Цагдаагийн албаны тухай хуулийн 14 дүгээр зүйл 14.1.2, 14.2 дахь хэсэг, Хууль зүйн сайдын 2014 оны 89 дүгээр тушаалын хоёрдугаар хавсралтаар баталсан “Иргэний зөвлөл, оршин суугчдад цагдаагийн байгууллагын тайлан тавих журам”-ын хэрэгжилтийг хангах ажлын хүрээнд Иргэний зөвлөл, иргэд, олон нийтэд нутаг дэвсгэр хариуцсан цагдаагийн байгууллагаас 2016 онд авч хэрэгжүүлсэн ажил, арга хэмжээ, үйл ажиллагааны талаар танилцуулан, санал, хүсэлтийг сонсож цаашид хэрэгжүүлэх ажлыг тодорхойлох зорилгоор тайлангийн хурлыг орон нутагт баг, сумдад энэ оны 01 дүгээр сарын 15-ны дотор, Улаанбаатар хотод дүүргийн хороодоос эхлэн дүүрэг, нийслэлийн хэмжээнд 01 дүгээр сарын 20-ны дотор багтаан хэсэгчилсэн болон нэгдсэн хэлбэрээр зохион байгууллаа.

Тайлангийн хуралд Иргэний зөвлөлийн дарга, гишүүд, нутгийн төрийн захиргааны байгууллага, цагдаагийн төв болон нутаг дэвсгэр хариуцсан цагдаагийн байгууллагын удирдлага, алба хаагчид, иргэд, төрийн бус байгууллагын төлөөлөл тус тус оролцсон.

            Нэг. ОРОН НУТАГТ ЗОХИОН БАЙГУУЛСАН  АЖИЛ, АРГА ХЭМЖЭЭНИЙ ТАЛААР:

Орон нутагт тайлангийн хурлыг 20 аймгийн 297 сум, 163 баг, тосгонд энэ оны 01 дүгээр сарын 08-ны өдрөөс 15-ны өдрийн хооронд нэгдсэн болон хэсэгчилсэн хэлбэрээр зохион байгуулсан бөгөөд нийт 49791 иргэн оролцсон байна.

Хурлын үеэр иргэдээс цагдаагийн байгууллагын үйл ажиллагаа, алба хаагчидтай холбоотой 490 санал, хүсэлт, талархал, шүүмжлэлийг хүлээн авч шийдвэрлэсэн бөгөөд гэмт хэрэг, зөрчлөөс урьдчилан сэргийлэх чиглэлээр 15 төрлийн 18691 ширхэг санамж, сэрэмжлүүлэг, гарын авлага, зурагт хуудас зэрэг материалыг хүргүүлж, 2355 иргэнд хууль зүйн зөвлөгөөг өгч, орон нутгийн телевиз, радио болон цагдаагийн байгууллагын цахим хуудас зэрэг хэвлэл, мэдээллийн хэрэгслээр иргэд, олон нийтэд сурталчилсан.

Түүнчлэн дээрх арга хэмжээний хүрээнд гэмт хэрэг, зөрчлөөс урьдчилан сэргийлэх ажилд идэвхи зүтгэл, санаачлага гарган хамтран ажилласан аж ахуй нэгж, байгууллага, иргэдийг байгууллагын шагналаар шагнаж урамшуулах, хамтын ажиллагааг өргөжүүлэх зорилгоор спортын тэмцээн, уралдаан, хөгжөөнт тоглоом, урлагийн тоглолтыг тус тус зохион байгуулсан.  

Сүхбаатар аймгийн хэмжээнд томуу, томуу төст өвчний гаралт ихэссэнтэй холбогдуулан аймгийн Засаг даргын 2017 оны 01 дүгээр сарын 06-ны өдрийн А/03 дугаар захирамжаар аймгийн хэмжээнд олон нийтийг хамарсан ажил, арга хэмжээ зохион байгуулахыг энэ оны 01 дүгээр сарын 23-ны өдрийг хүртэл хориглосон, мөн Булган аймгийн Гурванбулаг, Дашинчилэн, Могод сумдад малын гоц халдварт цэцэг өвчин гарч хорио цээрийн дэглэм тогтоосон зэрэгтэй холбогдуулан тайлангийн арга хэмжээг зохион байгуулаагүй байна.

            Хоёр. НИЙСЛЭЛД ЗОХИОН БАЙГУУЛСАН  АЖИЛ, АРГА ХЭМЖЭЭНИЙ ТАЛААР:

Нийслэлийн хэмжээнд тайлангийн хурлыг 9 дүүргийн 152 хороонд энэ оны 01 дүгээр сарын 09-ний өдрөөс 20-ны өдрийн хооронд дүүрэгт нэгдсэн, хороодод хэсэгчилсэн хэлбэрээр зохион байгуулсан бөгөөд нийт 13904 иргэн оролцжээ.

Хурлын үеэр иргэдээс цагдаагийн байгууллагын үйл ажиллагаа, алба хаагчидтай холбоотой 641 санал, хүсэлт, талархал, шүүмжлэлийг хүлээн авсан бөгөөд гэмт хэрэг, зөрчлөөс урьдчилан сэргийлэх чиглэлээр 8 төрлийн 12865 ширхэг санамж, сэрэмжлүүлэг, гарын авлага, сэтгүүл, зурагт хуудас зэрэг материалыг хүргүүлж, MNBC, Eco TV, LCN, UBS, ETV, TV-10, Star TV, TV-5, MNC, Өлзий, Сүлжээ-3, Талст зэрэг олон нийтийн телевизүүд, “Мөрдөстэй микрофон” FM 96.3 авто радиогийн “Цагдаагийн байгууллага таныг сонсож байна”, Өдрийн сонин, 24 цаг, цагдаагийн байгууллагын цахим хуудас, олон нийтийн сүлжээ зэрэг хэвлэл, мэдээллийн хэрэгслээр иргэд, олон нийтэд 22 удаа сурталчилан ажилласан.

Мөн гэмт хэрэг, зөрчлөөс урьдчилан сэргийлэх ажилд идэвх зүтгэл гарган, хамтран ажилласан 74 байгууллага, аж ахуйн нэгж, иргэнийг байгууллагын “Талархал”, “Баярын бичиг”, “Өргөмжлөл”, үнэ бүхий зүйлээр шагнан урамшуулах ажлыг зохион байгууллаа.

            Гурав. САНАЛ, АСУУЛГЫН ДҮНГИЙН ТАЛААР:

Цагдаагийн байгууллагын үйл ажиллагааны өнөөгийн байдал, цагдаагийн алба хаагчдын ёс зүйн асуудал, үйлчилгээний чанар, шийдвэрлэх арга замын тодорхойлох зорилгоор “Цагдаагийн байгууллагын өнөөдөр, маргааш” сэдвээр иргэдийн дунд санал, асуулгын явууллаа.

Санал, асуулгыг орон нутагт  20 аймгийн 297 сум, багийн нийт 9571 иргэн, нийслэлд9 дүүргийн 152 хороодын нийт 5045 иргэнээс өөрсдийн оршин суугаа нутаг дэвсгэрийн эрүү, хэв журмын нөхцөл байдал, цагдаагийн байгууллагын болон нутаг дэвсгэрийн цагдаагийн байгууллагын үйл ажиллагаа, алба хаагчдын сахилга, ёс зүй, харилцааны соёл, байгууллагын ил тод байдал, иргэдийн оролцоо, хандлага, мэдээлэл хүрч байгаа байдал зэрэгт үнэлгээ өгснийг социалогийн “SPSS” програмд түүврийн тоог нэгтгэн оруулж, орон нутагт  нийт 4523, нийслэлд 2327 иргэний санал, сэтгэгдэлд дүн шинжилгээ хийсэн.

Судалгаанд хамрагдсан нийт иргэд өөрсдийн оршин суугаа нутаг дэвсгэрийн эрүү, хэв журмын нөхцөл байдал, ажил, үйлчилгээ үзүүлж буй цагдаагийн байгууллагын үйл ажиллагаанд нийтлэг байдлаар үнэлэхдээ орон нутагт 51 хувь нь Сайн, 30.1 хувь нь Дунд зэрэг, 11.5 хувь нь Тааруухан, энэ нь дунджаар 51 хувь буюу Хангалттай түвшинд, нийслэлд 55.1 хувь нь Сайн, 32.3 хувь Дунд зэрэг, 12.5 хувь Тааруухан, энэ нь дунджаар 55.1 хувь буюу Сайн түвшинд үнэлгээтэй дүгнэгдсэн байна.

Хуралд оролцсон болон судалгаанд хамрагдсан иргэдээс орон нутгийн төрийн захиргааны байгууллага болон цагдаагийн төв байгууллагад хандаж гэмт хэрэг, зөрчил ихээр үйлдэгдэг газрын телекамер, гэрэлтүүлгийг өргөжүүлэх, шинээр байрлуулах, одоо ашиглаж байгаа телекамерууд ашиглалтын шаардлага хангахгүй байгааг анхаарч завсар үйлчилгээ хийх, солих, ашиглалтын зардлыг шийдвэрлэх, эргүүлийн болон хорооны цагдаа, урамшуулалт эргүүлийн орон тоог нэмэгдүүлэх, тогтвор суурьшилтай ажиллуулах, гэр хороолол, түрээсийн байранд амьдардаг зарим алба хаагчдыг нийгмийн асуудлыг шийдвэрлэж Засгийн газраас хэрэгжүүлж буй түрээсийн орон сууц болон 8 хувийн хөнгөлттэй зээлэнд хамруулах ажлыг зохион байгуулах зэрэг санал, хүсэлтүүдийг гаргажээ.