ЦАГДААГИЙН АЛБА ХААГЧ НАРТ ЦОЛ, ШАГНАЛ ГАРДУУЛЛАА

Америкийн Нэгдсэн улсын Лос Анжелос хотод зохион байгуулагдсан цагдаа, галын байгууллагын дэлхийн аварга шалгаруулах Олон улсын тэмцээнд амжилттай оролцсон болон гал үерийн аюулаас иргэдийн амь насыг авран хамгаалсан алба хаагчдыг "Хууль зүйн албаны тэргүүний ажилтан", "Цагдаагийн алдар" тэмдгээр шагналаа.
Мөн Нэгдсэн Үндэстний Байгууллагын мандаттай Энхийг сахиулах ажиллагааны Монгол Улсын Зэвсэгт хүчний цэргийн 6-р ээлжийн багт амжилттай үүрэг гүйцэтгэсэн алба хаагчдыг Цагдаагийн Ерөнхий газрын даргын тушаалаар "Цагдаагийн гавьяа" тэмдэг, "Хүндэт жуух" бичиг, "Баярын бичиг"-ээр тус тус шагнасан юм.

"Цагдаагийн төлөө" тэмдгээр Нийтийн хэв журам хамгаалах газрын хамгаалалтын газрын дарга, цагдаагийн дэд хурандаа Х.Ууганбаяр, Хан-уул дүүрэг дэх цагдаагийн нэгдүгээр хэлтсийн мөрдөн байцаах тасгийн дарга, цагдаагийн дэд хурандаа Л.Эрдэнэцогт нарыг шагналаа. "Цагдаагийн гавьяа" тэмдгээр "Хүч" спорт хорооны дасгалжуулагч, цагдаагийн ахмад М.Уранцэцэг, мөн хорооны туслах дасгалжуулагч, цагдаагийн ахлах ахлагч О.Энхсайхан, "Спортын алдар" тэмдгээр Хууль сахиулахын их сургуулийн Цагдаагийн сургуулийн Гүйцэтгэх ажлын тэнхимийн багш, цагдаагийн хошууч Р.Баярмагнай шагнагдлаа.

Хугацааны өмнө "Цагдаагийн ахлах дэслэгч" цолоор Хууль сахиулахын их сургуулийн Ахлагчийн сургуулийн Тактик, тусгай бэлтгэлийн тэнхимийн дасгалжуулагч-багш цагдаагийн дэслэгч Ш.Алтанбагана, "Цагдаагийн дэслэгч" цолоор Нийслэлийн цагдаагийн газрын Хэв журам хамгаалах газрын эргүүл хамгаалалтын тасгийн морьт, нохойт эргүүлийн цагдаа, цагдаагийн ахлах ахлагч Э.Халиунболд, Хамгаалалтын газрын Тусгай хамгаалалтын хэлтсийн хамгаалалтын цагдаа, цагдаагийн ахлагч Б.Бишрэл нарыг тус тус шагналаа
Гавьяа байгуулан шагнагдсан бүх алба хаагч нартаа ажлын амжилт хүсье