12 дугаар сарын 22-ны өглөө 10 цагт Эх нялхаст дөрвөн ихэр хүүхэд мэндэлжээ. Дөрвөн ихэр хүүхэд тэр бүр мэндлээд байдаггүй бөгөөд тун ховор тохиолын нэг болоод байгаа юм. Ихрүүдийн гурав нь охин нэг нь хүү аж.

Ихэр хүүхдүүдийн ээжийг н.Хандсүрэн гэдэг бөгөөд аавыг нь Ч.Баттулга гэдэг юм байна. Ч.Баттулга нь Сэлэнгэ аймгийн Ерөө сумын харьяат, энэ оны хавар Хууль сахиулахын их сургуулийг төгссөн залуухан дэслэгч юм. Тэрээр Ерөө сумандаа цагдаа хийдэг аж.

Тэгвэл гэргий Хандсүрэн нь мөн л Сэлэнгэ аймгийн Бугант тосгоных юм билээ. Ч.Баттулга Сэлэнгэ аймгийн Мандал сумын Хэрх тосгонд долдугаар сард хэсгийн төлөөлөгчөөр томилогдон ирж ажиллаж байгаа гэнэ. Түүнтэй утсаар холбогдон сэтгэгдлийг нь сонсоход "Үнэхээр гайхалтай сайхан байна. Амьдралд минь тохиосон томоохон баяруудын нэг нь дөрвөн ихэр хүүхэд маань боллоо. Шинэ оныг үүнээс илүү ямар бэлгээр угтах вэ дээ. Эхнэр маань амарч, хүүхдүүд унтаж байна” гэсэн юм.

Ихрүүд эрүүл саруул төрсөн бөгөөд 1.7 кг жинтэй төрсөн хүүгийн бие тааруу байгаа тул тусгаарлан эрчимтэй эмчилгээ хийж байгаа гэнэ. Ээжийнх нь бие сайн байна гэж эмч нар мэдээлэв.

Гэргий Хандсүрэн нь ой долоон сартай охиноо асарч, хараахан ажилд орж амжаагүй байжээ. Ийн ихрийн удамтай гэр бүл дөрвөн шинэ хүнээр бүл нэмж, ой долоохон сартай охин дөрвөн дүүтэй боллоо.

Манай улсад өмнө нь дөрвөн ихэр хүүхэд төрж байсан эсэхийг Үндэсний статистикийн хорооны Хүн ам, орон сууцны тооллогын товчооны дарга А.Амарбалаас тодруулахад, “Дөрвөн ихэр хүүхэд амьд төрж, бүртгүүлсэн тохиолдол үгүй. Монгол Улс анх удаа дөрвөн ихэр хүүхэд бүртгэлээ” гэв.

Ихрүүдийн хэсэг хугацаанд эмнэлгийн хяналтад эмчлэх бөгөөд цаашид гэртээ гарах, эсвэл улсын асрамжид оруулах талаар ярилцах юм байна.

Ийнхүү Монголын хөх тэнгэр дор нэгэн бүл тулганы галаа бадраагаад удаагүй байгаа ч үйл мэтгэх гурван охин, хил манах нэг хүү төрлөө. Монголын үрс маш олон болтугай.