Өвөрхангай аймгийн Гэмт хэргээс урьдчилан сэргийлэх ажлыг зохицуулах зөвлөл, Цагдаагийн газар нь “Өвөрхангай аймгийн хэмжээнд үйлдэгдэх гэмт хэрэг, зөрчилтэй тэмцэх, урьдчилан сэргийлэх ажлыг шинжлэх ухааны үндэслэлтэй судлуулж, үр дүнг цаашдын үйл ажиллагаандаа хэрэгжүүлэх” чиглэлээр Хууль Сахиулах Их Сургуулийн Криминологи судалгаа, мөрдөх албаны тэнхимтэй хамтран ажиллаж байна.

Судалгааны зорилго нь Монгол Улсын Их хурлаас эрх зүйн шинэтгэлийн хүрээнд суурь хуулиуд шинэчлэн батлагдсантай холбогдуулж, Өвөрхангай аймгийн хэмжээнд үйлдэгдэж байгаа гэмт хэрэг, зөрчлийн шалтгаан нөхцөл, нөлөөлөх хүчин зүйлс, түүнтэй тэмцэх, урьдчилан сэргийлэх үйл ажиллагааны өнөөгийн байдлыг криминологийн шинжлэх ухааны үүднээс үнэлж, дүгнэн цаашид орон нутгийн хэмжээнд шинжлэх ухааны үр дүнд суурилсан үйл ажиллагааг хэрэгжүүлэх юм.

Энэхүү судалгааны ажлын хүрээнд өнөөдөр аймгийн Гэмт хэргээс урьдчилан сэргийлэх ажлыг зохицуулах зөвлөлийн хуралд Хууль сахиулах Их сургуулийн мөрдөх албаны тэнхимийн багш Л.Цогтбаяр, Гэмт хэргээс урьдчилан сэргийлэх сангийн судлаачид хүрэлцэн ирж, судалгааны ажлын явцын тайлан, 32 заалт бүхий зөвлөмжийг танилцуулав.

Уг танилцуулагдаа судалгааны ажлын хүрээнд Өвөрхангай аймгийн гэмт хэрэг, зөрчлийн статистик мэдээ, гэмт хэргийн өнөөгийн байдал, төрөл, түүний шалтгаан, нөхцөл, нөлөөлөх хүчин зүйл, төв орон нутгийн захиргааны байгууллагуудын гэмт хэрэгтэй тэмцэх, түүнээс урьдчилан сэргийлэх чиглэлээр авч буй ажлын тайлан, гадаад улс орны гэмт хэргээс урьдчилан сэргийлж байгаа туршлага зэргийг судалгааны зүйл болгон авч дүн шинжилгээ хийсний эцэст аймгийн хэмжээнд гэмт хэргээс урьдчилан сэргийлэх чиглэлээр хэрэгжүүлэх ажлыг оновчтой тодорхойлох ач холбогдолтой талаар дурьдаж, цаашид судлагааны ажилд шаардагдах ажлын талаараа санал солилцсон юм.

Энэ хуралд аймгийн ИТХ-ын дарга А.Ишдорж, Хууль эрх зүйн хэлтсийн дарга А.Отгонцэцэг, Прокурор, Шүүхийн тамгын газар, Цагдаагийн газар, Тагнуулын хэлтэс, Мэргэжлийн хяналтын газар, Шүүх, шинжилгээний албаны дарга, удирдлагууд оролцсон юм.