Сэлэнгэ аймгийн Мандал сумын Хэрх тосгоны хэсгийн төлөөлөгч, цагдаагийн дэслэгч Ч.Баттулга, гэргий Э.Хандаа нарын залуухан гэр бүл өдгөө 4 ихэр хүүхдээ өлгийдөж аваад байгаа билээ. Үрийн заяа түшиж, жаргал бялхсан өнөр бүлийн тэргүүн, цагдаагийн бие бүрэлдэхүүнд бүл нэмсэн алба хаагч. Өнөөдөр Цагдаагийн ерөнхий газрын дарга, дотоодын цэргийн командлагч, бригадын генерал Б.Билэгт, ЦЕГ-ын захиргааны удирдлагын газрын дарга, цагдаагийн хурандаа Д.Адъяабазар нар Эх нялхсын эрдэм шинжилгээний төвд очин ихрүүдийг эргэж алба хаагчдаа баяр хүргэлээ. ЦЕГ-ын зүгээс хоёр өрөө байр, мөнгөн шагналаар шагнаж, орон нутагтаа алба хааж байсан ихрүүдийн аав Ч.Баттулгыг Улаанбаатар хотод ажил үүргээ үргэлжлүүлэн гүйцэтгэх боломжийг олголоо.
Ихрүүдэд олон байгууллага, хувь хүний зүгээс чин сэтгэлийн бэлгээ хүргүүлж байгаа бөгөөд анх эх барьж авсан эх нялхсын эрдэм шинжилгээний төв нь 18 насанд хүртэл нь өөрийн эмнэлэгт үнэ төлбөргүй эмчилэхээр болсон байна. Ихрүүд болон ээжийнх нь биеийн байдал сайн байгаа бөгөөд тэд тусгай өрөөнд асруулж байгаа юм байна.
Манай улсад дөрвөн ихэр хүүхэд мэндэлсэн анхны тохиолдол энэ болоод байгаа ба хууль эрх зүйн хувьд урд өмнө нь гурван ихэр хүүхдийг улсаас харж хандах тухай зохицуулалт байдаг байсан одоо дөрвөн ихрийг асрах тухай ахин нэгэн журам батлагдан гарах нь ээ.

Монгол үрс маш олон болох болтугай!