"Хүүхэд хамгаалагч төсөл", "Зөв тусгал" хөдөлгөөний нээлт боллоо

2019-05-01

Хүүхдийг зодож шийтгэхийг таслан зогсоох дэлхийн өдөр жил бүрийн 04 дүгээр сарын 30 ны өдөр тохиодог. Энэ өдөр эцэг эхчүүд, багш сурган хүмүүжүүлэгчид хүүхэдтэйгээ хэрхэн харилцаж, хүмүүжүүлж байгаагаа эргэцүүлэн бодох, хүн бүрт хүүхэд хүүхэд хүмүүжүүлэх эерэг аргуудыг эрэлхийлэхийг уриалдаг билээ.  Хөдөлмөр Нийгэм Хамгааллын Яам Цагдаагийн ерөнхий газартай хамтран хэрэгжүүлэх "Хүүхэд хамгаалагч" төсөл, " Зөв тусгал" хөдөлгөөнийг нээлт боллоо.

Нээлтийн үйл ажиллагаанд  Монгол Улсын Ерөнхийлөгч , Хөдөлмөр, Нийгмийн хамгааллын сайд болон бусад салбарын төлөөлөлүүд оролцлоо.

“Хүүхэд таныг биш, та хүүхдийг ойлгох ёстой” 

Улсын хэмжээнд сүүлийн 3 жилийн байдлаар 2833 хүүхэд гэмт хэрэг үйлдэж, 4922 хүүхэд гэмт хэрэгт өртөж, хохирсон байна. Тухайлбал: хүүхэд ихэвчлэн Хүний эрүүл мэндийн халдашгүй байдлын эсрэг гэмт хэрэг буюу зодолдох, танхайрах, Өмчлөх эрхийн эсрэг гэмт хэрэг болох хулгайлах, залилах, дээрэмдэх гэмт хэрэг үйлдэн шалгагдаж байгаагаас дийлэнх нь 16-18 насных байна. Мөн хүүхэд зодолдох, танхайрах, хүчиндэх, хулгайлах, залилах, дээрэмдэх гэмт хэргийн улмаас хохирч байгаа болно.

Цагдаагийн байгууллага хүүхдийн эсрэг гэмт хэргээс урьдчилан сэргийлэх, бууруулах чиглэлээр олон ажил, арга хэмжээг тогтмол зохион байгуулж байгаа болов ч хангалттай үр дүнд хүрэхгүй, төрийн болон төрийн бус байгууллагын хамтын ажиллагаа дутагдалтай байна. Энэ ч утгаар Монгол Улсын Ерөнхийлөгч 2019 ны 60 дугаар зарлигаар 2019 оныг “Хүүхдийн хөгжил, хамгааллын жил” болгосон нь хүүхдийн эрхийг хангах, зөрчигдсөн эрхийг сэргээх, хүүхэд хамгааллын чиглэлээр хийгдэж байгаа ажлыг эрчимжүүлэхэд чухал ач холбогдолтой болсон.

Цагдаагийн байгууллага гудамж талбайд үйлдэгдэж байгаа гэмт хэрэг, зөрчлийн гаралтыг бууруулах, хүүхэд гэмт хэрэг, зөрчилд өртөж болзошгүй эмзэг цэгүүдийг иргэд, олон нийтийн оролцоотой хяналтад авах зорилгоор “ХҮҮХЭД ХАМГААЛАГЧ” төслийг Хөдөлмөр, нийгмийн хамгааллын яамтай хамтран энэ оны 05 дугаар сарын 01-ний өдрөөс улсын хэмжээнд хэрэгжүүлж эхэлнэ.

Түүнчлэн хүүхдийн эрхийг хамгаалах, аливаа эрсдэлээс сэргийлэх, эерэг аргаар хүмүүжүүлэх, ёс суртахууныг гэр бүлд нь төлөвшүүлэх, гэр бүлийн боловсрол олгох чиглэлээр олон нийтийг соён гэгээрүүлэх, эцэг эхийн үүрэг оролцоог нэмэгдүүлэх, хүүхдийн хүмүүжил төлөвшилд сөргөөр нөлөөлж байгаа шалтгаан нөхцөлийг арилгах чиглэлээр “ЗӨВ ТУСГАЛ” хөдөлгөөнийг өнөөдрөөс эхлэн /2019-04-30/ нэг сарын хугацаанд улсын хэмжээнд зохион байгуулах ажлыг эхлүүлж байна.

Дээрх хөдөлгөөнийг Дэлхийн Зөн Монгол  Олон Улсын Байгууллагаас санаачлан Монгол Улсад Гэмт хэргээс урьдчилан сэргийлэх ажлыг зохицуулах зөвлөл, Цагдаагийн ерөнхий газар, Гэр бүл, хүүхэд, залуучуудын хөгжлийн газар, НҮБ-ын Хүүхдийн сан, хамтран хэрэгжүүлэх юм.

Arslan.mn