Эрүүгийн цагдаагийн албаны түүхт 85 жилийн ойн босгон дээр Эрүүгийн цагдаагийн  газрыг үндэслэн байгуулагч, тус албаны хүндэт чекист, хурандаа Ц.Жамьянсэнгээгийн  дурсамж, дурдатгал амьдралын үнэн түүхийг өгүүлсэн "Зүрх мартаагүй" ном гурав дахиа хэвлэгдлээ. Энэхүү номын дээжийг Ц.Жамьянсэнгээ агсны хүү, Цагдаагийн ерөнхий газрын Хар тамхитай тэмцэх газрын дарга, цагдаагийн хурандаа Ж.Эрдэнэболд  Эрүүгийн цагдаагийн албаны удирдлагууд, алба хаагч нарт гардуулж өгсөн юм.

Номын өмнөтгөлд "Үнэхээр л түүний амьдарч, ажиллаж асан он жилүүдийн тухай сонсоход, уншиж, судлахад эрдэм мэдлэг болоод хүн шиг хүн байх ухааныг гаргууд эзэмшсэн эрдэнэ хадгалсан уул мэт эгэл даруухан нөмөр, хорвоод ховорхон нэгэн байжээ. Тэрээр Монгол Улсынхаа төлөө өргөсөн тангарагтаа хэлбэрэлтгүй үнэнч зүтгэж Монголын цагдаагийн байгууллагыг бэхжүүлэх, Улсын прокурорын газрын ажлыг сайжруулах, хууль ёсыг сахиулах болон гэмт хэрэгтэй тэмцэх ажилд бүхий л амьдралаа зориулсан юм. Эвсэг, хүнлэг, чадварлаг түүнийг ард түмнийхээ итгэл хүндлэлийг хүлээсэн алба хаагч байсныг олон хүн онцлон өгүүлэхтэй таарсан билээ.

Цаг наргүй ажлынхаа дунд зав чөлөөгүй явахдаа ч халамжит хань, хайраа дэвсэж үрсээ хүмүүжүүлсэн аав байсан тухай гэргий, хүүхдүүд нь гэгээн дурсамж хөөрдөг. Тэд хань нөхөр, хайрт аавынхаа гэгээн дурсгалыг шүлэг найраг, кино хальс, ном бүтээлд мөнхжүүлж явна. 2011 онд “Нар сарны зааг” уран сайхны кино бүтээлгэж, 2016 онд Дотоод хэргийн их сургуулийн Гүйцэтгэх ажлын тэнхимийг Хүндэт чекист, цагдаагийн хурандаа Ц.Жамьянсэнгээгийн нэрэмжит болгосон юм. Монгол Улсын Төрийн шагналт, Соёлын гавьяат зүтгэлтэн, Д.Нацагдоржийн шагналт зохиолч Д.Гармаа “Эр зоригийн дууль” түүхэн найрууллыг Ц.Жамьянсэнгээ хурандаад зориулан бүтээсэн байдаг. Үүний сацуу Ц.Жамьянсэнгээ хурандаагийн гэргий С.Нарантуяа ханьдаа зориулан тэрлэсэн шүлгээ зохиолч Д.Гармаа гуайд үзүүлж, уншуулснаар “Гэргийн сэтгэлийн өчил” найраглал бүтсэн түүхтэй ажээ.

Хурандаа Ц.Жамьянсэнгээгийн туслах төлөөлөгчөөс эхлээд газрын дарга хүртэл бүх шатны албан тушаалд нь сэтгэл, зүтгэл, итгэлээ зориулж ажилласан Эрүүгийн цагдаагийн албаны түүхт 85 жилийн ой энэ онд тохиож байна. Энэхүү түүхт ойг тохиолдуулан түүний хань, үр хүүхдүүдийн санаачилгаар 2010 онд бүтээсэн “Зүрх мартаагүй” номыг “Зохист дорно” хэвлэлийн газрын эх бэлтгэгч, эх хэлний редактор, сэтгүүлч нартай хамтран бүтээлээ.

Хүндэт чекист, цагдаагийн хурандаа Ц.Жамьянсэнгээ хэмээх эрхэм хүмүүний тухай ой дурдатгал, оюун бодол, зүрх сэтгэлдээ тээж явсан гэрэлт дурсамжуудаа “Зүрх мартаагүй” номд өгүүлсэн хүн бүхэнд гүн талархал илэрхийлье" хэмээн бичжээ.