Цагдаагийн байгууллагын мөрдэс нэгтэй алба хаагч та бүхэндээ шинэ оны баярын мэнд хүргэж 2016 оны 4 дүгээр улирлын дугаараа хүргэж байна.

Сэтгүүлийнхээ “Дугаарын зочин”-оор Цагдаагийн ерөнхий газрын ерөнхий нягтлан бодогч, цагдаагийн дэд хурандаа Н.Алтансүхийг урьж цагдаагийн байгууллагын төсөв санхүүтэй холбоотой алба хаагч бүрийн нийтлэг асуултын хүрээнд тодруулга ярилцлага бэлтгэлээ.

“Дугаарын сурвалжлага” булангаараа Замын цагдаагийн албаны түүхт 80 жилийн ойн ёслолын үйл ажиллагааны фото сурвалжлагыг хүргэн, “Үйл явдлын хураангуй”, “Дөрвөн зүг найман зовхист” буландаа онцлох үйл явдлуудыг тоймлон, “Тэмдэглэлт үйл явдал” буландаа Улаанбаатар хотын цагдаагийн түүхт 90 жилийн ой, Цагдаагийн ерөнхий газрын Хуулийн хэлтсийн 10 жилийн ойг тус тус онцолсон.

Харин “Түүх-Архив” булангаа “Цагдаагийн байгууллагад туслах олон нийтийн бригадыг байгуулсан нь” сэдвээр бэлтгэж, “Харих болоогүй аав” буландаа цагдаагийн хурандаа Н.Баярмагнайг урьж ярилцан, “Соёл урлаг” буландаа “Чингис хаан” одонт, МУГЖ, цагдаагийн ахмад Г.Ариунбаатартай “Мөрдэстэй уран бүтээлч байхын жаргалын мэдэрч явна” ярилцлага өрнүүлж, “Ахмадын үг” булангаа цагдаагийн хурандаа Н.Гаравсүрэнгийн бэлтгэсэн “Цагдаагийн алба хаагчийн харилцааны соёлын асуудалд” нийтлэлийг нийтэллээ.

Та бүхэнд танин мэдэхүйн мэдээлэл болгон хүргэдэг “Судалгааны өгүүлэл” буланг “Олон нийтэд түшиглэсэн цагдаагийн үйл ажиллагааг боловсронгуй болгох нь” сэдвээр бэлтгэж, “Шинэ техник-шинэ үйлчилгээ” буландаа Цагдаагийн ерөнхий газрын харьяа Шуурхай удирдлагын төвөөс иргэдэд хүргэж байгаа ажил үйлчилгээнүүдийг танилцуулан, “Уран зохиол” булангаараа цагдаагийн бэлтгэл хошууч Ж.Алтангэрэлийн “Цагдаа хүний хүү дээ, би” номын бүтээлээс дээжлэн хүргэж байна.

Дугаар бүхнээрээ дамжуулан алба хаагч нартаа шинэлэг мэдээ мэдээллийг хүргэхийг зорьдог “Цагдаа” эмхтгэлийн шинэ дугаар ийнхүү та бүхний өмнө дэлгэгдлээ.