгалан амьдралын төлөө сурч мэдсэнээ бүтээлчээр хэрэгжүүлж, эрхэлсэн ажилдаа идэвх зүтгэл гарган ажиллана гэдэгт итгэл төгс байна.

Энэхүү албаараа бахархаж дор бүрдээ холбогдох хууль тогтоомжийг сайтар судлан,  үйл ажиллагаагаа хуулийн хүрээнд явуулж, иргэд, олон нийттэй зөв боловсон харьцаж, онол, практикийг хослуулан ажилдаа хурдан дадлагажиж, ахмад үеэсээ суралцаж ажиллахыг зөвлөж байна.  

Цагдаа, дотоодын цэргийн байгууллагын хүний нөөцийн хэрэгцээ шаардлагыг хангасан мэргэжилтнийг бэлтгэн, улс орны үндэсний аюулгүй байдлыг хангахад үнэтэй хувь нэмэр оруулж байгаа Дотоод хэргийн их сургуулийн хамт олондоо талархал илэрхийлье.

Та бүхэнд Цагдаагийн ерөнхий газрын дарга, түүний зөвлөлийн гишүүдийн нэрийн өмнөөс болон хувиасаа ажлын амжилт, эрүүл энх, сайн сайхан бүхнийг хүсэн ерөөе” хэмээв.

 

Бусад мэдээ