100 жил
ЦАГДААГИЙН ЕРӨНХИЙ ГАЗРААС МЭДЭЭЛЖ БАЙНА
ЦАГДААГИЙН ЕРӨНХИЙ ГАЗРААС МЭДЭЭЛЖ БАЙНА.
Цагдаагийн Ерөнхий газрын дарга, цагдаагийн хурандаа Ө.Энхтөр БНХАУ-ын ӨМӨЗО-ны Засаг захиргааны дэд тэргүүлэгч, Нийгмийг аюулаас хамгаалах тэнхимийн дарга Ма Мин тэргүүтэй төлөөлөгчдийг өнөөдөр /2017.08.15 / хүлээн авч уулзлаа.
Уулзалтын үеэр хоёр улсын цагдаагийн байгууллагын үйл ажиллагааны хамтын ажиллагаа, хэрхэн өргөжүүлэх, хамтран ажиллах талаар санал солилцлоо. Мөн энэ өдөр Хууль зүй, дотоод хэргийн /ХЗДХ/ сайд С.Бямбацогт хүлээн авч уулзаж, хар тамхи, хил дамнасан, цахим, хүн худалдаалах гэмт хэргээс урьдчилан сэргийлэх, тэмцэх чиглэлд цаашид хамтран ажиллах сонирхолтой байгаагаа илэрхийлж, ӨМӨЗО хяналтын камерын системийг ашиглаж гэмт хэргийн гаралт, тоог бууруулсан сайн жишгийг Монгол Улсад нутагшуулах сонирхолтой байгаагаа С.Бямбацогт сайд онцоллоо.
ӨМӨЗО-ны Хөх хот нь гурван сая хүн амтай бөгөөд гэмт хэрэг, зөрчлөөс сэргийлэх хяналтын камерын системийг суурилуулснаар гэмт хэрэг, зөрчил 30 хувиар буурч, илрүүлэлт 17 хувиар өссөн байна. Түүнчлэн энэхүү камерын хяналын системийг ажиллуулж эхэлснээс хойш 200 хоногийн хугацаанд ӨМӨЗО-ны цагдаагийн байгууллагад нэг ч гэмт хэрэг, зөрчлийн дуудлага ирээгүйг Нийгмийг аюулаас хамгаалах тэнхмийн дарга Ма Мин ярьсан юм.
Өөрөөр хэлбэл, гэмт хэргээс урьдчилан сэргийлэх, тэмцэхэд орчин үеийн техник, технологийн шийдлийг ашиглах нь “гар нүцгэн” тэмцэхээс хувь илүү үр дүнтэйг ч төлөөлөгчид дурьдсан.
Тиймээс ӨМӨЗО-ны Нийгмийг аюулаас хамгаалах тэнхмийн дарга Ма Мин манай холбогдох албаныхантай хамтран БНХАУ-тай хил залгаа зарим аймгуудад туршилтын журмаар хяналтын камерын системийг суурилуулна гэлээ. Хэрвээ гэмт хэргийн гаралт буурч, үр дүнгээ өгч байвал нийслэлийн хэмжээнд хэрэгжүүлэхэд бүх талаар дэмжлэг үзүүлнэ гэсэн юм.
ӨМӨЗО-ны Ма Мин тэргүүтэй төлөөлөгчид ЦЕГ-ын үйл ажиллагаатай танилцаж, "Хамтын ажиллагааны тухай Монгол Улсын цагдаагийн Ерөнхий газрын Эрүүгийн цагдаагийн алба болон Бүгд Найрамдах Хятад Ард Улсын Өвөр Монголын Өөртөө Засах Орны Нийгмийг аюулаас хамгаалах тэнхим хоорондын харилцан ойлголцлын санамж бичиг"- т гарын үсэг зурлаа.
