Цагдаагийн байгууллагын шинэчлэлийн бодлогыг ард иргэдэд таниулах, ажил мэргэжлийн онцлогийг  үнэн бодитоор хүргэх, цагдаа-иргэдийн хамтын ажиллагааг сайжруулах, Монголын гэрэл зургийн түүхийг цагдаагийн алба хаагчдын сэдэвт гэрэл зургаар баяжуулах зорилгоор Цагдаагийн ерөнхий газар, Үндэсний гэрэл зургийн танхимтай хамтран зохион байгуулсан “Амрыг эрье” сэдэвт гэрэл зургийн уралдаан 40 хоногийн хугацаанд  явагдаж дууслаа.

Уралдаанд оролцогч цагдаагийн алба хаагч болон энгийн иргэдээс цагдаагийн өдөр тутмын үүрэгт ажил, ар тал, ахуй амьдралыг тусган харуулсан, зохиомжит болоод бодит гэхчилэн олон төрлийн шинэ санаа шийдэл агуулсан 49 хүний 200 гаруй зургийг ирүүлсэн байна.

Гэрэл зургийн энэхүү уралдаанд цаг заваа гарган, идэвхи санаачилгатай оролцож бүтээлээ ирүүлсэн нийт алба хаагчид болон гэрэл зураг сонирхогч иргэд, түүнчлэн Дорнод, Булган, Архангай, Орхон аймгийн бүтээлч иргэд, гэрэл зургийн Гамма агентлаг, Үндэсний гэрэл зургийн танхимын уран бүтээлчид, УИХ-ын гишүүн М.Зоригт, www.zugii.mn сайтын хамт олон зэрэг олон хувь хүн байгууллага оролцсон юм. Олны мэдэх гэрэл зурагчин Тошка, Батцэрэн, Харцага, Төрбат зэрэг мэргэжлийн өндөр ур чадвартай уран бүтээлчид бүтээлээ ирүүлэн өрсөлдлөө.

“Амрыг эрье” гэрэл зургийн үзэсгэлэн 12 дугаар сарын 6-ны өдрийн 12 цагт Монголын үндэсний түүхийн музейд нээлтээ хийж, цагдаагийн байгууллагын удирдлага, уран бүтээлийн Гамма агентлаг, Монголын гэрэл зургийн танхим, гэрэл зураг сонирхогч иргэд, Хууль сахиулахын их сургуулийн сонсогч нар болоод хэвлэл мэдээллийн байгууллагууд оролцлоо.

Уралдааны дүн гарахад нэгдүгээр байрыг ЗЦГ-ын Урьдчилан сэргийлэх хэлтсийн алба хаагч Н.Пүрэвдорж бодит үйл явдлын зургаар,  2 дугаар байрыг “Гамма” агентлагийн зурагчин Д.Давааням, гуравдугаар байрыг “Жи Монгол” гэрэл зургийн агентлагийн гэрэл зурагчин Ш.Гэрэлсайхан нарын бүтээл, тусгай байрыг чөлөөт уран бүтээлч В.Баттулга, н.Уугансүх нар өөрсдийн бүтээлээр эзэлж шагналын эздээр тодорлоо.

Та энэхүү үзэсгэлэнгээс Монголын цагдаагийн байгууллагын түүхэн дахь анхны арван тавны цагдаагийн хувцас хэрэглэлээс эхлээд орчин цагийн алба хаагчдын хувцас загвар, тусгай хэрэгсэлтэй танилцах болно. Цагдаагийн алба хаагчийн хувцасны тухайд цагдаагийн байгууллагын үйл ажиллагааг шинэчлэх ажлын хүрээнд “Цагдаагийн алба хаагчдын хувцасны загвар, материалыг сайжруулан шинэчлэх тухай” Монгол Улсын Ерөнхийлөгчийн 2013 оны 9 дүгээр сарын 4-ний өдрийн 143 дугаар зарлиг батлагдсан нь эдүгээ бидний танил болж амжаагүй шинэ цагийн цагдаагийн алба хаагчийн өнгө төрх болох юм. Үүнийг хэн бүхнээс түрүүлж үзэх боломжийг “Амрыг эрье” гэрэл зургийн үзэсгэлэн Танд нээлттэй олгож байна. 

Үзэсгэлэнд тавигдсан эдгээр бүтээлийг мөн нийслэл, дүүргүүдийн цагдаагийн газар, хэлтсүүдээр аялуулж алба хаагчид болон тухайн хэлтсүүдээр үйлчлүүлж байгаа иргэдэд сонирхуулах юм.

Гэрэл зургийн үзэсгэлэн Монголын Үндэсний түүхийн музейд өнөөдрөөс эхлээд 12 дугаар сарын 10-ны хүртэл 5 хоногийн хугацаанд иргэдэд нээлттэй явагдана.

 ЦЕГ-ЫН ХЭВЛЭЛ, МЭДЭЭЛЛИЙН ТӨВ