ХОШУУЧ ГЕНЕРАЛ Б.ПҮРЭВИЙН АМЬДРАЛААС СЭДЭВЛЭН БҮТЭЭСЭН “ЦАГААН ШОНХОР” БАРИМТАТ КИНОНЫ НЭЭЛТ БОЛЛОО

Монгол Улсын гавьяат хуульч, Хууль зүйн ухааны доктор, профессор, хошууч генерал Б.Пүрэвийн ажил, амьдралаас сэдэвлэн бүтээсэн “Цагаан шонхор” баримтат киноны нээлт өнөөдөр /2018.02.05/ Сүлд чуулгад боллоо.
Нээлтийн ёслолын үйл ажиллагаанд Хууль сахиулахын их сургуулийн дэд захирал, цагдаагийн хурандаа Б.Бат-Эрдэнэ, ЦЕГ-ын Санхүү аж ахуйн албаны дарга, цагдаагийн хурандаа Ж.Эрдэнэболд, киноны зохиолч уран бүтээлчид , цагдаагийн байгууллагын алба хаагчдын төлөөлөл оролцсон юм.

Баримтат киноны нээлтийн үеэр гол баатар, хошууч генерал Б.Пүрэв “Бүрэн зохист” продакшн, Хууль сахиулахын их сургууль хамтран бүтэн жилийн турш бүтээсэн. Гүн талархаж байна. Хууль сахиулахын Их сургуулийн хамт олон, дэмжиж, тусалсан Цагдаагийн ерөнхий газрын бие бүрэлдэхүүн болоод киног бүтэхэд оролцсон, хичээл зүтгэл гаргасан хүн бүхэнд баярлалаа. Уран бүтээлчдийн хийсэн бүтээл таалагдсан. Санаанд таараагүй ганцхан юм бий. Тэр нь киног хийхээр цуглуулсан эх материалаас нэлээн хэмжээнийх багтаж ороогүйд байгаа юм. Хүний амьдралд эргэлт гэж байдаг. Миний амьдралд гарсан тэрхүү эргэлт бүрээр киногоо хөтөлж хийсэн нь онцлог, сэтгэлд тааламжтай байлаа” гэж хэлсэн юм.

Энэхүү киноны зохиолыг Ц.Оюундарь бичсэн. Тэрбээр “Бид монголын цагдаагийн байгууллагын дарга нарын амьдрал, үйлсээс сэдэвлэсэн гурав дахь киногоо бүтээж ийнхүү амжилттай нээлээ. Хошууч генерал Б.Пүрэв хэмээх энэ хүний түүхээр дамжуулан Монголын орчин үеийн цагдаагийн түүх өгүүлэгдэж байгаа юм. Монгол Улсын түүхийн маш эгзэгтэй, шилжилтийн үед хэрхэн зөв шийдвэрийг гаргаж, төрийн хүний голч нурууг барьж ажиллаж чадсан эрхмийн түүхийг өгүүлнэ. Энэхүү киноноос одоо цаг үеийн залуус их зүйлийг мэдэж, сурч авна гэдэгт итгэлтэй байна” гэлээ.
“Цагаан шонхор” баримтат киног “Бамбай секьюрити” компани ивээн тэтгэж ажилласан байна.

Хошууч генерал Б.Пүрэв цагдаагийн байгууллагын тухай хуулийг гардан боловсруулж, УИХ-аар хэлэлцүүлэн батлуулсан, цагдаагийн байгууллагыг бэлгэдэлтэй болгосон гээд цагдаагийн байгууллагын хөгжилд тал бүрийн үнэтэй хувь нэмэр оруулсан талаар үе үеийн удирдлагууд, алба хаагчид бахархан дурсдаг юм.