“Хамгийн анх Баатархүү хурандаагийнхаа удирдлагад ажлын гараагаа эхэлж, одоо арав гаруй жил ажиллажээ. Мэдээлэл хүлээн авагч, конторын цагдаа гээд бидний ярьдгаар нэгж дээр тууштай ажиллаж, одоо дүүргийнхээ 4 дүгээр хорооны цагдаа, хэлтсийнхээ “Эмэгтэйчүүдийн зөвлөл”-ийн даргын албыг хашиж байна. Иргэд ихэнхдээ хорооны цагдаагийн ажлаар цагдаагийн байгууллагын ажил албыг дүгнэж харж ойлгодог. Иймээс бидний уйгагүй ажил, эргүүл хамгаалалт, судалгаа, айл өрх, иргэн бүртэйгээ хамтарч ажиллах, гэмт хэргээс урьдчилан сэргийлэх үүрэг тасралтгүй үргэлжилдэг дээ” гэж даруухан өгүүлэх энэ бүсгүй цагдаагийн байгууллагад 14 дэх жилдээ ажиллаж байна.

Тэрбээр дөрвөн хүүхдээ өсгөж хүмүүжүүлэн, Онцгой байдлын Ерөнхий газарт алба хашдаг ханийнхаа түшиг тулгуур болж, хорооныхоо иргэдийн амар тайвныг сахиулахын төлөө хоёргүй сэтгэлээр ажилласаар байгаа юм. Цагдаагийн ажил цаг наргүй л гэдэг. Хэдийгээр хаана, хэзээ ямар гэмт хэрэг үйлдэгдэх нь таашгүй ч бидний ажил бүхэн төлөвлөгөөтэй. Сайн төлөвлөж, санаа нэгдэж, ажлаа илтгэж тайлагнаж, ард иргэдтэйгээ ойлголцож, хамтарч ажиллахад болохгүй, бүтэхгүй юм гэж үгүй гэсэн өөдрөг бодолтой энэ бүсгүй шиг олон бүсгүй цагдаагийн албанд байдаг.

“Сүхбаатар дүүрэг дэх цагдаагийн нэгдүгээр хэлтсийн нэг онцлог нь их жанжин Сүхбаатарын талбай нутаг дэвсгэрт нь харьяалагддаг. Төр засгийн томоохон арга хэмжээ, тэмдэглэлт үйл явдал, жагсаал цуглаан гээд олон ажил байдаг. Энэ бүхэнд залуустайгаа мөр зэрэгцэн эргүүл хамгаалалтад гарч, эмэгтэйчүүдийн зөвлөлийн ажлаа санаа зорилго нэгтэй сайхан бүсгүйчүүдтэйгээ хамт зохион байгуулж тэднээсээ их урам зориг авдаг даа. Ямар ч ажил мэргэжлийн хүмүүс байсан бие биенээ хүндлэж хайрлаж, ажил албандаа үнэнчээр зүтгэвэл хариулт нь сайхан энерги байдаг” гэж цагдаагийн ахлах ахлагч Н.Төгсбаяр эгч онцолсон юм. Өдөр болгон баяр хөөртэй, урам зоригтой байхыг бүсгүйчүүддээ ерөөж, өргөсөн тангарагтаа үнэнч, хоёргүй сэтгэлээр ажилладаг цагдаа бүсгүйчүүддээ баярын мэнд хүргэсэн.

Хорооны цагдаа бүсгүй танд хорвоогийн хамгийн гэгээн сайхан бүхнийг хүсэн ерөөе.