Монгол Улсын Хүний эрхийн Үндэсний Комисс Цагдаагийн ерөнхий газартай хамтран ажиллах Санамж бичгийг гурав дахь удаагаа байгуулж, ирэх гурван  жилд хамтын ажиллагаагаа үргэлжлүүлэхээр боллоо.

Талууд жил бүр тусгай төлөвлөгөө гарган хамтран сургалт, сурталчилгаа, хяналт шалгалтыг зохион байгуулж, уг ажиллагаа нь хэвшил, уламжлал болон тогтсон, цагдаагийн байгууллагын ажилтнуудыг хүний эрхийн сургагч багшаар бэлтгэсэн, мөн олон удаагийн хяналт шалгалтын үр дүнд илэрсэн зарим зөрчлүүд, тухайлбал, эрүүдэн шүүхтэй холбоотой гомдол эрс цөөрсөн эерэг үзүүлэлтүүд гарсан тул энэхүү бичгийг үргэлжлүүлэхээр болсон хэмээн Цагдаагийн ерөнхий газрын удирдлагууд дүгнэлээ.

Хүний эрхийн Үндэсний Комиссын зүгээс "Юуны түрүүнд шинэ хууль тогтоомжийн дагуу цагдаагийн байгууллагын ажилтнууд мөрдөгчийн статустай болж байгаатай уялдуулан байцаан шийтгэх ажиллагаа явуулахад хүний эрхийн зөрчил үүсэхээс урьдчилан сэргийлэх, үүнд тусгайлан тоноглосон зориулалтын өрөөнд байцаалт авах нөхцөл боломжийг бүрдүүлэх, хэвшүүлэхэд анхаарах, эрүүлжүүлэх, баривчлах байруудын ариун цэвэр, орчин нөхцлийг сайжруулах, цагдаагийн алба хаагчдын хөдөлмөрлөх эрхийн асуудлыг шийдвэрлэх, дотоод хяналтын албыг чухалчлах, хэрэг бүртгэл, мөрдөн байцаалтын явцад удаан хугацаагаар, үндэслэлгүйгээр хорьж саатуулах явдлыг цэгцлэх шаардлагатай” зэргийг чухалчлан үзэж буйгаа илэрхийлж байв.

Санамж бичиг байгуулах, үр дүнг хэлэлцэх уулзалт 2017 оны 12 дугаар сарын 19-нд болсон бөгөөд уулзалтад Монгол Улсын Хүний эрхийн Үндэсний Комиссын дарга Ж.Бямбадорж, ХЭҮК-ын гишүүн П.Оюунчимэг, Ажлын албаны дарга Ч.Алтангэрэл болон хэлтсийн дарга нар, ЦЕГ-ын дарга, цагдаагийн хурандаа С.Баатаржав, ЦЕГ-ын захиргааны удирдлагын газрын дарга, цагдаагийн хурандаа Б.Бат-Өлзий, ЦЕГ-ын Хэрэг бүртгэх албаны дарга, цагдаагийн хурандаа  А.Амгалан, Мөрдөн байцаах албаны дарга, цагдаагийн хурандаа П.Батбаатар, ЦЕГ-ын төлөвлөлт, зохион байгуулалтын хэлтсийн дарга, цагдаагийн хурандаа Б.Гантулга нар оролцлоо.

Энэхүү Санамж бичиг нь цагдаагийн байгууллагын үйл ажиллагаатай холбогдсон харилцаанд оролцогчдын эрхийг хангах, хамгаалах, эрүүгийн хэрэг хянан шийдвэрлэх ажиллагаан дахь хүний эрхийн зөрчлөөс урьдчилан сэргийлэх, таслан зогсоох, сахилга хариуцлагыг сайжруулах, цагдаагийн алба хаагчдын хүний эрхийн мэдлэг, ойлголтыг дээшлүүлэх, байгууллагууд хоорондын хамтын ажиллагааг бэхжүүлэх зорилготой юм.

Энэ үеэр Цагдаагийн ерөнхий газрын дарга, цагдаагийн хурандаа Б.Баатаржав:

"Цаашид цагдаагийн байгууллагын үйл ажиллагаатай холбогдсон харилцаанд оролцогчдын эрхийг хангах, хамгаалах, эрүүгийн хэрэг хянан шийдвэрлэх ажиллагаан дахь хүний эрхийн зөрчлөөс урьдчилан сэргийлэх, таслан зогсоох, алба хаагчдын хүний эрхийн мэдлэг, ойлголтыг дээшлүүлэхэд үнэтэй зөвлөгөө, зөвлөмж өгч, санал бодлоо харилцан солилцож, дэмжлэг үзүүлж, хамтын ажиллагаа улам өргөжинө гэдэгт итгэл төгс байна" гэж онцоллоо