Зөрчлийн тухай хууль, Замын хөдөлгөөний аюулгүй байдлын тухай хуулийг сурталчлан таниулах, сургуулийн насны хүүхдийг зам тээврийн осолд өртөж, хохирохоос урьдчилан сэргийлэх, хүүхдийг замын хөдөлгөөнд аюулгүй оролцох дадал хэвшил эзэмшүүлэх, багш, нийгмийн ажилтан нарын үүрэг, хариуцлагыг дээшлүүлэх зорилгоор 10 хоногийн хугацаатай “Замын хөдөлгөөн ба хүүхэд” хэсэгчилсэн арга хэмжээг зохион явуулж байна.

Арга хэмжээний хүрээнд ерөнхий боловсролын 10 сургуулийн захирал, нийгмийн ажилтан нарт замын хөдөлгөөний аюулгүй байдлын тухай 2 цагийн танхимийн сургалт зохион байгуулж, бага ангийн 26 сурагчийг тусгай гэрэлтдэг “Аюулгүй гэрэлтүүлэгч ханцуйвч”-ийг хэрэглэх талаар биет дадлага сургуулилтыг явуулав.

Аймгийн Албан журмын даатгагчдын холбоо 600 ширхэг тусгай гэрэлтдэг “Аюулгүй гэрэлтүүлэгч ханцуйвч”-ийг хийлгэж, сурагчдад олгож байгаа ба “Аюулгүй гэрэлтүүлэгч ханцуйвч”-ийг хэрэглэж хэвшснээр сургуулийн насны хүүхдүүд зам тээврийн осолд өртөж, хохирохоос урьдчилан сэргийлж чадах юм.